MSŞA Koalisiyasının Monitorinq Qrupu Koalisiya Şurasındakı çoxluğa qarşı çıxdı; 400 min manat ittihamının kimə ünvanlandığı rəsmən açıqlandı; Akif Qurbanov Monitorinq Qrununun qərarını “prokurorların ittiham aktı”na bənzətdi

“MSŞA Koalisiyasının şəbəkəsində son yazışmalar, aldığım məlumatlar onu ifadə edir ki, A, B planı işləmədiyi üçün artıq C planının işə başlaması üçün düyməyə basılıb. Yəni ümumi yığıncağın yenidən keçirilməsinə hazırlıq işi başlayıb. Çünki başqa cür də qəbuletmə praktikası yoxdur. Təəssüf ki, Azərbaycanımızda 1993-cü ildən bu yana nəyin bahasına olursa-olsun təhvil verməmək ənənəsi formalaşıb”.

Bu sözləri Mədən Sənayesində Şəffaflığın Artırılması Koalisiyasının təmsilçilərindən biri – Koalisiya Şurasının üzvü Akif Qurbanov özünün feysbuk səhifəsində yazıb (Akif Qurbanovun yazdığı statusun tam mətni məqalənin sonunda dərc edilib).

“Basta”nın məsələni aydınlaşdırmaq məqsədilə Akif Qurbanova ünvanladığı “A və B” planları nə idi, C planı nədir?” sualını cavablandıran KŞ üzvü bildirib ki, qurumun ümumi yığıncağının nəticələrindən narazı olanlar təzyiq yolu ilə vəziyyəti öz xeyrinə dəyişmək yolunu tutublar.

“A planı seçilmiş Şuranın tərkibi arzu olunan olmadığı üçün seçkinin ədalətsiz olması, müxalifətlə siyasi bağlantı yaradılması kimi başlıqlar altında kampaniya aparmaqla özlərinin hesab etmədikləri şəxslərə təzyiq etməklə, ehtimal olunan bir neçə məqsəddən birinə nail olmaq: Şuranın fəaliyyətinə imkan verməmək; Beynəlxalq tərəfdaşlar qarşısında etimadsızlıq yaratmaq; Legitimliyini öldürmək; Təzyiqlər və ya fərdi danışıqlar nəticəsində kiminsə mövqeyini öz istəklərinə uyğun dəyişməyə nail olmaq idi”, – Akif Qurbanov bildirb.

Akif Qurbanovun fikrincə, A planı baş tutmadığına görə, məsələni Monitorinq Qrupu rəyi vasitəsilə həll etməyə cəhd olunub.

“İclas zamanı məlum oldu ki, həmin rəyin hazırlanması prosesi də MQ üzvlərinin bərabər iştirakı ilə və şəffaf aparılmayıb. Burada məqsəd, birincisi, Monitorinq Qrupunun qeyri hüquqi, mülahizələr əsasında olan rəyini dayatma üsulu ilə Şuraya qəbul etdirmək, ikincisi, koordinator seçiminin ya istədikləri istiqamətdə baş verməsini, bu olmazsa, bu tipli məsələlərlə ümumiyyətlə gerçəkləşməməsinə nail olmaq idi. A və B planı baş tutmadığına görə artıq C-planı, yəni yenidən Ümumi yığıncaq çağırıb Əsasnaməyə dəyişiklik etmək, Şuraya etimatsızlıq yaratmaq və nəticədə yeni Şura seçməkdir. Bir sözlə devirim”, – Akif Qurbanov bildirib.

Bəs Monitorinq Qrupu nə qərar verib? Monitorinq Qrupunun Akif Qurbanovun təmsil olunduğu çoxluğa qarşı rəy verməsi Koalisiya daxilində status-kvonun dəyişməsindən xəbər verir. Çünki koalisiyanın ümumi yığıncağından dərhal sonra KŞ üzvü Oqtay Gülalıyev yazmışdı ki, həm Monitorinq Qrupunda, həm də KŞ-da “bizim müdafiə etdiyimiz” namizədlər çoxluq təşkil edir.

Necə oldu ki, “bizim” çoxluq belə rəy verdi? Kimlərsə mövqeyini dəyişibmi? “Basta”nın bu sualını cavablandıran Akif Qurbanov həmin mövzuda deyə biləcəklərini, feysbuk səhifəsindəki statusunda ifadə etdiyini söyləyib.

Akif Qurbanovun öz statusunda Monitorinq Qrununun rəyini “prokurorların ittiham aktı”na bənzədib. Onun fikirlərindən həmçinin belə qənaət hasil olur ki, Monitorinq Qrupunun bəzi üzvləri eyni düşərgədəki həmkar dostlarının köməyi ilə ümumi yığıncaqda səs qazanıb kolasiyada mövqe sahibi olandan sonra, dostlarına xəyanət ediblər.

“Vətəndaş Cəmiyyəti üçün ciddi töhvələr vermiş, müstəqil olmaq üçün ömürlərinin qızıl hissəsini bu işə xərcləyən, fəaliyyətlərindən mənim də çox şey öyrəndiyim dostları bu əməliyyatçıların təsir dairəsində görmək çox ağır gəlir və çox üzücüdür”, – Akif Qurbanov yazıb.

Akif Qurbanov Monitorinq Qrupunun qərarını da “Basta”ya təqdim edib. Məqalənin sonunda sənədin tam mətni təqdim edilib.



Monitorinq Qrupunun sənədində deyilir ki, “Koalisiya Şurasının üzvləri Qubad İbadoğlu və Əliməmməd Nuriyev tərəfindən 20 may və 26 may 2016-cı il tarixlərində Monitorinq Qrupuna yazılı müraciət verərək Koalisiya Şurasının üzvləri Azər Mehtiyev və Sabit Bağırov tərəfindən qaldırılan ağaşıdakı məsələləri mümkün qədər tez araşdırılmasını, onun nəticələri və tövsiyələri barədə Koalisiya Şurasının məlumatlandırılmasını xahiş etmişdirlər”.

Monitorinq Qrupunun araşdırmasında 3 əsas məsələyə diqqət yönəldilib: MSŞA Koalisiyasının ayrıca QHT kimi qeydiyyatdan keçməsi və maliyyə operatoru rolu oynaması; hakimiyyətin koalisiyanı nəzarətdə saxlamaq üçün üzvlərə 400 min manat pul verməsi; və sonuncu məsələni mətbuata çıxaran Oqtay Gülalıyevin barəsində tədbir görülməsi.

– Monitorinq Qrupu iddia edir ki, koalisiyanın hüquqi şəxs statusuna malik olmasının onun hakimiyyətin təsiri altına düşməsi iddiası heç bir hüquqi əsas və dəlillərə söykənmir.

Xatırladaq ki, 2014-cü ilin noyabr ayında Qubad İbadoğlunun MSŞT üzvlərinə aşağıdakı müraciəti mətbuata çıxmışdı: “Təklif olunub ki, “Mədən Sənayesində Şəffaflığın Artırılması Koalisiyası” İctimai Birliyi təsis olunsun və bu birlik yalnız Koalisiya üçün maliyyə opratoru funksiyasını həyata keçirsin. Koalisiya Şurasının son toplantısında bu təklif də müzakirə olunub və 3 nəfərdən (Əliməmməd Nuriyev, Sevil Allahverdiyeva və mən) ibarət Birliyin təsisçiləri müəyyənləşdirilıb. Hazırda Birliyin təsis sənədləri hazırlanır və yaxın günlərdə qeydiyyat üçün Ədliyyə Nazirliyinə təqdim olunacaq. Xahiş edirəm ki. bu məlumatı nəzərə alasınız. Sizə bu istiqamətdə işlərin gedişi ilə bağlı vaxtaşırı əlavə məlumatlar verəcəm”.

Bu məktubu ictimailəşdirən koalisiya üzvü Sahib Məmmədov təklifin Qubad İbadoğluna Neft Fondunun rəhbəri Şahmar Mövsumovdan gəldiyini demişdi. Sonradan Qubad İbadoğlu Sahib Məmmədovun bütün digər iddialarını təkzib etsə də, bu məktubun onun tərəfindən yazıldığını inkar etməmişdi.

– Hakimiyyətin koalisiyanı nəzarətdə saxlamaq üçün 400 min manat vəsait ayırması məsələsinə gedincə, Monitorinq Qrupunun sənədindən məlum olur ki, söhbət qurumun ümumi yığıncağının qəsdən yubadılması və bu müddət ərzində koalisiyanın üzvü olan 34 təşkilata QHT Şurası xətti ilə ümumilikdə 400 min manat məbləğində qrant ayrılmasından gedir. Xatırladaq ki, bu məsələni ilk olaraq Milli Şuranın feysbuk qrupu səviyyəsində ictimailəşdirən Oqtay Gülalıyev “Basta”nın təkidli suallarına rəğmən, söhbətin konkret hansı puldan getdiyini açıqlamamışdı. Monitorinq Qrupu bu ittihamı əsassız saysa da, ittihamın konkret məğzini rəsmən açıqlamış olub.

Bəs ümumi yığıcaq ərəfəsində QHT Şurasında qrant almış 34 QHT rəhbəri kimlərdir? Paradoksal görünsə də, QHT Şurasının rəsmi saytında büdcə pulları hesabına maliyyələşən QHT təmsilçilərinin siyahısı yoxdur.

– Oqtay Gülalıyevə gəlincə, Monitorinq Qrupu onun itthamlarını əsassız sayıb, ona xəbərdarlıq elan edilib və üzr istəməsi tövsiyyə olunub.

Maraqlıdır ki, Monitorinq Qrupunun sənədini qrupun sədri Çingiz Dadaşov və Qubad İbadoğlunu daim təbliğ edən, onun dəstəyi ilə Monitorinq Qrupuna üzv seçildiyi ehtimal olunan Lətafət Məlikova imzalayıblar. Daha bir ilginc məqam ondan ibarətdir ki, Qubad İbadoğlu hələlik Monitorinq Qrupunun qərarına rəsmi etiraz bildirməyib.

KŞ üzvü Akif Qurbanov bu gün yayımladığı satusdan o da məlum olur ki, ümumi yəğıncağın nəticələrindən narazı qalan tərəf imza toplamağa başlayıb.

İmza toplayanlar nə istəyir? Kim təşkil edir imza toplanmasını? Kimlər imza atıb?



“Basta”nın bu suallarını ehtiyatla cavablandıran Akif Qurbanov sözlərindən belə anlaşılır ki, sözügedən təşəbbüsün də arxasında hakimiyyət dayanır və məqsəd yenidən ümumi yığıncağın keçirilməsidir.

“İmza toplayanlar C-planını həyata keçirmək istəyir. Əliməmməd Nuriyev yenidən Ümumi Yığıncağın keçirilmə zərurətini artıq açıq ifadə edib, Sabit Bağırov da qoşulubsa, bu kampaniyanın və prosesin hansı səviyyədə idarə olunduğunu bizlərə aydın izah edir”, – Akif Qurbanov deyib.

***

Mədən Sənayesində Şəffaflığın Artırılması QHT Koalisiyasının Monitorinq Qrupu

Qərar 2/2

Bakı şəhəri 20 iyun 2016-cı il

Mədən Sənayesində Şəffaflığın Artırılması QHT Koalisiyasının Monitorinq Qrupuna daxil olmuş müraciətlərin araşdırılması haqqında

Koalisiya Şurasının üzvləri Qubad İbadoğlu və Əliməmməd Nuriyev tərəfindən 20 may və 26 may 2016-cı il tarixlərində Monitorinq Qrupuna yazılı müraciət verərək Koalisiya Şurasının üzvləri Azər Mextiyev və Sabit Bağırov tərəfindən qaldırılan ağaşıdakı məsələləri mümkün qədər tez araşdırılmasını, onun nəticələri və tövsiyələri barədə Koalisiya Şurasının məlumatlandırılmasını xahiş etmişdirlər. Müraciət Mədən Sənayesində Şəffaflığın Artırılması QHT Koalisiyasının Əsasnaməsinin 4.6.4-cü, 4.11-ci, 5.19.1-ci və 5.19.4-cü yarımbəndlərinə və Monitorinq Qrupunun Əsasnaməsinin 3.3-cü, 3.6-cı, 4.9-cu, 6.2-ci və 6.3-cü bəndlərinə və Etik-Davranış Kodeksinə uyğun olaraq şikayət və müraciətləri verilməsi və onlara baxılması qaydaları müəyyən edilmiş müddətdə verildiyindən araşdırılması və müvafiq rəy verilməsi üçün icraata qəbul edilmişdir. Araşdırma prossesində müraciət etmiş Koalisiya Şurasının üzvləri ilə əlaqə saxlanılmış, əlavə sənədlər və materiallar təqdim etmək, araşdırmada və iclasda iştirak etmək hüquqlarının olması izah edilmiş və iclasda iştirak etməyə dəvət edilmişdirlər. Ərizəçi müraciətini onunla əsaslandırmışdır ki, Koalisiya Şurasının üzvü Azər Mextiyev bilmək istəyir ki, Koalisiyanın hüquqi şəxs statusu məsələsinin hökumətin istəyi ilə meydana çıxması yaxud bu məsələnin son müzakirələrə çıxarılan variantının müəllifliyinin Hökumət Komissiyasının sədrinə məxsus olması fikrini Monitorinq Qrupu tərəfindən araşdırılıb açıqlama gətirilməsini istəyir.

1. Qubad İbadoğlu müraciətində Azər Mehtiyev və Sabit Bağırov tərəfindən aydınlıq gətirilməsi istənilən Koalisiyanın hüquqi şəxs statusu alması məsələsinin hökumətin istəyi ilə meydana çıxması, yaxud bu ideyanın Hökumət Komissiyasının sədrinə məxsus olması, onu təklifi ilə reallaşması, bundan irəli gələrək Koalisiyanın XVIII Ümumi Yığıncağının müzakirəsinə çıxarılması (yəni hökumətin sifarişi ilə həyata keçirilməsi) ilə bağlı səslənmiş iddia və fikirlərin nə dərəcədə əsaslı olmasının araşdırılmasını, habelə Koalisiyanın XVIII Ümumi Yığıncağının qəsdən ləngidilərək QHT-lərə Dövlət Dəstəyi Şurasının qrant müsabiqəsinin nəticələrinin elan edilməsi dövrünə salınması və bundan həmin qrumdan qrant alan təşkilatlara Ümumi Yığıncaqda səsvermə prosesində təzyiq vasitəsi kimi istifadə olunmasının araşdırılmasını xahiş etmişdir.

2. Əliməmməd Nuriyev müraciətində Koalisiya Şurasının üzvü Oktay Gülalıyevin 30 aprel 2016-cı il tarixdə siyasi partiyaları və ictimai fəlları birləşdirən Milli Şuranın Feysbuk səhifəsində yazdığı statusda tərəfindən konkret sübutlar gətirmədən onun Koalisiyanın koordinatoru olduğu dövrdə 400 000 manatlıq korrupsiya halına yol verilməsi, hakimiyyətin Koalisiya Şurasının tərkibi də daxil olmaqla ümumilikdə Koalisiyanın nəzarət altına almağa cəhd etməsi, lakin Koalisiyanın bir qrup üzvü tərəfindən buna imkan verilməməsi və əvəzində həmin qrupun səyləri hesabına Koalisiyanın indiki seçkili orqanlarının müəyyən müxalif siyasi qüvvələrin təsiri altına düşməsi, habelə Koalisiya hüquqi şəxs statusu alacağı halda onun statusunun aşağı düşəcəyi və bu onun Hökumətin daha çox nəzarəti altına düşəcəyi ilə bağlı iiddialarının araşdırılmasını xahiş etmişdir (Statusun tam mətni: “Dostlar, Sizə öncədən məlumat verdiyim kimi bu gün Mədən Sənayesində Şəffaflığın Artırılması QHT Koalisiyasının növbəti Ümumi Yığıncağı keçirildi. Şahmar Mövsümovun, Azay Quliyevin, EİTİ Beynəlxalq katibliyin, Dünya Bankı, ABŞ səfiri başda olmaqla digər səfirlik və beynəlxalq təşkilat nümayəndələrinin qatıldığı Yığıncaqda 143 təşkilat iştirak etdi. Hökümətin tam dəstək verdiyi toplantı onlar üçün 2 çox ciddi məğlubiyyətlə başa çatdı. Birinci, hakimiyyət Koalisiyanı nəzarətə götürmək üçün irəli sürdüyü “Koalisiyanı İctimai Birliyə çevirib qeydiyyata almaq” planı keçmədi, iflasa ugradı. İkinci isə bütün müqavimətə, anti- təbliqata, ayrılan 400 min manata baxmayaraq hakimiyyət Şura və Monitorinq Qrupu seçkilərində məğlubiyyətə ugradı. Şuranın 50+1, MQ- nın isə 2/3 tərkibinə bizim təklif etdiyimiz namizədlər seçildi. O cümlədən bəndəniz yüksək səslə Koalisiya Şurasına üzv seçildi. Çox ciddi ugur əldə etdik.

Sizlər də daxil olmaqla əməyi keçən, dəstəkçi olan, diqqət yetirən bütün dostlara təşəkkür edirəm.

Həftənin birinci günü Bakıda səfərdə olan EİTİ üzrə Beynəlxalq Katibliyin nümayəndəsi, regional direktor Dyveke Roganın yeni Şura ilə görüşü olacaq. Mən həmin görüşdə həbsdə olan Koalisiya üzvləri Asif Yusifli və Fuad Qəhrəmanlının məsələsini, eləcə də VC- nin digər problemlərini qaldıracam”)

Yuxarıda göstərilənləri nəzərə alaraq Koalisiyanın Şura üzvü Qubad İbadoğluya Monitorinq Qrupunun sədri Çingiz Dadaşov (23 may 2016-cı il saat 15:33-də) telefonla zəng edərək bu məsələ ilə əlaqədar fikrini bildirməsini xahiş etmişdir. Şura üzvü Qubad İbadoğlu elekton adres vasitəsi ilə bildirmişdir ki, hüquqi şəxsə çevrilmə ilə bağlı yazılanları oxuyarkən aydın göstərir ki, bu istiqamətdə aparılmış müzakirələr məqsədli şəkildə təhrif olunur. Bu məsələdə 2 yanaşmanı bir-birindən ayırmaq lazımdır. 1-ci, ilk dəfə bu müzakirə Koalisiya Şurasının üzvləri ilə Hökumət Komissiyası sədrinin görüşü zamanı aparılıb. Həmin görüş zamanı Koalisiyanın operator təşkilatının bank hesabının bağlanması səbəbindən maliyyələşmə problemini həll etmək üçün yalnız texniki funksiyaçı olacaq yeni QHT yaradıb, onu Koalisiyaya üzv daxil edib, sadəcə operator kimi istifadə etmək müzakirə olunub. O zaman Koalisiyanın qeydiyyatdan keçirilməsi məsələsi müzakirə olunmayıb və burda hansısa bir qrupun Koalisiyanı inhisara almaq istəyi ilə bağlı deyilənlər əsassızdır. 2-ci məsələ indiki yanaşma əvvəlkindən tamamilə fərqlənir. Hazırda söhbət Koalisiyanın bütövlükdə bir Alyans kimi qeydiyyatından gedir. Bu isə həm formatına, həm təsirlərinə, həm də nəticələrinə görə tamamilə başqadır. Odur ki, bu iki məsələni eyniləşdirib manipulyasiya etmək düzgün deyil. XVIII Ümumi Yığıncaqda iştirak edən 142 təşkilat qeydə alınmışdır. (XVIII Ümumi Yığıncağın Mandat Komissiyasının 2 saylı protokolu 30 aprel 2016-cı il) XVIII Ümumi Yığıncağa hazırlıq dövründə şəbəkədə Şuranın keçmiş koordinatoru Əliməmməd Nuriyev qeyd etmişdi ki, QHT-lərin Dövlət Dəstək Şurası tərəfidən Ümumi Yığıncağın keçirilməsinə 7500 (yeddi min beş yüz) manat vəsait ayrılmışdır. XVIII Ümumi Yığıncağın keçirilməsi və seçkilərin nəticələrinə təsir edən hər hansı Əsasnamə pozuntusu qeydə alınmamış Koalisiya üzvləri tərəfindən tədbirlə bağlı Monitorinq Qrupuna şikayət və müraciət daxil olmamışdır.

Əslində Koalisiyanın 34 üzvünə QHT-lər Dövlət Dəstəyi Şurası tərəfindən ayrı-ayrı layihələr konkret təyinatlara və məqsədlərə xidmət etdiyi aydın olmuşdur. Bu layihələrin maliyyələşməsi Koalisiyanın hakimiyyətin nəzarətinə keçməsi anlamına gələ bilməz. Eyni zamanda ayrılan vəsaitin ümumi yığıncaqda Koalisiya üzvlərinin mövqeyinə təsir göstərməsi ilə bağlı Monitorinq Qrupu tərəfindən hər hansı bir fakt qeydə alınmamışdır. Şura üzvü Oktay Güləliyev tərəfindən qeyd olunur ki, “Koalisiyanın hüquqi şəxs statusu alması üçün qeydiyyat məsələsinin həll olunması ilə bağlı təklif irəli sürənlərdən biri Dövlət Neft Fondunun direktoru, MSŞT üzrə Hökumət Komissiyasının sədri Şahmar Mövsümovdur. Bu təklifi o, hələ Çox Tərəfli Qrup (ÇTQ) yaranan ərəfədə İşçi Qrupunun iclasında şəxsən mənim iştirak etdiyim toplantıda bildirib.

Koalisiya Şurasının üzvü Oktay Güləliyev tərəfindən 21 may 2016-cı il tarixdə Monitorinq Qrupuna yazılı şəkildə belə açıqlama vermişdir: “MSŞA QHT-lərin Koalisiyasının Ümumi Yığıncağının gecikdirilməsi ilə bağlı mənim məlum statusumda hər hansı bir fikrim yoxdur. Bu barədə ilk dəfə rəsmi açıqlamamı açıq Facebook profilimdə yazmışam. Orda fikir belə ifadə olunub, Koalisiyanın Əsasnaməsi tələb edir ki, Ümumi Yığıncaq 2015-ci ilin dekabar ayında keçirilsin. Yığıncağın vaxtı uzadılaraq QHT Şurasının elan etdiyi qrant müsabiqəsinin nəticələri açıqlanandan sonra keçirilməsi də bəzi suallara yol açıb. Göründüyü kimi bu fikirlərdə kiməsə qarşı hər hansı ittiham yoxdur, yalnız qənaət və düşüncə paylaşılır”.

O.Gülalıyevin Feysbuk qrupunda yazdıdğı status və irəli sürdüyü iddialar vətəndaş cəmiyyəti və ictimai fəalların könüllü birliyi kimi Koalisiyanın reputasiyasına xələl gətitir. O.Gülalıyev bu statusu yazmaqla Koalisiya üzvü, Koalisiya Şurası üzvü kimi məsuliyyətini, bu statusdan irəli gələn etik məhdudiyyətləri nəzərə almamışdır. Çünki, onun tərəfindən siyasi partiyaları, ictimai fəalları birləşdirən Milli Şuranın Feysbuk qrupunda yazılanlar Koalisiyanın siyasi qüvvələrin təsiri altına düşməsi ilə bağlı fikirlərin səslənməsinə, müzakirələrə, Koalisiyanın XVIII Ümumi Yığıncağında Koalisiya Şurasına üzvlərin siyasi qüvvələrin iradəsi ilə seçilməsi iddialarının səslənməsinə yol açmışdır. Koalisiya üzvlərinin bəzilərinin seçilməsinin Ümumi Yığıncaq iştirakçılarının sərbəst iradəsinin ifadəsinin nəticəsi kimi deyil, əvvəlcədən planlaşdırılmış ssenariyə uyğun olaraq seçilmələrinə icazə verilməsi ilə bağlı rəylərin formalaşmasına səbəb olmuşdur.

Araşdırma vaxtı müəyyən olundu ki, XVIII Ümumi Yığıncağın gecikdirilməsi, qərəzli və məqsədli şəkildə olmayıb. Ümumi Yığıncaqın bir neçə ay sonra keçirilməsində Koalisiyanın Əsasnaməsinin heç bir bəndləri pozulmayıb. Qeyd etmək lazımdır ki, əvvəlki illərdə də Ümumi Yığıncaqların keçirilməsində gecikdirmələr baş vermişdir. Monitorinq Qrupu hesab edir ki, Koalisiya Şurasının üzvü Oktay Güləliyevin iddiları sübutlara söykəmədiyindən üçün əssasız hesab olunmalıdır.

XVIII Ümumi Yığıncaqda iştirak edən 142 təşkilat qeydə alınmışdır. (XVIII Ümumi Yığıncağın Mandat Komissiyasının 2 saylı protokolu 30 aprel 2016-cı il) XVIII Ümumi Yığıncağa hazırlıq dövründə şəbəkədə Şuranın keçmiş koordinatoru Əliməmməd Nuriyev qeyd etmişdi ki, QHT-lərin Dövlət Dəstək Şurası tərəfidən Kolalisiyanın müraciəti əsasında Ümumi Yığıncağın keçirilməsinə 7500 (yeddi min beş yüz) manat vəsait ayrılmışdır. XVIII Ümumi Yığıncağın keçirilməsi və seçkilərin nəticələrinə təsir edən hər hansı Əsasnamə pozuntusu qeydə alınmamış Koalisiya üzvləri tərəfindən tədbirlə bağlı Monitorinq Qrupuna şikayət və müraciət daxil olmamışdır.

Yuxarıda göstərilənləri əsas götürərək Mədən Sənayesində Şəffaflığın Artırılması QHT Koalisiyasının Əsasnaməsinin 4.6.4-cü,4.11-ci, 5.19.1-ci və 5.19.4-ci yarımbəndlərinə və Monitorinq Qrupunun Əsasnaməsinin 3.3-cü, 3.6-cı, 4.9-cu, 6.2-ci və 6.3-cü bəndlərinə əsasən qərara alındı:

1. Koalisiyanın hüquqi şəxs statusuna malik olmasının onun hakimiyyətin təsiri altına düşməsi iddiası heç bir hüquqi əsas və dəlillərə söykənmədiyindən əsassız hesab edilir. Koalisiyanın XVIII Ümumi Yığıncağında onun hüquqi şəxsə çevrilməsi ilə bağlı qərarı əsasında Koalisiya Şurasının bu məsələ ilə əlaqədar olaraq mümkün hüquqi həll yolları ilə bağlı müzakirələri davam etdirməsi və konkret təkliflərlə çıxış etməsi tövsiyə olunur. Eyni zamanda Koalisiyasının QHT-lərə Dövlət Dəstəyi Şurası tərəfindən Koalisiyanın 34-ə yaxın təşkilatına qrant layihəsinin verilməsinin onların ələ alınması kimi qiymətləndirilməsi heç bir fakta və digər dəlilə söykənmədiyindən əsassız hesab edilir;

2. Koalisiya Şurası üzvlərinin hazırkı tərkibində siyasi qrupların nümayəndələrinin təmsil olunduğunu nəzərə alaraq, gələcəkdə də bu halın istisna olunmadığını diqqətə alaraq, Koalisiyanın müstəqilliyinin təminatlarının gücləndirilməsi məqsədilə Koalisiyanın siyasi qüvvələrdən və hökumətdən, eləcə də, hasilat sənayesi şirkətlərindən eyni məsafədə dayanmasını təmin edən Qaydaların hazırlanıb qəbul olunması tövsiyə edilir;

3. Koalisiya Şurasının üzvü Oktay Güləliyevin 30 aprel 2016-cı il tarixdə siyasi partiyaları, ictimai fəlları birləşdirən Milli Şuranın Feysbuk qrupunda yazdığı statusda irəli sürdüyü iddialar heç bir sübutla təsdiqlənmədiyindən əsassız hesab edilir. Onun Koalisiyada ötən hesabat döründə hakimiyyətin müqavimətə, anti-təbliqata, başqa sözlə desək Koalisiya üzvlərinin ələ alınmasına (korrupsiyaya) 400 000 manat ayırması, hakimiyyətin Koalisiya Şurasının tərkibi də daxil olmaqla, ümumilikdə Koalisiyanın nəzarət altına almağa cəhd etməsi, lakin Koalisiyanın bir qrup üzvü tərəfindən buna imkan verilməməsi və əvəzində həmin qrupun səyləri hesabına Koalisiyanın indiki seçkili orqanlarının müəyyən müxalif siyasi qüvvələrin təsiri altına düşməsi kimi iddiaları onun öz fikrini ifadə etmə azadlığı kimi qiymədləndirilə bilməz və bu, Koalisiyanın əvvəlki Şura üzvlərinə və Koordinatoruna qarşı heç bir hüquqi və mənvi əsası olmayan qərəzli münasibəti kimi qiymətləndirilməlidir;

4. Oktay Güləliyevin hərəkətləri Koalisiyanın Əsasnaməsinin 4.9.-cu (Koalisiya üzvü yalnız Şura tərəfindən səlahiyyət verildiyi halda Koalisiyanın adından çıxış edə, bəyanatlar verə bilər), 4.10.-cu (Koalisiya üzvü bu Əsasnaməni rəhbər tutmalı, Koalisiya üzvlərinin Etik- Davranış Kodeksinə əməl etməli və Koalisiyanın nüfuzuna xələl gətirən hərəkətlərə yol verməməlidir) bəndlərinin, Koalisiya Şurası haqqında Əsasnamənin 5-ci bəndinin (Şura üzvünün Şuranın adından bəyanat vеrməк hüququ yoхdur.), Koalisiya Üzvünün Etik Kodeksinin 4-cü (Kоаlisiyа Əsаsnаməsinə riаyət еtməlidir) və 6-cı (Kоаlisiyа üzvlüyünü və əldə оlunаn məlumаtlаrı siyаsı məqsədlər üçün istifаdə еtməməli) abzaslarının pozulması kimi qiymətləndirilir.

5. Koalisiyanın bütün üzvlərinə tövsiyyə olunur ki, Koalisiyanın Əsasnaməsinin və digər sənədlərinin tələblərini daim gözləsinlər, öz açıqlamalarında və fikirlərində diqqətli olsunlar. Koalisiya daxilində hər hansı gərginlik yaradan, münasibətlərə xələl gətirən açıqlamalara yol verməsinlər.

6. Monitorinq Qrupu Koalisiyanın bütövlüyünün qorunub saxlanması məqsədlərindən çıxış edərək Koalisiya Şurasına yol verdiyi pozuntulara görə Oktay Güləliyevə xəbərdarlıq edilməklə onun Koalisiya Şurasının əvvəlki üzvlərindən və Koalisiya üzvlərindən üzr istəməsi tövsiyə edilir.

7. Qərar Koalisiyanın şəbəkəsində yerləşdirildiyi gündən qüvvəyə minir.

8. Monitorinq Qrupunun rəyi və qərarı Koalisiya Şurasına təqdim edilsin.

Monitorinq Qrupunun sədri: Çingiz Dadaşov MonitorinqQrupunun katibi: Lətafət Məlikova

***

Koalisiya Şurasının üzvü Akif Qurbanovun 11.07.2016-cı il tarixində özünün feysbuk səhifəsində paylaşdığı status

“Hörmətli dostlar, ictimaiyyət nümayəndələri!

MSŞA Koalisiyasının şəbəkəsində son yazışmalar, aldığım məlumatlar onu ifadə edir ki, A, B planı işləmədiyi üçün artıq C planının işə başlaması üçün düyməyə basılıb. Yəni ÜY-ın yenidən keçirilməsinə hazırlıq işə başlayıb. Çünki başqa cür də qəbuletmə praktikası yoxdur. Təəssüf ki, Azərbaycanımızda 1993-cü ildən bu yana nəyin bahasına olursa-olsun təhvil verməmək ənənəsi formalaşıb.

Mövzuya aid olan və ya maraq göstərənlərə aşağıdakı başlıqlarla mesajımı ifadə etmək isəyirəm:

A) Monitorinq Qrupunun qərarı barədə

Arayış üçün:

a) Monitorinq Qrupunun Əsasnaməsinin 4.9-cu bəndinə əsasən Monitorinq Qrupunun qərarları tövsiyə xarakteri daşıyır.

b) MSŞA Koalisiyasının Əsasnaməsinin 5.5-ci bəndinə əsasən Ümumi Yığıncaqlararası dövrdə Koalisiyanın idarə edilməsi Ümumi Yığıncaq tərəfindən seçilən Şura tərəfindən həyata keçirilir.

Münasibətim:

1.a və b göstərir ki, son iclasında verdiyi qərarlarla Şura səlahiyyəti çərçivəsində davranıb.

2.MQ-unu kimsə prokuror və ya məhkəmə hesab edirsə, ciddi yanılır.

3.MQ-nun məlum qərarını hazırlayanlar və ya onu dəstəkləyənlər hesab edirsə ki, onların rəyi də mövcud prokurorların ittiham aktı kimi, ümumən huququn prinsiplərinə, Koalisiyanın mövcud huquqi sənədlərinə əsaslanmadan və gerçək faktlara deyil, ümumi mülahizələrə və hədəfi yalnız fərqli baxışda olanı sıradan çıxarmağa və ya cəzalandırmağa yönələcəksə və bunu da Şura üzvləri qəbul etməli idisə, çox yanılırlar. Çünki mən huquqa münasibət bildirmişəm, kimsənin istəyinə yox. Qərar və ya rəy verənlər əvvəlcə hazırladıqları sənədin Koalisiyanın mövcud sənədlərinə və ya ümumən huquqa nə dərəcədə uyğun gəldiyinə diqqət yetirsinlər.

4.Eyni zamanda mənim kimsənin qarşısında deyildiyi kimi qabaqcadan nə öhdəlik götürməyim olub, nə də ki, belə bir anlayışın mümkünlüyünü qəbul edirəm. Ola bilər ki, kimlərsə öhdəlik götürüb ona əməl etməyə və ya insanları öhdəlik götürməyə məcbur etməklə onları istədikləri hərəkətə vadar etməyə alışıblar. Lakin bu alışqanlıqları hər yerdə istifadə etmək işə yaramır. Şura üzvlərinə də istədiyini etdirmək üçün bu cür təzyiq etmək yumşaq desəm,qeyri-demokratik və səlahiyyətlərə uyğun gəlməyən davranışdır. Bu cür üslublar idarəetmə təfəkkürünün, sadəcə, güzgüsü olur, onun sifətini göstərir.

5.MQ-nun rəyi və Şuranın qərarları ilə bağlı qarşı tərəflə istənilən açıq debata, müzakirəyə hazıram. Hətta ictimaiyyətin hörmət etdiyi bir neçə huquqşünası da müzakirəyə ekspert kimi dəvət edə bilərik ki, obyektiv qənaət hasil olsun.

B) Vətəndaş Cəmiyyəti üçün ciddi töhvələr vermiş, müstəqil olmaq üçün ömürlərinin qızıl hissəsini bu işə xərcləyən, fəaliyyətlərindən mənim də çox şey öyrəndiyim dostları bu əməliyyatçıların təsir dairəsində görmək çox ağır gəlir və çox üzücüdür. Ümidvaram əvvəlki kimi resursları imkan verməsə belə, heç olmasa keçmiş xidmətlərinə və şərəfli illərinə dəyər verib, sadəcə, müşahidəçi qalmaq imkanları olacaq.

C) Bəyanat barədə

Yayılmış bəyanat barəsində müzakirə ilk olaraq iclasın gündəliyinə əlavə olunmasından başladı. Yeganə etiraz edən mən idim ki, biz həmin məsələyə dair qaydalar hazırlanması üçün işçi qrupu yaradılması barədə qərar vermişik. Qaydalar olması daha zəruridir və onun təsiri üstün, tənzimləyici və daimidir. Bəyanat isə cari münasibətdir. Lakin bəyanatın müəllifi S.Bağırov və digər hər kəs bunun qəbulunun da ziyanlı olmadığını bildirərək məsələni dəstəklədilər və mən bitərəf qalmaqla hər kəs gündəliyə əlavə olunmasına səs verdilər. MQ-nun qərarının Şura tərəfindən tam dəstəklənməməsinə və istəyinin baş tutmamasına görə iclası tərk edən hörmətli Ə.Nuriyevin bəyanata imza atmaması, sadəcə, belə deyək ki, mexaniki baxımdan (Çünki həmin məsələ barəsində yekun qərar veriləndə o, artıq iclası tərk etmişdi) mümkün olmamışdır. Əslində isə müəllifin təklifinə bir növ öz təklifi kimi yanaşdığı açıq sezildiyi halda sonradan onu qəbul etmədiyini söyləməyin və bunun üzərində müxtəlif rəy yaratmaq cəhdinin nə olduğunu sizin qənaətinizə buraxsam, daha doğru olar.

D) Növbədənkənar ÜY

Girişdə dediyim kimi, təhvil vermək ənənəsinin olmaması hər cür vasitələrə yol açır ki, təki əlimizdə olanı verməyək fəlsəfəsi yaşasın. Artıq imza toplama kampaniyası başlanılıb və Ə.Nuriyev də ÜY-ın çağırılmasını dilə gətirirsə, demək ki, hər şey aydındır. Ancaq məsələnin hüquqi tərəfləri də var:

1.Əsasnamənin 5.2-ci bəndinə görə isə Növbədənkənar Ümumi Yığıncaq Şuranın özünün birbaşa qərarı, habelə Monitorinq Qrupunun ya da Koalisiya üzvlərinin azı 1/5-nin tələbi ilə Şura tərəfindən çağırıla bilər. Ona görə də nə qədər imza yığsanız belə buna Şura qərar verməlidir.

2.Həmçinin Əsasnamənin 5.6-cı bəndinə görə Şuraya üzvlər gizli səsvermə qaydasında nisbi səs çoxluğu ilə 2 il müddətinə seçilir. Yəni hətta Şura qərar versə və ÜY çağrılsa belə, səlahiyyət müddəti başa çatmamış Şura üzvü seçkisi keçirilə bilməz. Ona görə də əbəs yerə çaba göstərməyin, Koalisiyanın ümumi iradəsinə hörmətlə yanaşmaq hər kəsin boynunun borcudur, təbii ki, hüquqa hörmət etdiyi təqdirdə.

3.“Niyyətin hara, mənzilin də ora” atalar sözündə deyildiyi kimi, indiki halda niyyətiniz əgər istədiyinizi, daha doğrusu, sizə tapşırılanı və ya üzərinizə missiya kimi biçiləni yerinə yetirməkdirsə, buna devrim, çevriliş və s də demək olar. 1920 və 1993 təcrübəsi ortadadı. Pafoslu səslənə bilər, lakin hədəf və məqsədlər doğrultusundan yanaşsaq, müqayisə nə qədər qüsurlu və hədsiz iddialı görsənsə belə, ideyanın mahiyyəti baxımdan eynidir. Yəni 20 və 93 çevrilişi kimi bir şey olacaq.

4.Son vaxtlar “Legitimlik” sözünü çox işlədirlər, halbuki təbliğ etdikləri, qoruduqları, xidmətində bulunduqları ideyanın, missiyanın və vəzifənin heç bir legitimliyi olmayıb, illər boyu, yalnız dayatma üslübü ilə yaşayıb. Ona görə də legitimlikdən dəm vuranlar “Kimdə nə çatmır, adətən, ondan danışır” deyimini də unutmasınlar.

E) Koalisiyada qrup məsələsi

1.Məni qrup oynunda hesab edənlər əvvəl nəzərə alsınlar ki, 30 dan çox namizəd içərisindən 90 səslə ikinci ən çox səs almışam. İştirakçıların 2/3 səsini alan necə qrup üzvü olur?! Bu nəticə onu demirmi ki, əslində, məni bunda ittiham edənlərin özləri qrupdu, çünki azlıqda qalıblar, ya seçilməyiblər və ya ən azı məndən az səs toplayıblar. Hər halda seçkini də mən keçirməmişəm ki, hər hansı müdaxilə edim. Seçkini siz keçirmisiniz, zəhmət çəkin apardığınız prosesin nəticəsinə (sizin üçün uğurlu olmasa belə) də qatlanın. Əgər səsləndirdikləriniz demokratiya çağırışlarına əməldə də inandığınızı göstərmək istəyirsinizsə…

2.Mənim seçilmiş Şura üzvlərindən kiminləsə həmrəyliyimi (sizin təbirinizcə 6 nəfər) qrup oynu hesab edirsinizsə, bunda da ciddi yanılırsınız.

Əvvəla, ilk başlardan mənim məqsədim, siyasi bağlantım və baş verənlərə münasibətim barəsində Kamran Mahmudovun “Aktual” verlişində aydın ifadə edilib. İkincisi, deyilirsə ki, son iclasda 6 nəfərin həmrəyliyi görsəndi və bu ciddi problemdir, onda haqlı sual yaranır ki, ötən Şuradakıların həmrəyliyi nəinki 50+1, hətta daima 2/3-dən çox olub. Onda sizin təbirinizcə ən pisi və qəbuledilməzi siz daha çox artıq dozada eləmisiniz. Niyə siz həmrəy olanda ola bilər, biz yox? Ona görəmi ki, bu həmrəylik yalnız hakimiyyətin marağına xidmət etsin?!

Bunu çox açıq bəyan edirəm, mənim o Şurada iştirakımın yeganə məqsədi oranın hökumətin nəzarətinə keçməməsi zərurətidir. Kim o mövqeyi mənə və ya mənim ona münasibətindən, siyasi düşüncələrindən asılı olmayaraq hara qədər davam etdirə biləcəksə, onunla həmrəyliyim davam edəcək, kim isə yolun bir hissəsində fərqli münasbət göstərəcəksə, ona da münasibətim adekvat olacaq. Bu qədər sadə və net… Əgər bunu qəbul etməyən və ya istəməyən varsa, onun də niyəsi hər kəsə bəllidir…

F) Yekun olaraq – Əslində nə baş verir?

1.Gerçək mənzərə həm də onu təqdim edir ki, Hökumət QHT-lərə dövlət dəstəyi adı ilə yaratdığı Şuranın əsas fəaliyyətini müstəqil VC təmsilçilərinin mövcu olmaması və ya gözə görünməməsi missiyası kimi biçib. Əgər belə deyilsə, həmin qurum öz həmkarlarına, tanınmış və yüksək hörmət qazanmış VC liderlərinə qarşı 2014-2015-də istintaqa rəy verməzdi. Bununla onlar nəinki öz həmkarları ilə həmrəyliklərini nümayiş etdirmədilər, həmçinin özlərini və məhkəmə-hüquq sistemini siyasi hakimiyyətin göstərişilə işlədiklərini göstərdilər.

2.Həmin Şuranın filtrləmə fəaliyyəti nəticəsində artıq ölkədə sistemdaxili və sistemxarici QHT-lər formalaşdırılıb. Yəni öz sistemləri daxilində gördüklərinə maliyyə ayırmqla sistemxaricində qalanları sıradan çıxarmağa çalışırlar. Düzdür uzun müddət buna müaqvimət göstərən dostları da artıq problemi görməmə, görsələr belə dilə gətirməmə müqabilində sistemdaxilinə çəkə bilirlər. Amma “dəvəquşu vəziyyəti” ortalıqdadır.

3.QHT Şurasının və onun Koalisiyada olan təmsilçilərinin uzun müddət çabalarının nəticəsi uğursuz oldu. Xüsusən devalvasiyadan sonra hökumətin beynəlxalq maliyyə qurumlarından istədiyi kreditə görə əvəzində VC-nin vəziyyətinin düzəldilməsi tələbi gəldikdən sonra ənənəyə sadiqlik nümayiş etdirilərək problemi gerçəkdən həllə yox, imitasiya kampaniyasına başlanıldı. Bu kampaniyanı da kimlərə həvalə etdilər bəllidir. Bu işdə az da olsa, simptomatik müəyyən addımlar atılsa da, daha çox PR və problemləri qabartmamaq, görməmək kimi məslələrə xeyli “maya” qoyuldu. Koalisiya ilə bağlı da düşünüldü ki, idarəetmə nəzarət altında olacaq və həmin nəzarət gələcəkdə artıq heç bir problemin qalmadığını deyəcək, necə ki indi deyirlər. Bununla da statusun bərpasını problemi həll edərək yox, görməyənlər qrupu yaratmaqla “həll” etmiş olacaqdılar. Həmçinin düşünülürdü ki, Koalisiyanın huquqi statusu zərurətini hər kəs qəbul etdiyi üçün onu İB-ə çevirərək adı statuslu olsun, mahiyyəti isə hökumətdən asılı. Bununla da QHT qanunvericiliyində edilmiş son dəyişikliklərin də işlək olduğunu göstərməklə legitimləşdirmə məqsədi daşıyan “bir güllə ilə 2 quş vurma” görüntüsü yaradılacaqdı.

Lakin bunlar alınmadı, hər mənada qoyulan “maya” batdı. İndi isə hesabat vermə zamanıdır, özü də təkcə xaricə deyil, əsas da daxildə rəhbərliyə. Bunun da ən yaxşı ənənəvi üslubü var: əsas günahkar radikal müxalifətdir. Bu üslubu illər boyu öz bacarıqsızlıqlarını ört-basdır etmək üçün tətbiq ediblər. İndi də fərqli olan bir şey yoxdur. Lakin daxildə bu üslub keçərli olsa da, xaricə keçərli deyil. Hökümət əməli iş ortaya qoyub öhdəliyini icra etməlidir. Anlamalıdır ki, aldatma, gözə kül üfürmə ilə bir yerə qədər getmək olur. Xüsusən də, bu kül üfürmə üçün daima bacarıqlı birilərini tapmaq və ya onu işlətmək limitsiz olmur. Ortada itirən isə Azərbaycan və onun uğurlu gələcəyinin təminatçısı olan vətəndaş cəmiyyətidir.

4.QHT Şurası Koalisyaya ayrılan institusional layihənin icrasını dayandırmaqla prosesin tərəfi olduğunu bir daha təsdiq etmiş olur.