O halda sual oluna bilər ki, ünvanlı sosial yardıma “möhtac qalan” Məlahət Qarayeva, ödənilən təhsil haqqını necə əldə edə bilir?

DSMF-nun Balakən rayon şöbəsində davam edən biabırçılıq, artıq bir çox media qurumlarına da yol tapıb. Düzdür, adı çəkilən qurumda qol qoyulan qanunsuzluqlarla bağlı, hələ ötən il də müəyyən açıqlamalar dərc etmişdik. İşıq üzü görən məqalələrdə DSMF Balakən rayon şöbəsinə rəhbərlik edən vəzifə sahibi ilə bərabər, adı çəkilən şöbədə “inspektor” vəzifəsini daşıyan Kifayət xanımın da əməlləri xüsusi qabardılırdı. Maraqlı hal odur ki, Balakən şöbəsi haqda silsilə tənqidi məqalələr dərc olunsa da, həmin qurumda çalışan vəzifə sahibləri bu gün də çirkin əməllərindən əl çəkmək istəmirlər. Bu haqda məlumatları “Gündəm Xəbər”ə çatdıran və Balakən rayonu Talalar kənd sakini olan Qarayeva Dünya Əsməndər qızı bildirir ki, “hal-hazırda adı çəkilən şöbədə Kifayət xanım yenə də “firon”luq etməkdədir. Belə ki, o, adı çəkilən kəndin sakinləri Qarayeva Məlahət Əsildər qızına və Bodurova Sevinc Əsməndər qızına hansısa maraqları çərçivəsində ünvanlı sosial yardım “düzüb-qoşa bilib”. Amma, onu da unutmaq olmaz ki, Məlahət Qarayevanın iki oğul övladı var və onlardan biri müəyyən yollarla hərbi xidmətdən “komsavat” olsa da, digəri Qarayev Renat Fərhad oğlu, bu gün ali təhsil müəssələrindən birinin Zaqatala filialında təhsilini davam etdirməkdədir. Övladının təhsili ilə bağlı hər il Məlahət Qarayeva, ildə 1000 manat təhsil haqqı da ödəyir. O halda sual oluna bilər ki, ünvanlı sosial yardıma “möhtac qalan” bu xanım, ödənilən təhsil haqqını necə əldə edə bilir?”
Şikayətçi xanım onu da vurğulayır ki, ünvanlı sosial yardıma “möhtac qalan” Məlahət Qarayevanın oğlu Renat Qarayev, hal-hazırda Zaqatalada ilahiyyət təhsili alır və ara-sıra qardaş Türkiyə dövlətinə də gedib-gəlir. O halda ehtimal etmək olar ki, bəlkə də o, hansısa dini ekstremist cərəyanın üzvləri ilə işbirliyində də olur”. Düzdür, belə bir fikir qarşı tərəfdən səslənsə də, faktın doğruluğunu tam isbat yetirmək üçün ortada hər hansı əsas olmadığından, hələlik nəsə deyə bilmərik.
Dünya Qarayeva onu da vurğulayır ki, “Balakən şöbəsində “inspektor” vəzifəsini daşıyan Kifayət xanım bu cür əməl sahibi olduğundan, o, indiyə kimi neçə-neçə şəxslərə saxta yollarla ünvanlı sosial yardım “düzüb qoşa bilib”. Onun atdığı addımlarının nəticəsi olaraq, dövlət büdcəsinə indiyə kimi külli miqdarda ziyan da dəyib. Əgər qanuni əsaslarla araşdırmalar aparılarsa, o halda nəinki Qarayeva Məlahət Əsildər qızına və Bodurova Sevinc Əsməndər qızına verilən ünvanlı sosial yardımları geri qaytarmaq zərurəti yaranar, hətta onlar haqqında hüquq-mühafizə orqanı əməkdaşları tərəfindən cinayət işinə başlamaq zərurəti də yaranar. Kifayət xanım rüşvət istədi, verə bilmədiyim üçün o, mən ünvanlı sosial yardımı “düzüb qoşmadı”. Yəni, mən onun marağını təmin edə bilmədim. Bəli, bu gün Balakəndə ünvanlı sosial yardımlar hansısa maraqlar çərçivəsində “düzülüb qoşulur”. Əgər vəzifə sahiblərinin maraqları təmin olunmursa, deməli ünvanlı sosial yardım üzü görə bilməzsən”.
Araşdırmamız davam edəcək.