Prezident İlham Əliyev hər zaman ölkə vətəndaşlarına münasibətdə humanizm nümayiş etdirib.

Bu sözləri Axar.az-a Prezident İlham Əliyevin Mehman Hüseynovla bağlı məsələni nəzarətə götürməsinə münasibət bildirən Konstitusiya Araşdırmaları Fondunun prezidenti Əliməmməd Nuriyev deyib. O bildirib ki, istər qanunvericiliyin, istərsə də cəza siyasətinin humanistləşdirilməsi istiqamətində cənab Prezidentin 2017-ci il 10 fevralda imzaladığı mühüm bir sərəncam var:

“Bu sərəncamla Cinayət Məcəlləsinə çoxsaylı dəyişikliklər edildi. Maddələrin sanksiyası azaldıldı, bəzi maddələrdən həbs sanksiyası ümumiyyətlə ləğv edildi. Həmçinin bu illər ərzində ölkə başçısı tərəfindən 30-dan çox əfv sərəncamı imzalanmışdır ki, bunun da nəticəsində 5000-dən artıq şəxs cəzadan azad edilib. Hətta ömürlük azadlıqdan məhrum edilmiş şəxslər də cənab Prezident tərəfindən əfv olunub. Bütün bunlar ölkə başçısının fəaliyyətinin mahiyyətində humanizm və ədalət prinsiplərinə söykəndiyini göstərir”.

Ə.Nuriyev qeyd edib ki, Mehman Hüseynov da Prezident İlham Əliyevə müraciət ünvanladı:

“Eyni zamanda biz də hüquq müdafiəçiləri olaraq ölkə başçısına Mehman Hüseynovun işi ilə bağlı müraciət etdik və Prezident İlham Əliyevdən humanizm siyasətinin davam etdirilməsini xahiş etdik. Bundan sonra Prezident İlham Əliyevin hüquq-mühafizə orqanları ilə iş və hərbi məsələlər üzrə köməkçisi Fuad Ələsgərov mətbuata açıqlamasında ölkə başçısının məsələni nəzarət götürdüyünü qeyd etdi. Cənab Prezident məhkumun gəncliyini, iki ilə yaxın cəza çəkdiyini, atasının yaşlı olduğunun nəzərə alınmasını baş prokuroruna tövsiyə edib, eyni zamanda, hadisənin iştirakçılarını barışığa doğru addımlar atmağa dəvət edib.

Bu onu göstərir ki, hüquq-mühafizə sistemi də qanunvericiliyin verdiyi tələblər çərçivəsində cənab Prezidentin tövsiyələrini nəzərə alacaq. Eyni zamanda qarşılıqlı addımlar atılması nəticəsində qaldırılmış cinayət işinə də xitam verilə bilər. Həmin işdə cinayət tərkibinin olmaması qənaətinə gəlinə bilər. Ümid edirəm ki, bizim müraciətlərimiz və cənab prezidentin tövsiyələri nəticəsində Mehman Hüseynovu yaxın zamanlarda azadlıqda görə biləcəyik. Əminəm ki, humanizm prinsiplərinin növbəti dəfə tətbiqinin nümunəsini görəcəyik”.

Qeyd edək ki, dünən Prezident İlham Əliyevin hüquq mühafizə orqanları ilə iş və hərbi məsələlər üzrə köməkçisi Fuad Ələsgərov mətbuata açıqlamasında bildirib ki, Mehman Hüseynovla bağlı müraciətlər Azərbaycan Respublikası Prezidentinin diqqətinə çatdırılıb və cənab Prezident bu müraciətlərə dərhal reaksiya verib. Ölkə başçısı məhkumun gənc olmasını, artıq iki ilə yaxın cəza çəkdiyini, ailə vəziyyətini və atasının yaşlı olduğunu nəzərə alaraq, Mehman Hüseynovun işində humanizm prinsipinin önə çəkilməsini, araşdırmanın obyektiv və ədalətli olması üçün qanunla nəzərdə tutulmuş bütün zəruri tədbirlərin görülməsini Azərbaycan Respublikasının baş prokuroruna tövsiyə edib.

Eyni zamanda, cənab Prezident hadisənin iştirakçılarını barışığa doğru addımlar atmağa dəvət edib.