Həbsdə olan hüquq müdafiəçisi İntiqam Əliyevin evində axtarış apararkən tapılan suvenir xəncər ekspertizaya göndərilib. Bu haqda AzadlıqRadiosuna vəkil Anar Qasımlı məlumat verib:

«Avqustun 8-də İntiqam Əliyevin evində axtarış aparılarkən, suvenir xəncəri də götürmüşdülər. Adi, dükanlarda satılan dekorativ xəncərdir. Avqustun 14-də müstəntiq həmin xəncərin soyuq silah olub-olmaması barədə ekspertiza rəyinin verilməsi ilə bağlı qərar çıxarıb».

Hüquq müdafiəçisi İntiqam Əliyev avqustun 8-də həbs edilib. O, qanunsuz sahibkarlıq, vergidənyayınma və vəzifə səlahiyyətlərini aşmada ittiham olunur.

Nəsimi rayon Məhkəməsi onun barəsində 3 aylıq həbs qərarı verib.

«Amnesty International» hesab edir ki, bu həbs İntiqam Əliyevin insan haqlarının müdafiəsi sahəsindəki fəaliyyəti ilə əlaqədardır. «Amnesty International» onu vicdan məhbusu hesab edir.