Jurnalistin həbsi arxasındakı sirr pərdəsi yavaş-yavaş qalxır; ondan Cavid Qurbanovla general Əli Nağıyevin üzünə durmaq tələb olunur, guya bu iki şəxs müxalifəti maliyyələşdirib...

“Fuad Qəhrəmanlı: “Pərviz bəyin mətanətli və mübariz davranışı hakimiyyətə öz çirkin niyyətini həyata keçirməyə imkan vermədi”



Prezident seçkisinə 20 gün qalmış heç kimin gözləmədiyi bir hadisə baş verdi. Moderator.az saytının direktoru, “Bizim Yol” qəzetinin əməkdaşı və hüquq müdafiəçisi Pərviz Həşimli həbs olundu. Rəsmi məlumatda P.Həşimlinin silah alverinə görə saxlanıldığı bildirilirdi.

Həbsdən sonra baş verənlər isə silah məsələsinin formal mahiyyət daşıdığını ortaya qoydu. Jurnalistin evində 5 yaşlı qızının gözü qarşısında heç bir əndazəyə sığmayan formada axtarış aparılması, məhkəməyə başında qara torba keçirilməklə gətirilməsi, noyabrın 7-də keçirilən prosesdə isə qara maskalı əməliyyatçının nümayişkaranə şəkildə Pərviz Həşimlinin xirtdəyindən tutaraq itələməsi də sıradan olaylar deyildi. Bir jurnalistə, hüquq müdafiəçisinə qarşı bu qəzəb haradan qaynaqlanır?

Bununla bağlı tanınmış ekspertlərdən biri adının çəkilməməsi şərtilə “Yeni Müsavat”a bəzi ipucları verdi: “Pərviz Həşimlinin özü də, vəkili də deyir ki, ondan Əli Kərimliyə qarşı ifadə almaq istəyirlər. Əslində isə alınacaq ifadə Əli Kərimlinin adından istifadə edərək iki oliqarxı və bir generalı ”vurmağa" hesablanıb. P.Həşimlinin həbsinin arxasında hakimiyyətdaxili qruplaşmaların çəkişməsi və bu çəkişmənin kimin kimi yıxacağı qədər gərgin bir müstəvidə aparılması dayanır. Bu çəkişmələrin varlığını P.Həşimlinin atası Kamran Həşimli də dəfələrlə dilə gətirərək oğlunun müxalifət liderlərinin əleyhinə bəyanat vermədiyinə görə həbslə cəzalandırıldığını vurğulayıb.



P.Həşimlidən əleyhinə ifadə tələb olunan oliqarx və generalın adı da bəllidir:

- Nəqliyyat Nazirliyi “Azəryolservis” Açıq Səhmdar Cəmiyyətinin sədri, deputat Cavid Qurbanov;



- Müdafiə sənayesi naziri Yavər Camalov;

- Baş prokuror yanında Korrupsiyaya qarşı mübarizə idarəsinin rəis müavini Əli Nağıyev və onun qardaşı, tikinti biznesi ilə məşğul olan Vəli Nağıyev.
Bu isimlərlə yanaşı, nəqliyyat naziri Ziya Məmmədovun adı da hallandırılırdı. Amma məlum olanı budur ki, nəqliyyat nazirinin adı əleyhinə ifadə alınacaq personalar arasında yoxdur.

Seçki öncəsi P.Həşimlinin həbsi onun vasitəsilə hakimiyyət daxilindən müxalifət düşərgəsinə, xüsusən AXCP-yə maliyyə ötürülməsinin ifşa olunmasına hesablanmış addım olub. Guya P.Həşimlinin vasitəsilə bu şəxslər müntəzəm olaraq AXCP-yə maliyyə yardımları edirmişlər. Lakin P.Həşimli ondan tələb edilən ifadəni verməyib və seçkiöncəsi həbs edilən jurnalistə qarşı qəzəbi birə beş artırıb. Bununla yanaşı, belə məlumatlar da var ki, P.Həşimli adı çəkilən vəzifə sahibləri ilə münasibətlərinin olduğunu inkar etməyib, deyib ki, həmin şəxslər ona ara-sıra köməkliklər ediblər. Amma həmin köməkliklər heç bir formada AXCP ilə əlaqəli olmayıb.



AXCP sədrinin müavini Fuad Qəhrəmanlı deyir ki, P.Həşimlinin həbs olunaraq təzyiqlərə məruz qalması zor yolu ilə AXCP-yə qarşı kampaniyaya başlanılmasına hesablanıb: “Hakimiyyətdaxili münasibətlər o dərəcədə kəskinləşib ki, kimlərinsə ”vurulmasına" hazırlıq gedir. Buna görə də saxta əsaslar yaratmağa çalışırlar. Bu baxımdan səsləndirilən iddiaları təkzib edirik. Bu günə qədər korrupsioner rejimdən AXCP rəhbərliyinə və üzvlərinə 1 manat belə vəsait verilməyib. Ümumiyyətlə, AXCP-yə qarşı belə vəsaitin ötürülməsi mümkün deyil. Çünki AXCP korrupsioner rejimin varlığını apardığı demokratik mübarizə ilə təhdid edir. Korrupsioner rejimin nazir-oliqarxlarının AXCP-yə maliyyə yardımı göstərməsi haqda iddialar da ciddi qəbul edilə bilməz".

F.Qəhrəmanlı deyir ki, hakimiyyət bu günə qədər də Əli Kərimliyə və AXCP-yə qarşı çeşidli və əsassız ittihamlar səsləndirib: “Bu ittihamların heç biri doğrulmur. Çünki saxta və əsassızdır. Əllərində əsaslı bir qaralamaq imkanı olmadığından Pərviz Həşimlidən istifadə etməyə çalışırlar. Ancaq Pərviz bəy təbii ki, bu absurd ittihamları rədd edir və kifayət qədər mətanətlə bunlara sinə gərir. Məhz onun mətanətli və mübariz davranışı hakimiyyətə öz çirkin niyyətini həyata keçirməyə imkan vermədi. Üstəlik, hakimiyyətin müxalifətə qarşı düşmən mövqedə olmasını ortaya qoydu, öz siyasi rəqiblərini uydurma ittihamlarla sıradan çıxarmaq istəklərini bir daha təsdiqlədi”.

P.Həşimli sentyabrın 17-də digər Azərbaycan vətəndaşı Təvəkkül Qurbanovla birgə tutulub. Milli Təhlükəsizlik Nazirliyinin İstintaq Baş İdarəsi onlara qarşı Cinayət Məcəlləsinin 206.3.2 (qabaqcadan əlbir olan bir qrup şəxs tərəfindən odlu silahın və döyüş sursatının qaçaqmalçılığı) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini və döyüş sursatını əldə etmə, saxlama, daşıma) maddələri ilə cinayət işinə başlayıb.