Gözdən əlillər Baş Prokuror və Ədliyyə Nazirinə müraciət etdilər


Əlillərin Müdafiə Komitəsi gözdən əlil Elyar İsrail oğlu İsmayılovun qanunsuz həbsindən narazıdırlar. Artıq neçə müddətdir ki, onlar bu narazılığı mətbuatda, eləcə də "Gündəm Xəbər" qəzetinin səhifələrində ifadə edirlər. Gözdən əlillər eyni zamanda ölkə başçısına, bir sıra nazirlərə, o cümlədən Vergilər Naziri Fazil Məmmədova mürciət ediblər. Lakin hələlik bu müraciətlərə reaksiya verilməyib.

Gözdən əlillərin növbəti müraciəti isə Baş Prokuror Zakir Qaralova, Ədliyyə naziri, Məhkəmə-Hüquq Şurasının (MHŞ) sədri Fikrət Məmmədova müraciət ediblər: "Sizə üz tutmağımızın nədəni araşdırma, istintaq, əməliyyat-axtarış fəaliyyəti zamanı qanunvericiliyin kobud şəkildə pozulmasına hüquq qiyməti verilməməsi, məhkəmə qərarı olmadan vətəndaşların həbs olunması və sonradan onların barəsində saxta məhkəmə qərarları ilə həbs qətimkan tədbirlərinin seçilməsinə diqqətinizi yönəltməkdir.Hansı qurumun etməsindən asılı olmayaraq, heç bir əsas olmadan özbaşına,şəxsi mülahizəyə əsasən, vətəndaşın şübhəli şəxs qismində bir dəqiqə belə saxlanılmasının yolverilməz olmasını bilməmiş deyilsiniz. Di gəl, Azərbaycanda bir sıra dövlət qurumları tərəfindən vətəndaşın belə “şübhəli” yolla həbs edilməsi praktikası geniş yayılıb. Özü də ailəsini bilgiləndirmədən, saxlanmasının səbəbi deyilmədən, müdafiəçi ayırmadan.Vallah, polisin adı çıxıb,vergiyığanların, icra məmurlarının vətəndaşları, əlilləri, özü də tələbkar tərəfi məhkəmə qərarı olmadan həbs etmələri adi hal alıb. Belə fikir yaranır ki, gerçəkdə ölkədə nə prokuror nəzarəti var, nə də Məhkəmə Hquq Şurası. Sadəcə, gözdən pərdə asmaq adına nə qədər məmur dövlət büdcəsindən əlillərə, pensiyaçılara, işçilərə çatmalı olan pulu yeyir!"

Müraciətdə bildirilir ki, 11 noyabr 2016-cı ildə saat 17 radələrində 10-a yaxın vergi əməkdaşı əlillərin Sabunçu rayonu, Bakıxanov qəsəbəsindəki köşkünə soxulub və oradakı bütün şəxsləri zorla maşına basıb naməlum istiqamətdə aparıblar: "Tərtərdə doğulmuş, Gəncədə yaşayan, iş üçün Bakıya gələn gözdən hərbi xidmət əlili, 4-5 yaşında iki körpə uşaq atası Elyar İsrail oğlu İsmayılovu həmin gündən qanunsuz həbsdə saxlayan vergiyığanlar ondan və digər vətəndaşlardan onun əleyhinə ifadə alaraq gecə yarısı sərbəst buraxıblar.

Baş Prokurorluğun 492 55 40 və 492 01 38 “qaynar xətt” xidmətində isə son bir ildə demək olar dəstəyi belə götürmürlər.Bizim çoxsaylı zənglərimizdən sonra gecə yarısı adını deməyən növbətçi prokuror gözdən əlilin hüququnun kobud şəkildə pozulmasına “gecdir, sabah baxarıq” deməklə reaksiya verdi. Ertəsi gün dəstəyi götürən növbətçi yenə adını demədən saat 13-dən sonra zəng etməyimizi bildirdi .Saat 13-dən sonra dəstəyi qaldıran növbətçi isə özünü dandı ki, elə söz deməyib, o sözü deyən növbətçini tapandan sonra şikayətimizə baxılacaq!(??) Bu “qaynar xətt” insanları dolamaq üçündür,yoxsa?... Sizdən soruşuruq,hörmətli baş dövlət ittihamçısı! DİN-in 102 xidmətinə müraciətimizi də öncə qeydə almadılar ki, verginin işinə qarışa bilməzlər, ombudsmanın “qaynar xətt” xidməti (0503709896 ) isə yalnız polisdən şikayətləri qeydə aldığını vurğuladı, 195 xidmətinin 18-ə kimi bizi dinləməyə belə dözümü çatmadı,18-dən sonra isə istirahətə getdi. Bir sözlə, ”qaynar” xidmətdən əlimizin çıxdığına əmin olub, yalnız 102 xidmətinə gözümüzü dikib, gözdən əlilin harada saxlandığını öyrənmək istədik. Heç demə, əlili Yasamal polisində saxlayırlarmış. Sözügedən polisdən verginin göstərişilə (??) saxladıqlarını deyib, ən azı 48 saat orada olacağını bildirdilər. Ha çalışdıq, qanunu, konstitusiyanı anladaq,”olmaz” deyib durdular. Nazirə şikayət edəcəyimizi deyəndən sonra 102-dən özünü Famil kimi təqdim edən (??) polis zəng edib əlilin Yasamal məhkəməsinin qərarı ilə 2 sutka həbs olunduğunu dedi. Axı, məhkəmə 2 sutka həbs qətimkan tədbiri seçmir, bəlkə inzibati həbs seçilib, deyə fikirləşdik.Özünüzü bizim yerimizdə, əlilin, onun ailəsinin yerində hiss edin. Gözdən əlili tutub aparıblar, nə yerini, nə hakimin adını deyirlər, nə də məhkəmə qərarını verirlər. Özü də bunu məhkəmənin qapalı keçməsilə izah edirlər. Birincisi, hadisə Sabunçuda olubsa, niyə Yasamal məhkəməsi qərar verməlidir, ikiincisi, məhkəmə niyə qapalı keçirilməlidir və üçüncüsü, bəyəm qapalı keçəndə hakimin adı da gizlədilir? İbtidai icma quruluşunda yaşayırıq ki, ibtidai araşdırma aparan vergi müstəntiqi vətəndaşı gizlin şəkildə anonim hakimin qərarı ilə həbsdə saxlayır? Nə isə...yalnız əlilin həbsindən 10 gün sonra 12.11.2016-cı il tarixli 4(004)-1119/2016 saylı hakim Sərdar Mehrəliyevin adından seçilən həbs qərarını əldə edə bildik. Bu qərarın girdirmə olduğunu Vergilər nazirinə müraciətimizdə izah etmişik. Onu əlavə edək ki,vergi qurumunun yaydığı informasiyada da Elyar İsmayılova 12.11.2016-cı il tarixli Yasamal məhkəməsinin qərarı ilə həbs seçildiyi göstərilib.Vurğuladığım kimi bu qərar saxtadır və hakim Sərdar Mehrəliyev, onun adından bu qərarı tərtib edənlər məsuliyyətə alınmalıdırlar".

Daha sonra gözdən əlillər bildirirlər ki, dəhşətə, mənəvi terrora baxın ki, gözdən əlil zabiti vergi müstəntiqi həbs edib,özü də məhkəmənin adından qərar qəbul edib: "İndi 1 aydır gözdən əlil Kürdəxanıda reketlyin qurbanıdır. Bəs prokuror nəyə nəzarət edir, bəs penitensiar xidmət niyə əlili məhkəmə qərarı olmadan həbsdə saxlayır? Axı, kim bilməsə də, prokurorluq, ədliyyə işçisi bilməlidir ki, cinayət işlərində məhkəmənin qərarı üçrəqəmlidir! Bunu bilmirlərsə, necə ədliyyə sistemində, hüquq orqanında işləyirlər? Bunu bilmirlərsə,vay bu ölkənin vətəndaşlarının halına! Sizdən vəzifənizi icra edib,gözdən əlil hərbi xidmət əlili, Azərbaycan Ordusunun zabiti, 2 körpə uşaq atası Elyar İsmayılovun anında həbsdən azad edilməsinə, rebilitasiya hüququnun təminatına göstəriş verməyinizi və məsul şəxslərin qanunsuz hərəkətlərinə hüquq qiyməti verməyinizi diləyirik".

Müraciəti Əlillərin Müdafiə Komitəsinin başqanı ,DİN-in 1-ci qrup Qarabağ əlili, jurnalist Məğrur Bədəlsoy və daha 39 əlil-şəhid ailəsi imzalayıb.
Yazışma Danışığı Bitdi

Ramin

gundemxeber.az