Sentyabr ayının 22-də Milli Şuranın mitinqi zamanı keçmiş daxili işlər naziri İsgəndər Həmidovun səsləndirdiyi fikirlər iqtidar düşərgəsində sərt dillə tənqid olunmaqla yanaşı, müxalifət düşərgəsində də bir mənalı qarşılanmayıb.

Yeni Azərbaycan Partiyasının icra katibinin müavini Siyavuş Novruzovun İsgəndər Həmidovun "Burada inasanlar toplaşıb, heyvanların adının çəkilməsinə ehtiyac yoxdur" cümləsinə cavabı, təhqir üslubunda olub. Tərtər rayonu icra hakimiyyətinin keçmiş başçısı Sərdar Həmidov Siyavuş Novruzovun fikirlərinə münasibət bildirdi. Məsələylə bağlı etatist.com-a açıqlama verən S.Həmidov, bir çoxlarından fərqli olaraq mövqeyini qeybət şəklində yox, öz şəxsiyyətinə uyğun şəkildə göstərməyə üstünlük verdiyini bildirdi: "Bu gün qəzetlərdən biri bu məsələ ilə bağlı mənim adımı çəkib, altından yazır ki, "Maraqlıdır ki, qardaşına qarşı bu qədər sərt danışan Sərdar Həmidov atasını və anasını təhqir edən S. Novruzova cavab verməyib". Yəqin bunu yazanlar, mənim qardaşımı məndən çox istəyir. Mən də düşündüm ki, danışmağa nə ehtiyac var, "Yeni Müsavat" qəzeti mənim əvəzimə cavab verəcək. O ki qaldı mənim Siyavuş Novruzova cavabıma, mən ona öz sözümü demək üçün bu gün YAP-ın mərkəzi qərargahına getmişdim. Amma orada heç kimi tapmadım. Siyavuş Novruzovun bu gün rəhbərliyində təmsil olunduğu partiya, mərhum prezident Heydər Əliyev tərəfindən qurulub. Siyavuş Novruzov bu gün Heydər Əliyevi ümumilli lider, ata, ulu öndər kimi qəbul edirsə, ən azı öyrənməli idi ki, Heydər Əliyev siyasi çıxışlarında, bəyanatlarında siyasi opponenlərinə qarşı şəkilsiz cavablar və təhqiredici ifadələr işlətməzdi. El dilində yaxşı bir söz var: "halal övlad qonşuya niyə oxşamalıdır?".

İkincisi; mən prezident seçkisi təşviqatı ilə bağlı iki həftədən çox idi ki, Tərtərdə idim. Orda da müəyyən işlər görməyi bacarmışam. İndi Siyavuş Novruzovun tələm-tələsik, ölkənin iqtidar partiyasına yaraşmayacaq cavabı, ardından mənim niyə cavab vermədiyimə dair qəzetlərin sualları mənə gülməli gəldi. Görünür mənim rayonda apardığım işlərdən narahat olan dairələr hərəkətə keçiblər. Narahat olmasınlar, Eldar Həsənov bu ölkədə prezident olmaq mövqeyində olmayacaq. İndi nə 1994-1995-ci illərdə olan oyunlar, nə də mənim 1997-ci ildə həbs olunmağım üçün aparılan oyunlar keçərli deyil. Bunu ən azından hər iki tərəf bilməlidir.

Mənim üçün həm də o maraqlıdır ki, nə üçün xeyli müddət bundan əvvəl "Səs" TV-yə verdiyim müsahibəni yeni xəbər kimi təqdim edirlər?!"