“Milli Şura öz hədəflərinə çatacaq və ölkədə xalqın hakimiyyəti konstitusiya uyğun olaraq bərqərar olacaq”


“İlham Əliyevin seçkilərdə iştirak qərarı verib-vermədiyi bəlli deyil. Bu hakimiyyətin qətiyyən fərqli qərarlar qəbul edəcyini mən istisna etmirəm.”


Bu gün Müsavat Partiyasının başqanır bir neçə media qurumunun əməkdaşı üçün brifinq keçirib. Brifinqdə partiya başqanı jurnalstlərin suallarını cavablandırıb:
Müsavat qəzetinin əməkdaşı Etibar Seyidağa: Milli Şuranın tərkibinin 129 nəfərdən olduğu bəlli oldu. Və təsis toplantısında həmin yayılan siyahı təkzib edilmədi. Bəzi insanlarda belə fikir var ki, siyahı həddən artıq çoxdur, bəziləri bildirdilər ki, bu azdır, daha da genişlənməlidir. Sizin bu məsələ ilə bağlı danışıqlarda mövqeyiniz necə olub?
İsa Qəmbər: Bizdə ilk dəfə ifadə ediləndə 50 nəfər ideyası səslənmişdi. Biz də bunu məqbul hesab etmişdik. Hesab edirik Demokratik Qüvvələrin Milli Şurasının 50 nəfərdən ibarət olması yaxşı olardı. Amma sonra burada təmsil olunmaq istəyən qüvələrin çoxluğu və müzakirələrin gedişi ona gətirib çıxardı ki, siyahı böyüməyə başladı. Siyahı müəyyən 75-80 rəqəmini keçəndən sonra sözün doğrusu onu məhdudlaşdırmaq kifayət qədər çətin idi. Ona görə də biz artıq say məsələsinə o qədər diqqət yetirməyib cəmiyyətin bu hakimiyyətin dəyişməsini istəyən qüvvlərinin bir araya gəlməsini təmin edəcək varianta üstünlük verdik. Alınan rəqəm də 129 oldu. Orada bir nəfərlə bağlı anlaşılmazlıq oldu. Hətta bəzi media strukturları yazdılar ki, Hacı Abgül Milli Şuradan çıxıb. Çıxmaq söhbəti yox idi. Sadəcə siyahıya təkliflər var idi. Bir sıra siyasi məhbuslarımız o cümlədən Hacı Abgül də siyahıya təklif olmuşdu. Sadəcə olaraq o, həbsdə olduğu üçün onun bu məsələyə münasibəti bir az gec aydınlaşdı və bir qədər açıq qaldı. O da yəqin ki mövqeyini dəqiqləşdirəndən sonra üzvlük məsələsinə son yekun mövqeyini bildirəcək. Siyahıda 10-a yaxın siyasi məhbus var. Bu da ölkədə nə cür mürəkkəb bir şəkildə seçkilərə hazırlığın getdiyinin əlavə təzahürüdür.
“Deyerler.org” saytının əməkdaşı: Rüstəm İbrahimbəyov ayın sonuna kimi ölkəyə qayıda bilməsə, Milli Şura ilə bağlı məsələ necə olacaq?
İsa Qəmbər : Rüstəm İbrahimbəyov özü bəyan edib ki, ayın sonunda Azərbaycana dönəcək. Biz də bu informasiyanı qəbul edərək bunun əsasında sonrakı fəaliyyətimizi planlaşdırmağa üstünlük veririk.
Etibar Seyidağa: Milli Şuranın prezidentliyə namizədi ən çox müzakirə olunan məsələdir. Elə təqdim olunur ki, sanki hər şey bundan asılıdır. Siz necə hesab edirsiniz hər şey, yoxsa çox şey bu məsələdən asılıdır? Burada ən çox sizin və Rüstəm İbrahimbəyovun adı çəkilir. Siz Rüstəm İbrahimbəyova hansı şərtlər daxilində güzəştə gedə bilərsiniz?
İsa Qəmbər: Mən şərtlər və güzəştlər kimi terminlərdən istifadə edilməsinin tərəfdarı deyiləm. Bir az məsələyə daha olumlu baxmaq lazımdır. Milli Şura ölkənin demokratik ictimaiyyətinin seçkilərdə vahid strategiya, vahid platforma ilə iştirak etməsi üçün yaradılıb. Biz ölkədə hakimiyyəti dəyişmək istəyirik. Bunu da dinc yolla həyata keçirmək istəyirik. Bunun üçün də demokratik qüvvələrin vahid platforması və strategiyasına ehtiyac var. Eyni zamanda aydın məsələdir ki, vahid strategiya və platformaya malik koalisiya seçkilərdə bir namizədlə iştirak etsə, daha məntiqli olar. Və bu situasiyada məntiqli namizəd müstəqil intellektuallardan biridir. Və ilk növbədə Rüstəm müəlimdir. Çünki Milli Şura ideayası da ondan gəlib. Biz də bu ideyanı qəbul etmişiksə, Rüstəm müəllimin Milli Şuranın vahid namizədi olması tamamilə mümkündür. Və hətta müxtəlif vaxtlarda müxtəlif adlar da işarə etmişik. Bu baxımdan tamamilə gözlənilən konsepsiyadır. Sadəcə olaraq bu avtomatik həll olunan bir məsələ deyil. Bunun üçün ciddi müzakirələr olmalıdır. Söhbət iki illik bir keçid müddətindən gedir. Milli Şuranın namizədi müəyyənləşib iki illik keçid dövrü üçün ona tam səlahiyyət verilməsindən və həmin iki il ərzində ölkədə çox ciddi islahatlar aparılmasından gedir. Söhbət konstitusiya, seçki, prezident respublikasından parlamentli respublikaya keçid üçün çox ciddi addımlardan gedir. İki illik keçid müddətinin sonunda seçkilər keçirilməlidir. Parlament seçkilərində qalib gələn siyasi qüvvə ya da qüvvələr koalisiyon hökümət formalaşdırmaq səlahiyyətinə malik olmalıdır. Bu konsepsiyanı tamamilə normal hesab edirik. Amma bu konsepsiya ilə bağlı namziəd olacaq şəxs bu məsələlərlə bağlı söhbətlərdə iştirak etməlidir. Müsavat Partiyası ölkədə gedən bütün proseslərdə xalqın gələcəyi üçün məsuliyyət daşıyan qüvvə hesab edir. Aydın məsələdir ki, belə bir qüvvə ciddi danışıqlar olmadan razılaşmalar öhdəliklər olmadan bu cür mühüm məsələlərdə xalqa son sözünü də demək fikrində deyil. İnşallah Rüstəm müəllim də vətənə dönəndən sonra bu məsələlər müzakirə olunacaq. Müzakirələrin sonunda mən inanıram ki, müsbət qərarlar qəbul edə biləcəyik.

Etibar Seyidağa: Eyni zamanda Rüstəm müəllim müsahibələrində bu məsələyə də işarə vurur ki, mənim özümüm namizədim var. Əgər özü razılaşmasa və 129 nəfərin siyahısından bir nəfərin namizədliyini irəli sürsə onda vəziyyət necə olacaq. Məndə olan məlumata görə Rüstəm İbrahimbəyov Lalə Şövkətin namizədliyini irəli sürmək istəyir.

İsa Qəmbər: Bu ehtimallar silsiləsindəndir. Əgər Rüstəm müəllim özünün yox, başqa namizədi təklif edəcəksə, həmin şəxs də müzakirə oluna bilər. Bu o demək deyil ki həmin şəxs avtomatik şəkildə vahid namizəd olacaq. Bu çox ciddi müzakirələrdən keçəcək.

Günel Türksoy: İsa bəy, özünüz də qeyd etdiniz ki, iki illik keçid hökuməti qurulacaq. Ondan sonra seçkilər keçiriləcək. Yəni xalq özü bu proseslərdə iştirak edəcək. Özü seçəcək ki, qərbə, yaxud Rusiyaya və yaxud Türk dünaysına inteqrasiya olunmaq istəyir. Bu xalqın öhdəliyində olan məsələdir. Ona görə də indidən bəyannaməyə salınıb müzakirə olunan avroatlantik məkana inteqrasiya məsələsi sonranın işi deyilmi?

İsa Qəmbər: Əvvəla Türk dünyası ilə Avroatalantik məkana inteqrasiya arasında ziddiyyət yoxdur. Türkiyə özü də NATO-nun üzvüdür. Avroatlantik məkan deyildikdə də ilk növbədə bu qurumdan söhbət gedir. İkincisi ciddi qüvvələr hər hansı yeni addım atarkən yeni quruluş formalaşdırarkən öz hədəflərini müəyyənləşdirməlidir. Həmin məntiqlə konstitusiya islahatı üçün də referendum keçirilməlidir, elə deyilmi? Xalq orada öz mövqeyini müəyyənləşdirəcək ki, məsələn prezidentli respublikadan parlamentli respublikaya keçmək istəyirmi? O halda biz bunu da bura yazmayaq? Biz ciddi bir qüvvə formalaşdırırıq. Və bu öz öncəlikləri xalqa təqdim etməlidir. O istiqamətdə təbliğatını qurmalıdır. Və zamanı yetişəndə hansı məsələsini referendumla, hansını başqa yolla həll etmək barədə qərarlarını qəbul etməlidir. O baxımdan mən burada bir məntiq görürəm ki, ciddi qüvvələr bir araya gələrək özünü xalqa, dünyaya Əliyev rejiminə qarşı alternativ qüvvə kimi təqdim edərkən özlərinin əsas hədəflərini və prinsiplərini də bəyan etməlidirlər. Bura təkcə daxili yox, xarici siyasətin də əsas istiqamətləri daxildir.

Günel Türksoy: Nizamnamə bu şəkildəmi olacaq? Yəni iki illik keçid dövründən sonra Milli Şurada birləşən qüvvələr yenidən öz partiyalarının mövqelərinə qayıdacaq. Bundan sonra xalq hansı partiyanın mövqeyini dəstəkləyəcəksə o iqtidarmı olacaq?

İsa Qəmbər: Hər şey yaxşı getsə, mən inanıram ki, iki illik müddətin sonunda seçkilər keçiriləcək. Və seçkilərdə hansı partiyalar hansı namizdələr hansı şəkildə iştirak edəcəyi gələcəyin söhbətidir. Elə bir seçki olanda təbii ki, xalq da hər bir patiyanın namizədinin palatformasına, təkliflərinə mövqeyinə nəzər yetirib qərarlarını qəbul edəcək. Və müəyyən məsələlər var ki, onlar yalnız referendum yolu ilə həll edilə bilər. NATO özü də öz sıralarına qəbul olunmaq istəyənlər üçün həmin ölkələrdə referendum keçirir. Çünki burada prinsipaial məsələlərdə xalqın mövqeyi olmalıdır. Yalnız bir qüvvə, hakimiyyət bunu edə bilməz. Hansı məsələlər ki, iki illik keçid dövründə həll olunacaq, hansılar ki, sonradan həll olunmalıdır, onlar müəyyənləşdirilicək. Təbii ki, son söz bütün məsələlərdə xalqındır.

“Deyerler.org” əməkdaşı: İctimai Palata yarananda əsas hədəfi parlament seçkilərinin ləğv olunması idi, amma buna nail ola bilməyib. Milli Şuranın da əsas hədəfi prezident seçkilərində iştirak edib qalib gəlməkdir. Son 20 ildə Azərbaycanda seçkilərin ədalətli keçirilmədiyi nəzərə alsaq, Milli Şura mübarizəsi necə olacaq?

İsa Qəmbər: Milli Şura bir neçə gündür ki, təsis olunub. Özünün əsasnaməsini və ilk sənədlərini qəbul edib. Bizim hədəfimiz seçkidə dinc yolla, xalqın dəstəyi ilə qalib gəlib dediyimiz islahatlar proqramına başlamaqdır. Həmin seçkidən sonrakı dövrlə bağlı bizim qalib gələcəyimiz təqdirdə hansı addımlar atacağımız bəllidir. Nəzəri cəhətdən uğur olmayacağı ehtimalı var. Ancaq mən buna böyük ehtimal vermirəm. Çünki dünayada və ölkədəki vəziyyət elədir ki, hakimyyətin dəyişməsi zaman məsələsidir. Mən əminəm ki, Milli Şura öz hədəflərinə çatacaq və ölkədə xalqın hakimiyyəti konstitusiya uyğun olaraq bərqərar olacaq.

“Azadlıq” radiosunun əməkdaşı Turxan: Azərbaycanın gələcəyi üçün Milli Şurada hansı baxışlar üst-üstə düşür və yaxud düşmür. Sizin çıxışınızdan belə görünür ki, hər şey yolunda gedir. Narazılıq doğuran baxışlar varmı?

İsa Qəmbər: Hamının fikri eynidir ki, xalqın hakimiyyəti bərqərar olunmalıdır. Bu Milli Şuranın üzərində dayandığı əsas birinci müddəadır. İkincisi, hamı bunun dinc və seçki yolu ilə baş verməsini istəyir. Bu da mühüm iddiamızdır. Üçüncüsü də əgər bu bəyannamə qəbul olunubsa və bunu da hər kəs imzalayıbsa, deməli hər kəs ölkədə prezident respublikaslıdan parlament respublikasına keçidi zəruri hesab edir. Bir sıra digər məsələlərdə yekdil mövqe var. Xarici siyasətlə bağlı məsələ bir qədər kompromis şəkildə göstərildiyi üçün bu o deməkdir ki, o məsələdə diskusiyalar hansısa mərhələdə yenə olacaq. Siz özünüz də görürsünüz ki, əksəriyyət Avroatlantik məkan inteqrsiyanın tərəfdarıdır. Hətta müddəanın bəyannamədə göstrəilməsinə razı olmayanlar da göstərir ki, onlar buna tərəfdardırlar, amma hansısa taktiki məqsədlər üçün həmin müddəanın orda olmasına maraq göstərmirlər. Müsavatın mövqeyi isə Avroatlantik məkana inteqrasiya qonşularla sıx qarşlıqlı şəkildə əməkdaşlığın tərəfadarıdır. Bu Rusiya kimi böyük dövlətlərə, Gürcüstan kimi kiçik dövlətlərə də aiddir. Bütün dövlətlərələ qarşlıqılı dostluq münasibətlərinin olmasını istəyirik.
Etibar Seyidağa: Hakimiyyət tərfədarları hətta ölkə prezidenti də çıxışlarında Milli Şuranın kənar xarici qüvvələrin tapşırığı ilə yaradıldığı deyilir. Xüsusilə Rusiyanın adı hallanır. Fakt odur ki, cəmiyyətdə də belə fikir formalaşıb. Bundan qurtulmaq üçün Milli Şura nə etməlidir? Və sizin illərdir bir yerdə olduğunuz Pənah Hüseyn kimi şəxslərin Milli Şurada olmamasının arxasında bu cür məsələlərin dayandığı deyilir.

İsa Qəmbər: Hakimiyyət bu gün özünün o qədər qeyri-ciddi duruma salıb ki, onun dediklərinə əhəmiyyət verməyin mənasını görmürəm. Təsəvvür edin ki, demokratik düşərgəni vətəndaş cəmiyyətini Ermənistanla əməkdaşlıqda ittiham edirlər. Ermənisrtan və onun qurumları ilə əməkdaşlığı inhisara alan qanun qəbul edirlər. Sonra da bəyan edirlər ki, biz sözsüz Ermənistana qaz verə bilərik. Özü də sözsüz. Heç olmasa deyilsə ki, biz müəyyən şərtlər daxilində müzakirə edə bilərik. O qədər uğurlu ifadə olmasa da bunu qiymətləndirmək olar. Amma adam deyir ki, Ermənistan bizə müraciət etsə sözsüz onlara qaz verə bilərik. Həmin qüvvədir ki, Türkiyə Ermənistan sərhədlərinin açılması məsələsində eyni mövqeyi ifadə etmişdi. Həmin qüvvədir ki, müxalifətdən kimsə Ermənistanın nümayəndəsi kimi salamlaşırsa bunu az qala milli xəyanət adlandırırlar. Belə bir qüvvənin xarici qüvvələrlə əməkdaşlıq istiqamətində böhtanları kimə maraqlı ola bilər? Yəni bəlli deyilmi ki Rusiyanın proyekti bu hakimiyyətin özüdür. Bu hakimiyyət 1993-cü ildə də Moskvanın dəstəyi ilə iqtidara gəlib. 2003- cü ildə də Moskvanın dəstəyi ilə hakimyyətdə qala biliblər. Ona görə də belə bir qüvvənin Milli Şuranı bu barədə ittiham etməsinin məntiqi yoxdur. Sadəcə Milli Şura ölkədə köklü demokratik dəyişiklikllər hədəfini müəyyənləşdirən ciddi bir qüvvə mərkəzidir. Və təbii ki o beynəlxalq birlyin bu məsələlərə ən azından loyal yanaşmasında maraqlıdır. Biz dəfələrlə bəyan etmişik ki, beynəlxalq birlik avtoritar rejimə dəstək verməməlidir. Odur ki hakimiyyətin bu çıxışları ifadələri bizi çox ilgiləndirmir. Milli Şuranın Azərbaycanın maraqlarını müdafiə edəcəyinə əminik. Etməyəcəyi təqdirdə aydındır ki, Müsavat Partiaysı və digər partiyalara belə bir birlikdə fəaliyyət göstərə bilməzdilər.

Turxan Qarışqa: YAP-nın qurultayını izlədinizmi?

İsa Qəmbər: İzləməyə çalışdım. İnformasiya kifayət qədər məhduddur. Mənim diqqətimi cəlb edən o oldu ki, İlham Əliyevin özünün prezident mövzusunda çıxışını, fikrini görmədim. Bilmirəm, bəlkə mənim diqqətimdən yayınıb. Siz bu məsələləri diqqətlə izləyən professionallarsınız. İlham Əliyev qurultayda onun prezidentliyə namizədlyinin irəli sürülməsi ilə bağlı dediyi bir kəlmə varmı? Prezidentlik seçkilərində iştirakla bağlı özünün iradəsi, işlətdiyi söz , mövqe varmı? Qurultayın sonunda prezident seçkilərinə namizəd kimi, həm də YAP-ın sədri kimi seçilməsindən sonra bildirdi ki, etimadınıza görə təşəkkür edirəm və etimadınızı doğruldacam. Orda da prezident seçkilərinə namizəd olacam cümləsi varmı? Ona görə də mən hesab edirəm ki, YAP öz namizədini müəyyənləşdirdi fikri məhz YAP-a aiddir. Amma İlham Əliyevin seçkilərdə iştirak qərarı verib-vermədiyi bəlli deyil. Bu hakimiyyətin qətiyyən fərqli qərarlar qəbul edəcyini mən istisna etmirəm.

Etibar Seyidağa: Sizcə seçkilərə az qalmış namizəd dəyişə bilərmi?

İsa Qəmbər: Bilirsiniz, bu məsələ həm hakimiyyətə, həm də demokratik düşərgəyə aiddir. Biz Müsavat Partiyası olaraq təxminən 2005-ci ildən bu tərəfə nizamnaməmizdə və prosedurlarımızda müəyyən bir dəyişiklik etdik. O vaxta qədər Müsavat Partiyasında da kim istəyirdisə, başqa birinin namizədləyini irəli sürürdü. Sonra səsvermə olurdu. Namizəd olmaq istəyən deyirdi ki, heç mən seçkidə uğur qazanmaq istəmirdim. Mənim adımı siyahıda niyə saxlamısınız ki? Bu cür söhbətlər cəmiyyətdə geniş yayıldığı üçün biz dəyişiklik etdik. Və artıq o ildən bəri Müsavat Partiyasında heç kim heç kimin namzidəlyini irəli sürmür. Vakansiyalar elan olunur ki, hansı iclasda qurultayada hansı vəzifələrə seçki keçirilicək, kim o vəzifəni tutmaq istəyirsə rəsmən 10 gün qalmış ərizə ilə müraciət edir. Ona görə də prezident seçkisi təkcə partiyanın rəhbərliyində yer tutmaq deyil. Azərbaycanda xalqın taleyinə cavabdehliyi məsuliyyəti öz üzərinə götürməkdir. Ona görə də həmin şəxs bu yükü öz üzərinə götürdüyünü rəsmən bəyan etməlidir. Yoxsa YAP-ın “xalq məni istəyir” kimi nəğmələri hesab edirəm ki, o qədər də uğurlu yanaşma forması deyil.

Turxan Qarışqa: Eyni zamanda prezident çıxışında qeyd etdi ki, müxalifət liderlərindən naftalin iyi gəlir. Bu yanaşmanı necə dəyərləndirirsiniz?

İsa Qəmbər: Yəni biz də hərdən deyirik ki, bu hakimiyyəti birdəfəlik tarixin arxivinə göndərəcəyik. Onlar da bu sözdən qıcıqlanır əks cavablar verirlər. Kimin naftalin iyi verdiyini, kimin isə yenilikçi olduğunu şəxslər özləri müəyyənləşdirə bilməzlər. Mən düşünmürəm ki, hakimiyyətdə iybilmə qabiliyyəti bu qədər yüksəkdir. Bu cür məsələlərə xalq qiymət verməlidir. Normal azad və ədalətli seçki olmalıdır. Həmin seçkidə xalq kimi istəyirsə, onu hakimiyyətə gətirməlidir, istəmədiyini də tarixin arxivinə göndərməlidir. Hansısa qüvvəyə isə deməlidir ki sən bir müddət müxalifətdə dayan sonra baxarıq.

Günel Türksoy: Demokratik seçki mühitinə nail olmaq üçün Milli Şura hansı işləri həyata keçirəcək?

İsa Qəmbər: Çox düzgün sualdır. Bəzən cəmiyyətdə belə bir fikirlər əmələ gəlir ki, Milli Şura yarandısa, deməli, bitdi. Əksinə, Milli Şura yarandı və iş başlamalıdır. Mübarizənin yeni bir mərhələsi başlayır. Və bu mərəhələ də Milli Şurada təmsil olunan bütün şəxslər, onların ətrafındakı qüvvələr və Milli Şuraya dəstək vermək fikrində olan bütün cəmiyyət ölkədə demokratikləşmə istiqamətində öz mövqelərini ortalığa qoymalıdırlar. Fədakarlıqlarını nümayiş etdirməlidirlər. Bu mübarizədən keçəcək. Burda hesab edirəm ki, dinc kütləvi xalq hərəkatına ehtiyac var. Bu hərəkatı Milli Şurada toplaşmış qüvvələr bir yerdə təşkil etməlidir.

Tofiq Türkel: Siz çıxışlarınızda qırmızı xəttə qədər əməkdaşlığını qeyd etmişdiniz. O fikir qüvvədə qalıbmı?

İsa Qəmbər: Təbii ki... Müsavat Partiyası ölkənin bu gününə gələcəyinə məsuliyyət daşıyan bir qüvvədir. Siyasi ideologiyası olan partiyadır. Milli Şura da bu dəyərləri qəbul edir.

Tofiq Türkel: Prezident çıxışında qeyd edib ki, sanki müxalifətin daxilində iki qüvvə var. Bildirib ki, əsassız olaraq hakimiyyət uğrunda mübarizə aparan və bizim aramızda yeri olmayan, “molotov kokteyli” olan müxalifətə bizim aramızda yer yoxdur...

İsa Qəmbər: Aydındır ki, özünə hörmət edən qüvvələr onların arasında ola bilməz. Azərbaycanı qanunsuzluqla idarə edən bir qüvvənin yanında biz nə cür ola bilərik? Deyilənlər də tamamilə dövlət başçısına yaraşmayan böhtanlardır. Bir neçə gənci molotov kokteyli bəhanəsi ilə yalandan həbs etmək bir dövlətə yaraşarmı? Özünə hörmət edən hakimiyyətə yaraşarmı? Bunları kənara qoyub ölkənin problemlərini həll etsinlər. Edə bilmirlərsə, çəkilsinlər, xalq öz hakimiyyətini formalaşdırsın və problemlərini həll etsinlər.

Etibar Seyidağa: İctimai Palata bu məqamda fəaliyyətini dayandıra bilərmi?

İsa Qəmbər: Fəaliyyətlərdə oxşarlıq olduğu üçün ikisinin eyni anda fəaliyyət göstərməsi bir az çətin görünür. Ona görə də ola bilər ki, İctimai Palata mövcudluğunu saxlamaq şərtilə fəallığını bir qədər azalda bilər. İctimai Palataya daxil olan qüvvələr də fəailyyətini Milli Şurada davam etdirə bilər.

Etibar Seyidağa: Milli Şuranın aksiyalar keçirmək planları varmı?

İsa Qəmbər: Mütləq olmalıdır. Çünki cəmiyyətin, xalqın gücü ortaya çıxmadan, dinc etiraz aksiyaları, kütləvi tədbirlər keçirilmədən hakimiyyəti hansısa müsbət dəyişikliklərə sövq etmək mümkün görünmür.

Etibar Seyidağa: Müsavat Partiyası yanvar ayında prezidentliyə namzidəni irəli sürüb. İndi isə yeni situasiya yaranır. Ola bilərmi ki Müsavat Partiyası bu qərarını dəyişsin?

İsa Qəmbər: İndiki mərhələdə qərar qüvvədədir. Biz vətəndaşlarla, tərəfdarlarımızla görüşlərimizi davam etdiririk. Biz seçkilərə hazırlıqla bağlı seçki məşvərət şurasında müşahidəçi kimi iştirak edəcək şəxslərin siyahısını hazırlayırıq. Bütün rayonlar üzrə seçki qərargahı yaradırıq. Əgər Milli Şura seçkilərdə vahid qüvvə ilə iştirak edəcəksə, Müsavatın indi toparladığı potensial da həmin istiqamətdə ortaya qoyulacaq.

Günel Türksoy: Partiyanın qurultayını keçirmək məsələsində hər hansı yenilik varmı?

İsa Qəmbər: Yenilik yoxdur. Hakimiyyətə hələ ki, buna imkan vermir. İlk imkanda qurultayımızı keçirmək niyyətindəyik. Sadəcə seçki mərhələsində bunun müəyyən çətinlikləri olacaq. Amma yenə də buna şərait yaradılsa, mən hesab edirəm ki, qurultayı keçirmək lazımdır.

Turxan Qarışqa: Belə görünür ki, indiki halda xalq Milli Şuradan xəbərsiz görünür. Hər 20 adamdan biri bu haqda bilir. Xalqı proseslərə necə cəlb olunacaq.

İsa Qəmbər: Mən düşünmürəm ki, 20 adamdan 19-nun bundan xəbəri yoxdur. Sadəcə ölkədə elə bir polis rejimi yaranıb ki insanlar bildiklərini də etiraf etməyə maraqlı olmurlar. Təbii ki demokratik düşərgə aid olan media strukturları, Azərbaycann gələcəyini düşünən jurnalistlər cəmiyyəti obyektiv şəkildə məlumatlandırmalıdır. Biz də Şura üzvləri olaraq təbliğatımızı qurmalıyıq.

Günel Türksoy: Müxalifət həmişə bəyan edir ki, televiziyalarda onlara çıxış imkanı verilmir. Televiziyanın güclü təbliğat vasitəsi olduğunu bilərək Milli Şura öz fəaliyyətini xalqa çatdırmaq məqsədilə hər hansı peykdən yayım almaq niyyəti varmı?

İsa Qəmbər: Hazırda demokratik düşərgə bir neçə bu cür media layihələrini gerçəkləşdirir. Düşünürəm ki, səylər davam edəcək. Ən azı onu bilirəm ki, informasiya almaq istəyən vətəndaşımız informasiya ala biləcək.