Arzu Rəhimovun başı “maliyyə məsələləri”nə qarışınca, qurumun rayon şöbələrində də şıdırğı saxta hərbi bilet alverinə şərait yaranır

Neçə müddətdir ki, qəzetimizin səhifələrində dərc etdiyimiz materiallarda Səfərbərlik və Hərbi Xidmətə Çağırış üzrə Dövlət Xidmətinin (Səfərbərlik xidməti) müxtəlif rayon şöbələrinin fəaliyyətində yer almış ciddi qanun pozuntularından bəhs olunur. Etiraf etmək lazımdır ki, ayrı-ayrılıqda götürülmüş hər hansı bir şöbədə müşahidə olunan neqativ hallar, əslində nəticə etibarı ilə məhz ümumilikdə Səfərbərlik Xidmətinin yarıtmaz fəaliyyətindən xəbər verir. Heç təsadüfi deyil ki, bu gün cəmiyyətdə formalaşmış ictimai rəy Səfərbərlik və Hərbi Xidmətə Çağırış üzrə Dövlət Xidmətinin, eləcə də birbaşa Xidmətin rəisi Arzu Rəhimovun fəaliyyətindən çoxsaylı narazılıqlarla diqqəti cəlb edir. Digər tərəfdən də, son zamanlar Səfərbərlik xidmətinin əksər yerli şöbələrində çalışanların rəhbər vəzifəli şəxslərin avtomobillərinin, villalarının və ticarət obyektlərinin də sayının və qiymətlərinin durmadan artması, bu narazılıqların yaranmasını stimullaşdırır. Artıq heç kəs üçün sirr deyil ki, bu gün Səfərbərlik xidmətinin bir çox rayon şöbələrinin fəaliyyəti hələ də əksər hallarda vətəndaşların hüquqlarının pozulması, müxtəlif korrupsiya faktları ilə müşayiət olunmaqdadır. Halbuki vətəndaşların orduya çağırışı və konkret ordu hissələrinə göndərişi ilə bağlı bütün səlahiyyətlərin Səfərbərlik xidmətinə verilməsindən sonra belə bir ictimai rəy də formalaşmışdı ki, artıq bu proseslər bəzi rüşvətxor hərbçi məmurlar üçün qeyri-leqal gəlir mənbəyi kimi öz əhəmiyyətini itirəcəkdir. Lakin bütün bu islahatlar nəticə etibarı ilə bəzi bölgələrdə rüşvət və korrupsiyadan əldə olunan gəlirlərin mənimsəmə imkanlarının sadəcə olaraq birilərinin əlindən digərlərinə keçməsinə səbəb oldu. Bu günlərdə ölkə mətbuatında yayımlanmış məlumatlarda isə, Səfərbərlik xidmətinin rəhbərliyi həm də irimiqyaslı maliyyə maxinasiyaları, dövlət büdcəsindən ayrılan vəsaitlərin mənimsənilməsi hallarında ittiham olunur. Söhbət Səfərbərlik və Hərbi Xidmətə Çağırış üzrə Dövlət Xidmətinin saxlanması üçün nəzərdə tutulmuş vəsaitlərdən gedir. Məlumatlarda ilkin olaraq bildirilir ki, Səfərbərlik xidmətinə 2016-cı il üçün büdcədən 20 milyon manatdan artıq vəsait ayrılıb. Bu vəsaitin yarıdan çoxu, yəni 10 milyon 452 min manatı ştatda olan işçilərin əmək haqqına nəzərdə tutulub. Ştatdankənar işçilərin əmək haqqı məbləğı isə, 22 min 500 manat qeyd edilib. Lakin mənbənin iddiasına görə, artıq neçə ildir ki Səfərbərlik xidmətinin strukturlarında ştatdan kənar işçilər mövcud deyil. Bu faktı Xidmətin bir neçə rayon şöbəsinin rəhbəri media sorğusuna cavab olaraq da təsdiqləyib.

Bundan başqa, bu il Səfərbərlik xidmətinə dərman preparatları və sarğı materiallarının satın alınması üçün 761 min 646 manat vəsait nəzərdə tutulub. Diqqəti cəlb edən məqam isə budur ki, qeyd olunan rəqəm 4 il əvvəlki ilə müqayisədə 38 dəfə (!) çoxdur. Belə ki, 2012-ci ildə Səfərbərlik xidmətinə dərman preparatları və sarğı materiallarının satın alınması üçün 20 min manat vəsait ayrılıb. Halbuki, 4 il əvvəl dövlət büdcəsi bu ilki kimi qənaətcil formalaşmamışdı. Maraqlıdır ki, bu ağlasığmaz fərqi son dörd il ərzində baş vermiş qiymət artımı ilə də heç cür əsaslandırmaq olmur. Çünki, bu zaman ərzaq məhsullarının satın alınmasına ayrılan məbləğin təxminən 30% azalmasını izah etmək olmur. Həmçinin diqqəti cəlb edən bir cəhət də budur ki, məhz ki, Arzu Rəhimovun Səfərbərlik və Hərbi Xidmətə Çağırış üzrə Dövlət Xidmətinin rəisi vəzifəsinə təyin olunmasından sonra, dərman preparatları və sarğı materiallarının satın alınmasına sərf olunan xərclərin kəskin artmı baş verib. Belə ki, 2012-ci ildə bu xərclər 20 min manat idisə, artıq 2013-cü ildə həmin bənd üzrə satınalmalara 100 min manat məsrəf olunub.

Təbii ki, Səfərbərlik xidmətinin rəhbərliyinin başı bu kimi “maliyyə məsələləri”nə qarışınca, qurumun rayon şöbələrində də şıdırğı saxta hərbi bilet alverinə şərait yaranır. Nəticədə isə, yerli mənbələr tərəfindən müxtəlif instansiyalara təqdim olunan məlumatlarda əksər rayon kəndlərində sağlam çağırışçıların rüşvət almaq yolu ilə ordudan yayındırılması və onların yerinə hərbi xidmətə yararsız gəncləri göndərilməsinə dair konkret faktlar yer almağa başlayır...

Qarşı tərəfin də münasibətini öyrənə bilərik.