Cəmil Həsənlinin seçki qərargahının rəhbəri Arif Hacılı isə KXCP sədrinin iradlarını əsassız sayır
Milli Şuranın prezidentliyə vahid namizədi Cəmil Həsənlinin seçki qərargahı artıq tam gücüylə fəaliyyətə başlayıb. MSK-nın Cəmil Həsənlinin prezidentliyə namizədliyini təsdiqləməsindən sonra onun seçki qərargahı imza toplanması kampaniyasına start verib. Ancaq deyəsən, elə bu məsələnin özü də Milli Şura üzvləri arasında müəyyən narazılıqlara yol açmağa başlayıb. Belə ki, KXCP sədri Mirmahmud Mirəlioğlu Milli Şurada təmsil olunan müxalifətin əsas iki partiasının - Müsavat və AXCP-nin ünvanına müəyyən ittihamlar səsləndirib.
Mirmahmud Mirəlioğlu öz ittihamlarını qarşı tərəfə konkret suallar ünvanlamaqla yönəldib: “Bu Seçki Qərargahı Milli Şuranındırsa, Cəmil Həsənlinin vahid namizədliyi ətrafında formalaşıbsa, C.Həsənli orada iştirak edənlərdən hər kəsin vahid namizədidirsə, niyə bu, yalnız iki təşkilata həvalə olunur? Bu, birinci sualdır. Yaxud burada iştirak etmək istəyənlər niyə ora buraxılmır? Bu da ikinci sual. C.Həsənli vahid namizəd seçilən gün ab-hava formalaşmışdı. Kim kimin nəyidir ki, iş bölgüsü aparsın, partiyaların qabağında sıfır, yaxud rəqəm yazsın?”
KXCP sədri onun rəhbərlik etdiyi partiyaya cəmisi min imzanın toplanmasının həvalə edilməsinə sərt reaksiya verib. Və o, bu davranışı həm Cəmil Həsənlinin əleyhinə, həm də ümumiyyətlə, Milli Şuranın dağıdılmasına yönəlik addım kimi dəyərləndirib: “Belə çıxır ki, KXCP min nəfərin imzasını toplamalıdır. Biz də həmin imzaları məsuliyyətsiz bəyanat verənlərin özlərinə bağışlayırıq. Getsinlər, toplasınlar. Hər halda bizim namizədliyimiz vardı. Bu qənaətdə idik ki, KXCP Seçki Məcəlləsində nəzərdə tutulan imzanı öz namizədi üçün toplayacaq. Bunun üçün kimsənin dəstəyi və yardımı olmayacaqdı. Biz yığışdıq, birləşdik ki, vahid namizədimiz olsun. Bir yerə toplaşmadıq ki, kimsə təzədən qrupbazlıqla məşğul olsun və ya kimsə kiməsə qarşı ittihamlarla çıxış etsin. Bu, bir tərəfdən yaxşı oldu. Göründü ki, xasiyyəti, xarakteri dəyişmək mümkün deyil. Kim nəyə vərdiş edibsə, onu edir, vərdişi dəyişmək xəstəliyə səbəb olur. Təşkilata müraciət ediblər. 20-dən artıq rayon-şəhər şöbəsinin rəhbərliyindən məlumat var ki, 1 gün ərzində keçmiş silahdaşlarımız belə, imza toplamağı təklif edirlər. Partiyamızın qabağına min yazırlar, amma bizdən minlərlə yox, on minlərlə imza almaq istəyirlər. Sağ olsunlar. Bu, Seçki Qərargahının başbilənlərinin məsuliyyətsiz addımıdır. Bu adamlar fərqində olmalıdır ki, Seçki Qərargahı bu həssas məqamlarda başqalarının qarşısında sıfır yazmaqla əslində gördükləri işin faydalılıq əmsalının sıfır olduğunu göstərirlər. Bununla bağlı öz təşkilatlarına da, Milli Şura və Cəmil Həsənliyə də hesabat verməlidirlər. Onlara kim bu haqqı tanıyıb ki, KXCP-ni Seçki Qərargahından kənarda saxlasınlar? Kampaniya başlandı, amma Cəmil Həsənlinin əleyhinə başlandı. Bu Seçki Qərargahı Cəmil Həsənlinin əleyhinə işləyir. Bu gün imzasını almaq istəmədikləri adamların sabah səslərini də ala bilməyəcəklər”.
Müsavat və AXCP-ni Cəmil Həsənlini iki partiyanın namizədinə çevirmək cəhdində suçlayan Mirmahmud Mirəlioğluna Milli Şuranın rəhbərlərindən olan Arif Hacılı cavab verib. Müsavat Partiyasının Mərkəzi İcra Aparatının rəhbəri KXCP sədrinin belə məzmunlu açıqlama verməsindən təəssüfləndiyini bildirib: “Mən Mirmahmud Mirəlioğlunun Milli Şuranı, konkret olaraq da məni məsuliyyətsiz adlandırmasına inanmıram. Və hesab edirəm ki, yəqin açıqlama yazılarkən bununla bağlı yanlışlığa yol verilmiş ola bilər. Ancaq ümumiyyətlə, Mirmahmud Mirəlioğlunun Cəmil Həsənlinin seçki qərargahına yönəlik belə bir açıqlama verməsinə təəssüf edirəm və onun iradlarını da qəbul etmirəm. Hesab edirəm ki, Mirmahmud Mirəlioğlunu yanlış məlumatlandırıblar. Çünki Cəmil Həsənlinin seçki qərargahı yaradılarkən mən şəxsən Milli Şurada təmsil olunan siyasi partiyaların rəhbərləriylə telefonla danışaraq onları məsləhətləşmələrdə iştirak etməyə dəvət etmişəm. KXCP nümayəndələri bu müddət ərzində seçki işinin təşkilində iştirak etməkləriylə bağlı hər hansı təkliflə çıxış etməyiblər. Ancaq mən iki dəfə Xəzər Teyyublu ilə telefonla danışmışam. Seçki Qərargahının rəhbəri təyin olunduqdan dərhal sonra da onunla danışmışam və seçki qərargahının işində KXCP-nin iştirak etməsi üçün Müsavatın qərargahına dəvət etmişəm. Eyni zamanda imza toplanması məsələsində KXCP-nin hansı şəkildə iştirak edəcəyi barədə maraqlanaraq, bu barədə onun fikrini soruşmuşam. Xəzər Teyyublu da mənə bildirib ki, Mirmahmud bəy və KXCP-nin digər rəhbərliyi hazırda Türkiyədədir və bizim bu sorğumuza yalnız onlar qardaş ölkədən qayıtdıqdan sonra cavab verə bilərlər. İndi onlar Türkiyədən qayıtdıqdan sonra guya bizim KXCP-ni seçki işinin təşkilindən kənarda qoymaq xətti götürdüyümüz barədə ittihamlar səsləndirmələri haqsızlıqdır. Ola bilər ki, Mirmahmud Mirəlioğluna bu barədə yanlış məlumat veriblər. Halbuki mən ona görə Xəzər Teyyubluya zəng etmişdim ki, başda sədr olmaqla, KXCP-nin digər rəhbərləri həmin vaxt Azərbaycanda deyildilər”.
Arif Hacılı onu da vurğulayıb ki, seçki prosesi yalnız imzatoplama kampaniyasından ibarət deyil və bu istiqamətdə həll edilməsi vacib olan çoxsaylı məsələlər var: “İmzaların toplanması prosesində yalnız iki partiya iştirak etmir. Bu prosesə hər kəs, o cümlədən, Milli Şuradakı bütün gənclər də dəstək verirlər. Bizim seçki kampaniyası ilə bağlı hansısa partiyaları digərlərindən fərqləndirmək kimi bir niyyətimiz yoxdur. Hazırda Milli Şuranın prezidentliyə namizədi Cəmil Həsənlinin seçki fondu yoxdur. Ancaq bu problemi fədakar insanlarımız öz məhdud imkanları sayəsində həll etməyə çalışırlar”.