Yazıda bir çox şəxslərə qarşı ittihamlar irəli sürülür

Jurnalist Eynulla Fətullayevin Azərbaycanda dövlət çevrilişinə cəhd və prezident İlham Əliyevə sui-qəsdin hazırlanması ilə bağlı araşdırma materialı qalmaqal yaradıb. Onun Virtualaz.org saytında yerləşdirilən “İlham Əliyevə qəsdin üstü açıldı” adlı yazısında bir çox şəxslərə qarşı ittihamlar irəli sürülür.

Jurnalist yazır ki, prezident İlham Əliyevin güc yolu ilə devrilməsinə cəlb edilən şəxslər birbaşa Rusiya Prezident Administrasiyası rəhbərinin müavini Vyaçeslav Volodin tərəfindən idarə olunur. Yazıda iddia olunur ki, Milli Şuranın yaradılması ideyası da ona məxsusdur və Volodin planının Azərbaycandan olan əlaqələndiricisi Eldar Namazovdur. Hətta bu planını həyata keçirilməsi üçün milyorderlər ittifaqının ayırdığı 20 milyon dollar vəsait də Eldar Namazovun nəzarətindədir.

Məqalədə həmçinin “Volodinin oyunu”na sabiq baş prokuror və Azərbaycanın Serbiyadakı hazırkı səfiri Eldar Həsənovun da cəlb olunduğu qeyd edilir. Jurnalist Eldar Həsənovun İlham Əliyev sisteminə xidmət edə-edə öz sistemini qurduğunu və sifarişli cinayətlərdə əli olduğunu iddia edir.

Dövlət çevrilişinə cəhddə adı hallanan şəxslərdən biri də Prezident Administrasiyasının sabiq işlər müdiri Akif Muradverdiyevdir. Məqalədə Muradverdiyevin istintaqa etirafedici ifadələr verdiyi və Moskvaya müntəzəm səfərləri oradakı görüş və məsləhətləşmələri barədə danışdığı qeyd olunur.

Məqalədə adı hallanan Milli Şuranın icra aparatının rəhbəri Eldar Namazov Milli Şura, Rüstəm İbrahimbəyov və özü haqqında yazılanları təkzib edərək bunların hamısını boş fikirlər adlandırdı.

Yazıda adı keçən digər şəxs, Akif Muradverdiyevin vəkili yazılanların hamısını təkzib etdi.

Azərbaycanın Serbiyadakı Fövqəladə və Səlahiyyətli səfiri Eldar Həsənov bu yazı ilə Eynulla Fətullayevin nəinki dövlət marağına xidmət etdiyini, əksinə Azərbaycan daxilindəki sabitliyə və ölkələr arası münasibətlərə kölə salmaq istədiyini deyir.

Məqaləyə YAP-nın bir neçə nümayəndəsinin münasibətini öyrənmək istəsək də onlar yazılanların jurnalist araşdırması olduğunu və buna munasibət bildirməyəcəklərini dedilər. Yazıda dövlət çevrilişinə cəhddən danışıldığı üçün Milli Təhlükəsizlik Nazirliyi ilə də əlaqə saxladıq. Qurumun mətbuat xidməti bu məsələ ilə bağlı şərh verilməyəcəyini bildirdi.