İrəvanda amerikalı maliyyəçi və “Açıq Cəmiyyət” Fondunun qurucusu Corc Sorosun ofisinin bağlanması üçün Milli Təhlükəsizlik Xidməti hərəkətə keçib. Bu haqda “Veto” hərəkatının lideri Narek Malyan bildirib.

Malyan illərdir ki, Ermənistandakı Soros ofisinin bağlanması və hökümətdəki sorosçuların vəzifədən uzaqlaşdırılmasına çalışanlardandır. Ötən ilin sentyabrında “Veto”çular Corc Soros əlində pul dolu çanta ilə təsvir olunun heykəlini hazırlayaraq İrəvandakı ofisinin qarşısında qoymuşdular. O zaman Narek Malyan demişdi ki, Soros Ermənistanı və dövlətçiliyi məhv etmək üçün bu çantadan erməni fəallara qrant paylayır. O, bir müddət öncə Soros fondundan erməni fəalı Saşik Sultanyana yezidi kürdlərlə ermənilər arasında nifaq salmaq üçün pul ötürüldüyünü iddia edib və Milli Təhlükəsizlik Xidmətinə (MTX) müraciət ünvanlayıb.

Malyan bildirib ki, Ermənistan MTX yaxın günlərdə Soros ofislərində total yoxlamalar aparacaq, məşhur erməni sorosçular istintaqa cəlb ediləcəklər. Malyanın sadəcə bir fiqur olduğu, əslində Ermənistandakı sorosçulara qarşı prosesin Rusiyadan idarə edildiyinə prosesi izləyənlərdə şübhə yoxdur.

Soros milyarder-xeyriyyəçidir, xeyriyyəyə 32 milyard dollar pul xərcləyib. Çoxları ondan qorxur və hesab edirlər ki, o, qlobal konspirasiyanın mərkəzində duran iblisdir. Ermənistanda Paşinyan da daxil olmaqla hakimiyyətin əsas nümayəndələrinin sorosçulardan təşkil edildiyi də kimsəyə sirr deyil. Rusiyanın Sorosa münasibəti isə bəllidir ki, neqativdir. Şimal qonşumuzun Ermənistanda rolunun artdığı bir vaxtda Ermənistan MTX-nın hərəkətə keçməsi, xidmət rəhbərinin son bir həftədə 2 dəfə Rusiyaya səfər etməsi də təsadüfi sayıla bilməz. Deyilənlərə görə, ona Ermənistan hakimiyyətindəki sorosçuların təmizlənməsi üçün “yol xəritəsi” və 1 həftə vaxt verilib.

“Qafqaz” Araşdırma Mərkəzinin rəhbəri, təhlükəsizlik məsələləri üzrə ekspert Elxan Ələsgərov deyir ki, Soros fondunun Ermənistandakı ofisinin bağlanması Rusiyanın Paşinyan qarşısında qoyduğu tələbdir: “Erməni mətbuatı yazır ki, Ermənistan Təhlskəsizlik Xidmətinin rəhbəri son bir həftə ərzində 2 dəfə Rusiya Federal Təhlükəsizlik Xidmətinin rəhbəri Bortnikovla görüşüb. Bortnikov Ermənistan Təhlskəsizlik Xidmətinin rəhbərinə siyahı verib, həmin siyahıda Sorosun Ermənistan hakimiyyətindəki adamlarının adları yer alıb. Həmin adamların vəzifədən uzaqlaşdırılması Rusiya ilə Ermənistan arasındakı razılaşmanın şərtlərindən biridir. Hazırda Rusiya Paşinyanın hakimiyyətdə qalmasını istəyir. Baxmayaraq ki, bir müddət əvvələ qədər Paşinyan Rusiyaya qarşı çıxışlar edirdi. Bu gün İrəvanda ABŞ-ın ən böyük səfirliyi fəaliyyətdədir, orada 2500 nəfər çalışır. İrəvanda amerikalıların çalışdığı çox sayda QHT-lər fəaliyətdədir. Həmin QHT-lər Soros tərəfindən maliyyələşdirilir. Onlara qarşı görülən tədbirlər Rusiyanın Ermənistanda daxili vəziyyətin öz lehinə çevirmək istəyindən qaynaqlanır”.

Elxan Ələsgərov deyir ki, Nikol Paşinyan müharibəni uduzsa da, çoxsaylı səhvlərə yol versə də, Ermənistan müxalifəti onu vəzifədən uzaqlaşdırmaq gücündə deyil: “17 müxalifət partiyası Paşinyana qarşı birləşsə də, heç nə əldə edə bilmir. Əlbəttə ki, Paşinyanın ayaqda qalması onun Sorosla əlaqələrindən qaynaqlanır. Paşinyan yaxın aylarda hakimiyyətdə qalacaq. Ona qarşı küçələrə çıxan 10 min nəfərə yaxın müxalifətçi ciddi nəticə əldə edə bilməyəcək. Bu gün erməni müxalifətinin normal namizədi də yoxdur. Ermənistan hakimiyyətinin taleyi Rusiyanın əlinə keçməkdədir. Putin çıxışında dedi ki, Paşinyan çətin qərarlar qəbul edib, onu başa düşmək, ona şərait yaratmaq lazımdır. Bu isə o deməkdir ki, yaxın bir neçə ayda ona dəyməyəcəklər, hakimiyyətdə qalmasına mane olmayacaqlar. Hakimiyyətdəki Paşinyan tərəfdarları – sorosçular isə tədricən kənarlaşdırılacaq. Onlar ermənilərin Moskvadakı əlaqələri üzərindən faktiki olaraq Putinə qarşı fəaliyyət gösətriblər. Buna görə də Paşinyan hökümətini baltalamaq Rusiya üçün önəmli məsələdir. Rusiyanın məqsədi indiki mərhələdə sorosçuların İrəvandakı köklərini kəssin”.

Elxan Ələsgərov bildirdi ki, Nikol Paşinyanın indiki mərhələdə hakmiyyətdə qalması Azərbaycan üçün də önəmlidir: “Paşinyanın imzaladığı razılaşmanın icrası mərhələsində onun hakimiyyətdə qalması vacibdir. Əslində Paşinyan da, ondan əvvəl Sərkisyan, ondan əvvəl Köçəryan da Ermənistanı zəiflətməklə məşğul olublar. Qarabağda xülya dövlət qurmaq istəkləri ilə Ermənistanı bir dövlət kimi məhvə sürükəyiblər. Bu gün Ermənistan xaos içərisindədir. Azərbaycanda isə əks proses gedib ötən illər ərzində. Güclü Azərbaycan dövləti yaradılıb. Paşinyan bu gün səviyyəsiz bir dövlətin baş naziridir. Bu dövlət Rusiyaya meydan oxumaq iddiasına düşmüşdü. Sorosçular bu iddianı irəli sürən komandanın özəyini təşkil edib. Bu gün isə Rusiya həmin komandanın başında dayanan Paşinyanın əli ilə sorosçuları yığışdırır, kadrları dəyişir. Paşinyan çıxılmaz vəziyyətdir, özünün komanda yoldaşlarına qarşı getmək məcburiyətindədir”.

Ekspert Nikol Paşinyanın özünün də istintaqa cəlb edilə biləcəyini istisna etmədi./“Yeni Müsavat”/