“Texnikabank”ın filial müdiri: “Məni MTN-də 8 saat qaranlıq otaqda saxladılar”

“Atam topladığı 350 min dolları Akif Çovdarova xidməti otağında verdi”

Ləğv edilmiş Milli Təhlükəsizlik Nazirliyi (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə məhkəmə prosesi davam edir.

Proses Bakı Hərbi Məhkəməsinin hakimi Həbib Həsənovun sədrliyi ilə keçirilir. Təhlükəsizlik tədbirləri ilə bağlı cinayət işinə hərbi məhkəmənin binasında yox, Sabunçu rayon Məhkəməsinin inzibati binasında baxılır.

“Texnikabank” ASC-nin Səbail rayon filialının keçmiş müdiri olmuş Elton Əliyev zərərçəkmiş şəxs qismində ifadə verib. Elton Əliyev bildirib ki, atası Nəsib Əliyev “Badu Kubə” MTK və “Şahbulaq” MTK-nın təsisçisi, eləcə də “Yeni Yasamal” MTK-nın həmtəsisçisi olub: “2007-ci ildə Azərbaycan İqtisad Universitetinin maliyyə-kredit fakultəsini bitirmişəm. Universiteti qurtardıqdan sonra “Texnikabank”ın Səbail filialında müxtəlif vəzifələrdə işləmişəm. 2008-ci ilin sonlarından 2010-cu ilin sonlarınadək “Texnikabank”ın Səbail filialının müdiri vəzifəsində işləmişəm. 2010-cu ildən yaşamaq üçün Moskva şəhərinə getmişəm”.

“Barəmdə istintaq aparılır”

Elton Əliyevin sözlərinə görə, 2013-cü ildə anası ona zəng edərək Suraxanı rayon polis idarəsi tərəfindən axtarıldığını bildirib: “Anam minim “Badu Kubə” MTK-nın inşa etdiyi Yeni Günəşli qəsəbəsinin V massivindəki yaşayış binasında olan mənzillərin təkrar satışında ittiham edildiyimi söylədi. 2015-ci ilin sentyabr ayının 2-də Moskva şəhərində hüquq mühafizə orqanları tərəfindən saxlanılaraq 8 aydan sonra Azərbaycana ekstradisiya edildim. Hazırda barəmdə Baş prokuror yanında Korrupsiyaya qarşı mübarizə Baş İdarəsində cinayət işinin istintaqı aparılır”.

“Məni MTN-ə aparanların adlarını xatırlamıram”

Elton Əliyev bildirib ki, 2007-ci ilin sentyabr ayında saat 11 radələrində o, metronun "Gənclik" stansiyasının yaxınlığında yerləşən Atatürk prospektindəki “Texnikabank”ın əsas filialının inzibati binasından iclasdan çıxarkən iki nəfər mülki geyimli şəxs ona yaxınlaşaraq Milli Təhlükəsizlik Nazirliyinə məxsus vəsiqələrini təqdim edib: “Nazirliyə getməli olduğumu dedilər. Həmin şəxslərin heç birinin əlamətlərini xatırlamıram, ancaq birinin kostyum geyindiyi, ucaboy və orta bədən quruluşlu olduğu yadımdadır. Hansı səbəbdən onlarla getməli olduğumu soruşdum. Hər şeyin nazirlikdə araşdırılacağını bildirildilər. Bundan sonra kostyum geyinmiş ucaboy əməkdaşla “Range Rover” markalı avtomobilimə əyləşdim. Digər əməkdaş isə öz avtomobili ilə gələcəyini bildirdi, lakin həyəcanlı olduğumdan həmin əməkdaşın avtomobilinə fikir vermədim. Onların adlarını da xatırlamıram”.

“MTN-də qorxutmaq üçün məni bir otağa saldılar”

Elton Əliyevin sözlərinə görə, MTN-nin Parlament prospektindəki əsas binasının yaxınlığına çatdıqda əməkdaş ona avtomobili nazirliyin nəzarət-buraxılış məntəqəsinin qarşısındakı şam ağaclarının olduğu yerdə saxlamağa göstəriş verib: “Orada çox sayda avtomobillərin olduğunu gördüm. Bundan sonra həmin

şəxslə nəzarət-buraxılış məntəqəsinə yaxınlaşdıq və şəxsiyyət vəsiqəmi, mobil telefonumu təhvil verdim. Nazirliyin əsas inzibati binasına gedərək köhnə liftlə xatırlamadığım mərtəbəyə qalxdım, liftdən çıxdıqdan sonra divanı olan geniş dəhlizə çıxdıq. Orada təxminən 5-10 dəqiqə gözlədik. Sonra məni gətirən kostyumlu əməkdaş harasa getdi, onu başqa əməkdaş əvəz edərək yanımda dayandı. Sonra məni masa və 3-4 ədəd stul olan otağa saldılar. Məni həmin otaqda təxminən 8 saat saxladılar, bu vaxt ərzində mənimlə heç kim ünsiyyətdə olmadı. Hansı səbəbdən nazirliyə gətirildiyimi bilmədən bu qədər vaxt otaqda saxlamaqla məndə qorxu hissi yaratdılar. Həmin gün hava qaraldıqdan sonra otağa orta boylu əlamətlərini xatırlamadığı qolugödək köynək geyinmiş bir əməkdaş daxil oldu. O özü ilə A4 formatlı kağız vərəq və diyircəkli qələm gətirdi. O, iş fəaliyyətimlə bağlı izahat almağa başladı”.

“Akif Çovdarov atamdan 100 min dollar tələb etmişdi”

Elton Əliyev bildirib ki, təxminən saat 22 radələrindən sonra həmin əməkdaş atası ilə bağlı suallar verməyə başlayıb: “Həmin şəxs atamla bağlı mənə suallar verilməyə başlandı. Həmin şəxslərin atam ilə maraqlandıqlarını başa düşmüşdüm. Çünki bundan 3-4 ay öncə, yəni 2007-ci ilin may aylarında atam “Badu Kubə” MTK-nın ofisində olarkən bir müştəri içəri daxil olaraq həmin MTK-nın inşa etdiyi Yeni Günəşli massivindəki hündürmətəbəli yaşayış binasından mənzil almaq istədiyini demişdi və ilkin ödənişi ABŞ dolları ilə verərkən ofisə MTN əməkdaşları daxil olmuşdular. Həmin MTN əməkdaşları MTK-nın sənədlərini apararaq atamı nazirliyə çağırtdırmışdılar. Akif Çovdarov atamdan 100.000 ABŞ dolları tələb etmişdi, atam isə 80.000 verə biləcəyini deyərək, 80.000 ABŞ dollarını Akif Çovdarova onun xidməti otağında vermişdi”.

“Məni MTN-ə atamdan pul almaq üçün gətiriblər”

Elton Əliyevin bildirdiyinə görə, atasından bir dəfə 80.000 ABŞ dolları alıblar: “Tam əmin oldum ki, məni MTN-ə atamdan pul almaq üçün gətiriblər. Söhbətin sonunda həmin əməkdaş mənə mobil telefon verərək atama zəng edərək nazirliyə gəlməsini deməyimi bildirdi. İlk öncə atama zəng etməkdən imtina etdim. Lakin həmin əməkdaş məndən təkidlə bunu tələb etdikdən sonra saat 24 radələrində atama zəng etdim. Atama telefonda MTN-ə gətirildiyimi, onun da həmin nazirliyə gəlməsinin tələb edildiyini bildirdim. Atam da MTN-ə gələcəyini dedi. Həmin vaxt telefonla danışdıqdan sonra həmin əməkdaş da atam ilə danışdı. Bundan sonra yenə də bir saat otaqda tək oturdum. Bir saatdan sonra gecə təxminən 2-yə işləmiş yanıma izahat alan əməkdaş və digər iki əməkdaş gəldilər. Onlar mənimlə artıq dostcasına söhbət etməyə başladı, sual-cavab etmədilər. Onların öz istədiklərinə nail olduqlarını başa düşdüm”.

“Atam daha ətraflı məlumat verə biləcək”

Elton Əliyev qeyd edib ki, təxminən gecə saat 02 radələrində onu həmin əməkdaşlardan biri nəzarət-buraxılış məntəqəsinə ötürüb: “Şəxsiyyət vəsiqəsimi və mobil telefonumu götürərək dərhal evə getdim. Evdə atamın mənim arxamca MTN-ə getdiyi bildirdilər. Çox yorğun olduğumdan yatdım. Səhər atam MTN-dən buraxılmağım üçün Akif Çovdarovun 500.000 ABŞ dolları istədiyini, özünün isə 350.000 ABŞ dolları verə biləcəyini dedi. MTN-dən buraxıldığım gecənin səhərisi atam bacanağı Elçindən 100.000 ABŞ dolları, tanışı Yavərdən 150.000 ABŞ dolları, Mübariz Xudayevdən 100.000 ABŞ dolları borc aldı. Atam günorta saat 16 radələrinə kimi pulu topladı, həmin gün apararaq Akif Çovdarova xidməti otağında verdi. Bunları mənə atam danışıb. Bundan sonra MTN əməkdaşları ilə mənim hər hansı

münasibətim olmayıb. Atam Nəsib Əliyev isə Elçin, Rauf və Ceyhun adlı şəxslərin şikayəti ilə 2010-cu ildə yenidən MTN-ə çağırıldı. Bu barədə atam daha ətraflı məlumat verə biləcək”.

Aslan
gundemxeber.az