Akif Çovdarov evindən tapılan şirkət sənədləri və qızıllarla bağlı ifadə verməkdən imtina edib

“İlqar Aşurbəyovla düşmənçiliyim və ya ədavətim olmayıb”

“Əbil Vəzirovdan 80.000 ABŞ dolları məbləğində pul vəsaitini almağım mənə qarşı böhtandır”

Sabunçu rayon Məhkəməsinin inzibati binasıda ləğv edilmiş Milli Təhlükəsizlik Nazirliyi (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə məhkəmə prosesi davam edir. Proses Bakı Hərbi Məhkəməsinin hakimi Həbib Həsənovun sədrliyi ilə keçirilir. Proses qapalı olsa da, mətbuatda içədirdə baş verənlərlə bağlı məlumatlar çıxır. 6 aya yaxındır ki, cinayət işi üzrə proses keçirilir, amma Akif Çovdarov susmağa üstünlük verir. O, ifadəsində törətdiyi cinayətlərə şərik olan vəzifəli şəxslərin adlarını çəkmir. Bununla da dəstə başçısının hələ də həbsdən yaxa qurtarmaq ümüdləri var...

Akif Çovdarov sabiq MTN əməkdaşı İlqar Aşurbəyovun külli miqdarda pulunu ələ keçirməsi epizodu üzrə də ifadə verib. O, bildirib ki, Milli Təhlükəsizlik Nazirliyinin sabiq əməkdaşı İlqar Aşurbəyov yalan danışır: “İlqar Aşurbəyovdan hər hansı məbləğdə pul tələb etməmişəm və ya almamışam. Anti-terror mərkəzinin rəis müavini işlədiyim dövrdə kürəkənim Rəşad

Əmircanov MTN-in Hava limanında Təhlükəsizlik İdarəsinə əməliyyat müvəkkili vəzifəsinə təyin olunub. Həmin vaxt MTN-in Hava limanında Təhlükəsizlik İdarəsinin rəisi İlqar Aşurbəyov olub. Kürəkənim Rəşad Əmircanov MTN-in Hava limanında Təhlükəsizlik İdarəsinin əməliyyat müvəkkili olmasına baxmayaraq nazirliyin inzibati binasında xidmət aparın. MTN-in Hava limanında Təhlükəsizlik İdarəsi 2009-cu ilə kimi IV Baş idarənin tərkibində olub, 2009-cu ildə IV Baş İdarədən VI Baş İdarə ayrılıb. Mən həmin baş idarənin rəisi təyin olunmuşam. MTN-in Hava limanında Təhlükəsizlik İdarəsi VI Baş İdarənin tərkibinə verilib. VI Baş İdarənin tərkibi təsdiq olunarkən MTN-in Hava limanında Təhlükəsizlik İdarəsinin rəisi vəzifəsinə başqa şəxs təyin olunub. İlqar Aşurbəyovla düşmənçiliyim və ya ədavətim olmayıb. Sadəcə olaraq münasibətlərimiz soyuq olub”.

“Baktel LTD” MMC-nin sahibi Zaur İbrahimovun külli miqdarda pul vəsaitinin ələ keçirilməsi epizodu üzrə Akif Çovdarov yenə də özünü törətdikləri cinayətlərdən kənara çəkmək istəyib. O, ifadəsində Zaur İbrahimovu, Ruslan Qarayevi, Sənan Bağırovu, Vüqar Məhərrəmovu tanımadığını, Zaur İbrahimovdan ümumilikdə 525.000 ABŞ dolları məbləğində pul vəsaitini almadığını bildirib.

“Zaur İbrahimovun ofisinə MTN əməkdaşları göndərilməyib”

Akif Çovdarov 5 may 2016-cı il tarixdə Zaur İbrahimovla keçirilmiş üzləşdirmə zamanı sonuncunun ifadəsini dinləyib və qeyd olunan hadisəni xatırlayaraq özünü müdafiə xarakterli ifadə verib. O, bildirib ki, həmin ərəfədə Vüqar Məhərrəmov

Milli Təhlükəsizlik Nazirliyinin komendaturasına şikayət edərək “Baktel” MMC-nin sahibi Zaur İbrahimovun “Aytel” MMC-yə borcu olduğunu bildirib: “Bu səbəbdən Zaur İbrahimovu xidməti otağıma çağırtdırmışam. Zaur İbrahimov Ruslan Qarayevlə birlikdə xidməti otağıma gələrək “Aytel” MMC-nin direktoru Vüqar Məhərrəmova 200.000 manata yaxın borcu olduğunu və pulun bir hissəsini ödəyə biləcəyini bildirib. Ərizənin səlahiyyətimə aid olmadığını gördüm. Zaur İbrahimova Vüqar Məhərrəmovun borcunu ödəməsini bildirdim. Həmçinin Zaur İbrahimovla Ruslan Qarayevi qəbul edərkən sonuncunun onunla polis orqanlarında bir yerdə işləmiş əmisi Qarayev Arif Baxcəli oğlu zəng edərək aralarında olan mülki mübahisəni onların özlərinin həll edəcəklərini dedim. Həmçinin o, Zaur İbrahimova borclu olan şəxslərin pullarının qaytarılmasında köməklik etməsini xahiş etmişdi. Zaur İbrahimov Ramiz Ağayevin külli miqdarda pul borclu olduğunu bildirdikdən sonra Ramiz Ağayevi müəyyən edərək həmin şəxsin müflis olduğunu öyrəndim. Bundan sonra Zaur İbrahimovla əlaqəm olmayıb. Lakin sonuncu ilə bir neçə dəfə mobil telefon əlaqəsi saxladım. Sənan Bağırovu xatırlamıram. Rəsulov Rəsul Mösüm oğlunun yanında kimdənsə pul almamışam. Zaur İbrahimovun ofisinə heç vaxt MTN əməkdaşları göndərilməyib”.

Akif Çovdarovun sözlərinə görə, sahibkarlıq fəaliyyəti ilə məşğul olan Neman Kərimovu və Sevinc Məmmədovanı tanımır. Qeyd edib ki, Səlim Məmmədov və Elçin Çıraqov tərəfindən Neman Kərimovdan hər hansı məbləğdə pulun alınmasından və ya tələb etməsindən, eləcə də, Neman Kərimovun nazirliyə gətirilməsindən məlumatı olmayıb.

“80 min ABŞ dolları məbləğində pul vəsaitini almağım qarşı böhtandır”

Akif Çovdarov əntiq malların satışının həyata keçirildiyi “Moda” mağazasının sahibi Əbil Vəzirovun külli miqdarda pul vəsaitinin alınması epizodu üzrə bildirib ki, “Beşmərtəbə” dairəsinin yaxınlığında “Moda” adlı suvenir mağazası işlətmiş Əbil Vəzirovun 2009-cu ilin oktyabr ayının 17-də Milli Təhlükəsizlik Nazirliyinin əməkdaşları tərəfindən tutularaq nazirliyinin inzibati binasına gətirilib: “Orada Əbilə hədə-qorxu gələrək Mişa adlı şəxsə qanunsuz antikvar əşya satması barədə etiraf etməsini tələb edərək, onu təxminən gün ərzində 10 saatdan artıq orada saxlaması, 200.000 ABŞ dolları gətirməyini, əks halda onu da Mişa kimi həbs eləməklə hədələməsi və bundan sonra aradakı razılığa əsasən Əbil Vəzirovun ümumilikdə 80.000 ABŞ dolları məbləğində pul vəsaitini gətirib şəxsən mənə Milli Təhlükəsizlik Nazirliyində verməsi, Əbilin pulu verdikdən sonra bu barədə kiməsə bir söz deyəcəyi təqdirdə həbs etməklə hədələməsi barədə göstərilənlər tamamilə yalandır. Belə bir hadisəni tam olmasa da, qismən xatırlayıram. Çünki Azərbaycan Respublikasından xaricə antikvar əşya aparan bir nəfər şəxsin aeroportda saxlanılması sonradan isə həmin şəxsin işlədiyim idarə tərəfindən tutularaq istintaqa verilməsi hadisəsi baş verib. Bununla bağlı özüm heç kimdən pul tələb etməmişəm və ya almamışdam, bu tamamilə yalandır. Ola bilsin ki, tutulmuş şəxs və antikvar əşyanın alındığı mağazanın sahibi izahat alınması üçün idarəmə gətirilib. Lakin bunu xatırlamıram. Həmin mağazanın sahibinin adının Əbil Vəzirov olduğunu da bilmirəm. Adı çəkilən şəxsdən 200.000 ABŞ dolları

gətirməyini, əks halda onu da Mişa kimi həbs eləməklə hədələməyim, bundan sonra aramızdakı razılığa əsasən ondan 80.000 ABŞ dolları məbləğində pul vəsaitini almağım mənə qarşı böhtandır”.

“200.000 ABŞ dolları məbləğində pul tələb etməmişəm”

General Bakı şəhəri Sabunçu rayon sakini Zakir Bədəlova qarşı yol verdiyi qanunsuzluqlar barədə göstərib ki, ərizəçini tanıyır: “Zakir Bədəlov barəsində Gürcüstandan şifahi olaraq bildirmişlər ki, Gücüstanda bir şəxsdən yarım kilo heroin tutulub və həmin şəxs heroinin Gürcüstan vətəndaşı, Bakı şəhərindən yaşayan Zakir Bədəlovdan alıb. İdarənin əməkdaşlarına Zakir Bədəlovun ətrafında işləməyi tapşırdım. Araşdırma nəticəsində məlum oldu ki, Zakir Bədəlov saxta şəxsiyyət vəsiqəsindən və xarici pasportdan istifadə edir. Narkotik vasitələrin qanunsuz dövriyyəsi ilə məşğul olması barədə sübut toplaya bilmədik. Təxminən 4-5 il bundan qabaq Zakir Bədəlovu yanıma gətiriblər və sonuncu ilə söhbət edərək MTN-lə əməkdaşlıq etməyi və narkotik vasitənin Gürcüstana ötürülmə kanalını və mənbəyini müəyyən etməkdə köməklik göstərməsini təklif etdim. O da narkotik vasitə ilə əlaqəsinin olmadığını dedi. Bundan sonra Zakir Bədəlovun saxta pasportunu Miqrasiya Xidmətinə göndərdim. Miqrasiya Xidmətindən Zakir Bədəlovun Azərbaycan Respublikası vətəndaşı olmaması və pasportunun saxta olması barədə məlumat gəldi. Rəhbəri olduğum idarədə toplanmış materiallar Daxili İşlər Orqanlarına göndərildi və Zakir Bədəlovun deportasiya olunması barədə qərar alındı. Lakin Zakir Bədəlov dərhal Gürcüstan vətəndaşlığından imtina etdiyindən,

Gürcüstan tərəfi sonuncunu qəbul etmədi. Ona görə də məhkəmə qərarı icra edilmədi. Bundan sonra Zakir Bədəlov mütəmadi şikayətlər etməyə başladı. Zakir Mustafayev adında şəxs tanımıram. Zakir Bədəlovdan hər hansı məbləğdə, yəni 200.000 ABŞ dolları məbləğində pul tələb etməmişəm. Zakir Mustafayevi tanımıram. Zakir Bədəlov Səlim Məmmədov vasitəsi ilə məndən qohumu Zakir Mustafayevi Milli Təhlükəsizlik Nazirliyində işə düzəltməsi üçün xahiş etməyib”.

“Mənzili mənə heç kim hədiyyə verməyib”

“Yeni Yasamal” və digər mənzil-tikinti kooperativlərinin həmtəsisçiləri Nəsib Əliyev və Cahangir Alışovdan hədə-qorxu ilə pul və daşınmaz əmlaklar alınmasına dair Akif Çovdarov bildirib ki, Nəsib Əliyevi, Əliheydər Şahmarovu, Elçin Həsənzadəni, Ceyhun Nağıyevi, Rauf Sultanovu tanımır: “Adları qeyd olunmuş şəxsləri ləğv edilmiş Milli Təhlükəsizlik Nazirliyinə hər hansı əməkdaş vasitəsilə çağırtdırmayıb. “Yeni Yasamal” MTK-nın Yasamal rayonunda inşa etdiyi hündürmərtəbəli yaşayış binasından 67, 122, 122A, 127, 130, 227 nömrəli mənzilləri və 1 ədəd 250 kv m qeyri-yaşayış sahəsini, eləcə də 2014-cü ildə Bakı şəhəri, Xətai rayonu, M.Hadi küçəsi 2337-ci məhəllə “Yüksəliş C” MTK-nın inşa etdiyi binada 179 saylı 3 otaqlı mənzili mənə heç kim hədiyyə kimi verməyib”.

“MTN-ə gətirilməsinə göstəriş verməmişəm”

Bundan başqa, Akif Çovdarov Rusiya Federasiyasının vətəndaşı Aydın Musayevin külli miqdarda pul vəsaitlərinin

ələ keçirilməsi epizodu üzrə də ifadə verib. O, Aydın Musayevi tanımadığını bildirib: “Akif Əliyevə Aydın Musayevin tutularaq MTN-ə gətirilməsi ilə bağlı göstəriş verməmişəm. Ola bilsin ki, Musayev Aydın Paşa oğlundan Akif Əliyevin idarəsində şikayət olub. Lakin şikayətin məzmunundan məlumatım yoxdur. Akif Əliyevin Aydın Musayevdən hər hansı məbləğdə pul almasından, sonuncuya hədə-qorxu gəlməsindən məlumatı olmayıb”.

Akif Çovdarov özünə məxsus evdən 3 ədəd dəyənəyin aşkar edilməsi, “Bəhrə-2010”, “Aqua Agro”, “RAF-2006”, “Nəzrin-E”, “Bozalt” məhdud məsuliyyətli cəmiyyətlərinin fəaliyyəti, idarəçiliyində iştirakı, rəsmi gəlir mənbələrinə uyğun olmayan çoxsaylı daşınmaz əmlaklara, qızıl-zinət məmulatlarına malik olması, plastik bank kartları ilə xarici ölkələrdə külli miqdarda pul vəsaiti xərcləməsi xüsusatları üzrə ifadə verməkdən və sualları cavablandırmaqlan imtina edib.