Le Huffington Post: "Münaqişəsi heç də köhnəlməyib, əksinə hər an alovlana bilər"

"Deyirlər ki, sülhün əldə edilməsi üçün iki tərəfə ehtiyac var. Dağlıq Qarabağ münaqişəsinə gəlincə isə deyəsən burada 3 tərəf olmalıdır.”

İstiPress-in məlumatına görə, bunu Avropada təhlükəsizlik və proqnozlaşdırma institutunun prezidenti, professor Emmanyuel Dyupon Le Huffington Post qəzetində dərc edilən məqaləsində bildirir.

Məqaləsində ermənilərin Azərbaycan ərazisi olan Dağlıq Qarabağda Xocalı soyqırımını törətməsini xatırladan müəllif qeyd edir ki, SSRİ-nin dağılmasından sonra Cənubi Qafqazda sabitlik pozuldu, münaqişə ocaqları yarandı.

Müəllif qeyd edir ki, 1994-cü il mayın 12-də Dağlıq Qarabağda atəşkəs barədə razılıq əldə olunub, uzun müddət keçib və münaqişə köhnəlmiş görünə bilər.

"Amma 2011-ci ildən Qarabağda hərbi toqquşmalar fəallaşdı, 2014-cü ildə bu, bir az da genişləndi. Ötən ilin aprel ayında isə 4 günlük müharibənin baş verməsi, çoxsaylı itkilərin qeydə alınması isə onu göstərir ki, Dağlıq Qarabağ münaqişəsi heç də köhnəlməyib, əksinə hər an alovlana bilər”, - deyə E.Dyupon qeyd edir.

Müəllifin sözlərinə görə, bu gün münaqişə həlli Moskva, İstanbul, Tehran, Vyana və ATƏT-in mənzil qərargahındadır.

Məqalədə qeyd olunur ki, Rusiya prezidenti Vladimir Putin 2013-cü ilin martında və ötən ilin sentyabrında Sankt-Peterburqda iki düşmən tərəfi öz bayrağı altında birləşdirdi.

"Ermənistanın Kollektiv Təhlükəsizlik Müqaviləsi Təşkilatına üzv olması münaqişədə müəyyənedici faktordur. Ermənistan 2008-ci ildən KTMT-nin üzvüdür və müasir sistemli silahlardan istifadə edir. Burada "İsgəndər” raketlərini də qeyd etmək olar. Azərbaycanın isə belə güzəştlərdən istifadə etmir. Bakı Ermənistana havayı verilən silahları pul ödəyərək alır. Ümumiyyətlə, Moskvanın münaqişə zonasında vəziyyəti dəyişmək üçün təsir vasitəsi var. Rusiya Azərbaycana da təsir edir, hətta KTMT-nin tərkibinə də daxil etmək istəyir. Bakı isə buna imkan vermir. Bir sözlə, Moskva münaqişənin öz əhatəsində həll edilməsində maraqlıdır”, - məqalədə deyilir.

Müəllifin sözlərinə görə, Azərbaycan və Ermənistan prezidentlərinin tezliklə əlverişli vəziyyətdən istifadə imkanı yaranacaq, məntiqə uyğun olmayan müharibə bəyanatları verilməsindən qaçınılacaq.

"Qeyd etdiyim kimi Rusiya münaqişənin həllində mühüm rol oynayır. Sülh razılaşmasının əldə olunması üçün 2 tərəf olmalıdır. Lakin Dağlıq Qarabağ münaqişəsində üçüncü tərəf də iştirak edir. Çünki bu oyunda top Moskvanın meydançasındadır”, - Dyupon qeyd edir.