Heç bir vəzifə sahibinə ixtiyar verilməyib ki, atılan addımları əlində bayraq etməklə bütövlükdə medianı aşağılasın

Son günlər bir neçə qəzet baş redaktorunun həbs olunması, ictimai arenada ciddi müzakirələrin əmələ gəlməsinə də səbəb oldu. Baş verənlərlə bağlı bir çox media qurumlarında müəyyən açıqlamalar işıq üzü gördü və fərqli fikirlər də səsləndi. Bu da onu söyləməyə əsas verir ki, atılan addımlarla bağlı hələ bundan sonra da lazımi təhlillərin aparılmasına ehtiyac var. Bəli, qanudankənar atılan hər bir addım yolverilməzdir və bununla bağlı lazımi tədbirlər də həyata keçirilməlidir.

Maraq kəsb edən hal odur ki, bu gün əksər vəzifə sahibləri atılan addımları əsas tutmaqla, sanki KİV nümayəndələrinə qarşı “səlib yürüşü”nə başlayıblar. Yəni, onlar qol qoyduqları qanunsuzluqları, minbir maxinasiyaları və s. ört-basdır etmək üçün, elə hallar olur ki, media təmsilçilərinə hədə-qorxu gəlirlər, ünvanlanan sualları cavablandırmaq belə istəmirlər. O halda ortaya çoxsaylı suallar çıxır ki, onlardan biri də, bir media nümayəndəsinin digərinin əməllərinə cavabdehlik daşıyıb daşımaması məsələsidir. Məsələyə hüquqi nöqteyi-nəzərdən yanaşsaq o da aydın olar ki, hər kəs öz əməllərinə görə cavabdehlik daşıyır. Belə olan halda vəzifə sahiblərinə kimsə ixtiyar verməyib ki, baş verənləri əlində bayraq tutsun və KİV nümayəndələrini aşağılasın. Hətta, onların ünvanına təhqiredici ifadələr işlətməkdən belə çəkinməsin. Bu haqda məlumatları “Gündəm Xəbər”ə çatdıran bir neçə media təmsilçisi bildirir ki, “Şəmkir rayon notariat kontorunun notariusu vəzifəsini daşıyan Siyavuş müəllim, bu gün atdığı belə bir addımları ilə adını dillər əzbəri etməkdədir”. Hələlik adlarının çəkilməsini istəmədiyimiz həmin şəxslərin bildirdiklərinə görə, “bu ilin 15 dekabr günü adı çəkilən notariat kontorunda olduq. Məqsədimiz Siyavuş müəllimə bir neçə suallarımızı ünvanlamaq və sakinlərə göstərilən notariat xidməti ilə bağlı lazımi məlumatları əldə etmək idi. Elə ki, həmin günün səhər saatlarında Siyavuş müəllim bizi gördü, o halda “sizi bir-bir tutub dama soxurlar” deməsi, açıq-aydın şəkildə onun KİV nümayəndələrinə qarşı qərəzli yanaşma nümayiş etdirməsini sübut etdi”.

Odur ki, son günlər həyata keçirilən davamlı həbslər, sanki bəzi vəzifə sahiblərinə stimul verib. Həmin vəzifə sahiblərindən biri də, Şəmkir rayon notariat kontorunun notariusu vəzifəsini daşıyan Siyavuş müəllimin olduğu bildirilir. Amma, o halı da unutmaq olmaz ki, bir media nümayəndəsi digərlərinin əməllərinə heç bir halda cavabdehlik daşımır. Heç bir vəzifə sahibinə də ixtiyar verilmir ki, atılan addımları əlində bayraq etməklə bütövlükdə medianı aşağılasın. Hətta, o halı da unutmaq olmaz ki, bu gün Azərbaycan mediasında dəyərli açıqlamaları ilə xüsusi

iz buraxan, mətbuatımızı yaşadan, əsl həqiqətləri üzə çıxaran çoxsaylı qələm əhli var. Onların yaradıcılığına qiymət vermək, zəhmətlərini dəyərləndirmək və s. hər kəsin, o cümlədən Siyavuş müəllimin də vətəndaş borcu olmalıdır. Qarşı tərəfi də dinləyə bilərik. Mövzunu diqqətdə saxlayacağıq.

Mirzə

gundemxeber.az