Əvvəlki illərdən fərqli olaraq builki prezident seçkilərində qeydə alınan namizədlərə təbliğat-təşviqat kompaniyası üçün dövlət büdcəsindən maliyyə ayrılmayacaq. Buna görə də qeydə alınmış namizədlər təbliğat-təşviqat kampaniyasını öz maliyyə imkanları hesabına aparacaq. Bundan başqa, onların könüllü ianələrdən də faydalanmaq imkanları olacaq.

MSK katibi Mikayıl Rəhimov qanunvericiliyə nəzər salaraq bildirib ki, namizədlərə fiziki şəxslər 2500 manat, hüquqi şəxslər isə 50 min manata qədər maddi yardım edə bilərlər. Dövlət büdcəsindən maliyyələşən partiyaların öz namizədlərini tanıtmaq istiqamətində müəyyən maliyyə maneələrini aşar desək? yanılmarıq. Ancaq bu da tam olaraq yetərli rəqəm sayıla bilməz. Belə olan təqdirdə namizədlər özlərinin PR kampaniyasında hansı maliyyə resurslarından istifadə edəcəklər?

Modern.az saytına açıqlamasında Ümid Partiyasının prezidentliyə namizədi, millət vəkili İqbal Ağazadənin seçki qərargahının rəhbəri Taleh Əliyev bildirib ki, dövlət büdcəsindən maliyyələşən partiya olduğu üçün bu imkanı da əldən qaçırmayacaqlar.

“Eyni zamanda partiyada könüllü olaraq ianə və üzvlük haqqı da toplanır. Həmin vəsaitdən istifadə etməyi planlaşdırırıq”. T.Əliyev onu da əlavə edib ki, fiziki və hüquqi şəxslər də kömək etsə, böyük məmnuniyyətlə bunu qarşılayarlar.

“Amma hazırkı ictimai-siyasi vəziyyətdə müstəqil sahibkarlıq subyektləri və ayrı-ayrı könüllü şəxslər hansısa müxalif namizədin seçki kampaniyasına pul köməkliyi etsin”.

BAXCP sədrinin müavini Niyaməddin Orduxanlı təəssüf hissi ilə qeyd edib ki, partiyanın prezidentliyə namizədi, millət vəkili Qüdrət Həsənquluyevin maliyyə imkanları məhduddur.

“Bu baxımdan fiziki şəxslərin hesaba köçürdükləri vəsaitdən istifadə olunacaq. Bundan başqa, partiya üzvlərinin və yaxın insanların da hesaba əlavə edəcəkləri puldan istifadə edəcəyik”.

ASDP sədri Araz Əlizadə isə daha çox ianələrdən və öz şəxsi maliyyəsindən istifadə etməyi düşünür. O bildirib ki, imzatoplama kampaniyasında 12 min manat ianə yığılıb.


ADP sədri Sərdar Cəlaloğlu hesab edir ki, dövlət büdcəsindən vəsait verilməməsi namizədləri qeyri-bərabər vəziyyətə salır. “Ancaq dost-tanışdan ianə yolu ilə vəsait toplayıb seçki kampaniyamızı aparacağıq”.

Öz təşəbbüsü ilə prezidentliyə namizədliyi irəli sürülmüş, millət vəkili Zahid Oruc deyir ki, təbliğat üçün ona ilkin köməkliklər göstərilib.

“Onlar əsasən bu dövr ərzində bizi tanıyan, şəxsimizə xoş münasibəti olan, bizimlə çiyin-çiyinə addımlayan insanlardır. Həmin şəxslər öz imkanları daxilində bizə yardım göstərməkdədirlər. Prinsipial olaraq bunu vurğulamağı özümə borc bilirəm ki, heç bir halda vətəndaşlara kütləvi müraciət adı ilə “Hər hansı bir məbləğ hesabımıza keçirin, öz məramımızı, baxışlarımızı sizə təqdim edək” kimi çağırışlar etməyəcəyik”.

Deputat söyləyib ki, bankda açılmış hesaba köçürülmüş vəsaitin son qəpiyinə qədər MSK-ya və mediaya məlumat veriləcək.

“Əlbəttə, etiraf etmək lazımdır ki, bu şəraitdə həmin vəsait on minlərlə manat məbləğində ölçülə bilməz. Biz qanunun tanıdığı vasitələrə bu məsələni yönəldə biləcəyik”.