Xidmətin rəsmiləri Penitensiar Xidmətdə “kadr” axınınına “start verib”
Son beş ayda adı çəkilən qurumda baş verənlər, getdikcə daha ciddi şəkildə qalmaqala səbəb olmaqdadır. Belə ki, son aylar ərzində Penitensiar Xidmətə işə qəbulun necə gəldi aparılması, bu qurumun nüfuzuna ciddi xələl gətirib. Generalın “bazarkom”u olaraq qurumda xüsusi ad çıxaran Mirsaleh Seyidov, indi də xidmətin zabit heyətinə yeni “kadr”ların gətirilməsi prosesinə başlayıb.
Eyni zamanda Penitensiar Xidmətin rəhbərliyi uğrunda gedən amansız didişmələr və pərdəarxası konfliktlər, bu gün həbsxanalardakı əsas problemləri diqqətdən yayındırıb. M.Quliyevin dönəmində həyata keçirilən reformalar, müsbətə doğru atılan addımlar indi çeynənməyə başlanıb. Kadr məsələlərinə ciddi önəm verən əvvəlki rəhbərliyin quruma gətirdiyi nüfuzun birdən–birə uçruma yuvarlanmasının səbəbləri isə, kadr məsələlərinə aidiyyatı olmayan şəxslərin müdaxiləsidir. Özəlliklə, general Hüseynağa Əlixanovun müvəqqəti rəhbər əvəzi olması, Penitensiar Xidmətdə qanunsuzluqların yaradılmasına zəmin yaradıb.
Verilən məlumatlarda o da vurğulanır ki, Penitensiar Xidmətin rəis təyinatı gecikdikcə Ədliyyə Nazirliyində qruplaşmaların baş verdiyi gündəmdədir. Məlumatlara görə xidmətin keçmiş rəisi Mədət Quliyevə, işlədiyi dövrdə heç bir təsir gücünə malik olmayan nazirlik rəsmilərinin, eləcə də xidmətin özündə çalışan vəzifəlilərin, indi sistemdəki boşluqdan yararlanaraq çəzaçəkmə müəsisələrini rüşvət bataqlığına çeviriblər. Kadr potensialının artırılması istiqamətində hər kəsin necə gəldi xidmətə qəbul edilməsi prosesi isə, Mirsaleh Seyidovun dırnaqarası fəaliyyətinin nəticəsidir.
Penitensiar Xidmətə qəbul olunan yeni “kadr”ların ədliyyə naziri cənab Fikrət Məmmədovdan xəbərsiz həyata keçirilməsi də, Əlixanovun müvəqqəti xidmət rəisi olmasına işarədir. Belə ki, Penitensiar Xidmətdə son 7 ay ərzində işə qəbul olunanlar, əvvəlki rəhbərliyin dövründəki statistikanı dəfələrlə kölgədə qoyub. Kütləvi kadr axınının bura cəlb edilməsində isə, təbii ki, hansısa maraqların olması danılmaz faktdır. Son dövrlər çəzacəkmə müəsisələrində bəzi kadrların yarıtmaz fəaliyyətlərinin nəticəsidir ki, ölkəmiz beynəlxalq təşkilatların hazırladıqları qətnamələrin həm manşetinə düşüb, həm də nüfuzuna ciddi zərbələr dəyməkdədir.

Taryel Bayramov
gundemxeber.az