"Der Tagesspiegel"də AzTV-yə gülürlər, “Sərhədsiz Reportyorlar”da isə Eynulla Fətullayevi yenə də müdafiə edər...
Almaniyadakı Azərbaycan səfiri jurnalistlərlə görüşdü, amma...
“Azərbaycan hakimiyyəti barədə tənqidi məqalələr hazırlamış bəzi alman jurnalistlərin prezident seçkiləri ilə əlaqədar Azərbaycana gəlişinə imkan verilmir. Bəzi almaniyalı jurnalistlərə viza verilməsindən imtina olunub. Bunu Almaniyanın "Der Tagesspiegel" qəzetinin siyasət şöbəsinin müdiri Claudia von Salzen hazırda Berlində olan azərbaycanlı jurnalistlərlə görüşündə bildirib.


Xatırladaq ki, Xəbər verdiyimiz kimi, Fridrix Nauman Fondu Azərbaycandan bir qrup jurnalisti Almaniyaya, daha konkret desək, ölkə mediasının qəlbinin döyündüyü Hamburq şəhərinə, eləcə də Berlinə səfərə aparıb.

Səfər heyətində “Yeni Müsavat” qəzetini bu sətirlərin müəllifi, “Azadlıq” qəzetini Aytən Məmmədova, “BizimYol” qəzetini Natiq Cavadlı, APA-nı Şamil Əlibəyli, Mətbuat Şurasını Qadir İbrahimli, Fridrix Nauman Fondunun Bakı ofisini Səbuhi Qafarov və Yanacaq və Energetika Nazirliyinin mətbuat xidmətini Azər Mənsimli təmsil edir.

Görüşlərdə həmçinin Fondun Cənubi Qafqaz layihələrinin rəhbəri Yasmin Pamuk, eləcə də fondun Berlin üzrə nümayəndəsi Sabine Landşaydt da iştirak edir.

“HÖKUMƏT MEDİASININ ALMANİYA HAQDA YAZDIQLARINA ANCAQ GÜLÜRÜK”

C.Salzen bildirdi ki, onun özü də "Eurovision" musiqi yarışması ərəfəsində Bakıda səfərdə olub və Azərbaycan hökumətini tənqid edən məqalə hazırlayıb. Şöbə müdiri dedi ki, bu dəfə seçki ilə əlaqədar Bakıya "Der Tagesspiegel"dən özü yox, başqa əməkdaş göndəriləcək: “Təəssüf ki, mən gedə bilməyəcəm, çünki oktyabrda başqa işim var. Amma çox istərdim ki, gedim”.

"Eurovision" zamanı Azərbaycan hökumətini tənqid etməsindən danışan xanım jurnalist həmçinin vurğuladı ki, ölkəmizlə bağlı təkcə neft və siyasət haqda danışmaq olmaz” deyən jurnalistin fikrincə insan hüquqları, demokratiya sahəsindəki problemlərə göz yummaq mümkün deyil.

Claudia von Salzen həmçinin “Azadlıq” radiosunun əməkdaşı Xədicə İsmayıla qarşı aparılmış qara piar barədə də danışdı. Onun fikrincə, xanım jurnalistin başına gələnlər əslində Azərbaycanda nə baş verdiyinə işıq salır: “Mən Xədicə İsmayılova ilə görüşmüşəm, onun haqqında məqalə də yazmışam. Onun mövqeyi məni qürurlandırır. Mən Azərbaycana baxanda hər şeyi parlaq göstərə bilmərəm. Axı başa düşürəm ki, orada nə baş verir. Siyasət mövzusunda yazan jurnalist tənqidçi olmalıdır”.

Azərbaycanın hökumət mediasında Almaniya əleyhinə aparılan anti-təbliğat kampaniyasına gəlincə, xanım jurnalist dedi ki, bu barədə məlumatlıdırlar: “Hətta bir dəfə süjet vermişdilər ki, guya Frankfurtda polislər etirazçıları döyür, adamlar çadırlar qurublar və s. Biz bu cür şeylərə ancaq gülürük”.

“EYNULLA FƏTULLAYEV YENƏ HƏBS OLUNSA….”

Səfər iştirakçılarının maraqlı görüşlərindən biri də Sərhədsiz Reportyorlar Təşkilatının Berlin bürosunun icraçı direktoru Kristian Meeromla baş tutdu. İki dəfə Azərbaycanda olduğunu deyən təşkilat rəhbəri bildirdi ki, Avroviziya musiqi yarışması zamanı Azərbaycanda çox işləyib və ölkəmiz barədə çox yazıblar. O, söylədi ki, Sərhədsiz Reportyorlar Təşkilatının Berlin ofisi Fransa ofisindən fərqli olaraq kiçik olsa da, qlobal təşkilatdır və axtarışlarını davam etdirir: “Biz azad söz və müstəqil jurnalistika uğrunda mübarizə aparırıq. Azərbaycandakı fəaliyyətimizin də əsas sualı bunlardır. Düzdür, ölkəniz Rusiya qədər böyük deyil. Amma hər şey diqqətdə saxlanır. Hazırda Soçi olimpiadasına hazırlaşan şimal qonşunuzla bağlı kampaniyaya başlamışıq. Əsas istiqamət də internet azadlığıdır”.

Kristian Meron həmçinin dedi ki, təşkilatın alman ofisinin maliyyə mənbələri ianə, üzvlük hesabınadır. Onun sözlərinə görə, təşkilatın 1100 üzvü var. Hər il mayın 3-də 1200 tirajla foto albom çap olunur və dünyanın bütün ölkələrinə yayılır. Albomun qiyməti 12 avodur. Fransa sektoru bu cür 4 albom buraxır: “Biz ölkələrdəki mediaya münasibəti reytinqlər vasitəsilə öyrənirik. Xüsusən də mətbuatın iqtisadi, hüquqi, siyasi təzyiqləri araşdırırıq. Bütün hallarda söz azadlığını müəyyən etmək çətindir”.

K.Meron keçmiş vicdan məhbusu Eynulla Fətullayevlə bağlı suala belə cavab verdi. “O, yenə də həbs olunsa, yenə də müdafiə olunacaq. Baxmayaraq ki, onun bizim haqqımızda son hərəkəti ifrat iddialı idi. Onun materiallarında əsas arqument o idi ki, guya Almaniya və Avropada insan haqları pozulur. Bunu əsas götürərək Sərhədsiz Reportyorları bu problemləri qabartmaqda yox, başqa ölkələrin daxili işlərinə qarışmaqda ittiham etmişdi. Halbuki insan haqları coğrafi məsələ deyil. Onsuz da biz Almaniyada və başqa Avropa ölkələrində insan haqlarının durumu, media ilə bağlı hesabatlar hazırlayırıq. İddia etmirik ki, Almaniyada hər şey yaxşıdır. Ancaq Azərbaycandan fərqli olaraq Almaniyada jurnalistlər istənilən mövzuya müraciət edib, sərbəst şəkildə işləyirlər. Bu da dövlət idarəetməsindən irəli gəlir. Ona görə də Fətullayevin materiallarını hökumətin mövqeyi kimi qəbul edirik”.

“SİZİN HÖKUMƏT AZAD MƏTBUATIN ZƏİF OLMASINDA MARAQLIDIR”

O, bildirdi ki, ildə təşkilata miqrasiya ilə bağlı 15-20 jurnalist müraciət edir. Bunlar daha çox İran, Suriya, Rusiya jurnalistləri olur. Hətta gözlənilmədən Meksikadan da belə müraciət almışıq. K.Meron Azərbaycanda medianın durumunun yaxşı olmadığını, əksinə pisləşdiyini qeyd etdi: “Amma Azərbaycanda başqa ölkələrdən fərqli olaraq birbaşa senzura yoxdur, sadəcə, özünüsenzura var. Biz jurnalistlərin döyüldüyünü bilirik. Məsələn, Socarın mühafizəçilərinin bir jurnalisti döyməsi haqda məlumatlıyıq. Xədicə İsmayıl məsələsi birbaşa senzura deyildi, daha pis idi. Sizin hakimiyyət azad mətbuatın zəif olmasında maraqlıdır. Və bizim hesabatlarımıza 3 formada reaksiya verir: qeyri-mədəni, təzyiqlə və nəhayət indiki apardığı siyasətin davam etdirilməsi ilə”.

Jurnalist heyətinin görüşlərindən biri də Azərbaycanın Almaniyadakı səfiri Pərviz Şahbazovla baş tutdu. Jurnalistlərlə Almaniya və Azərbaycan mediası, hər iki ölkənin media qurumları arasında gedən informasiya “müharibəsi”, habelə bir çox mövzular üzrə danışan səfir bunların yayımlanmasına icazə vermədi.