Belarus politoloqu: “Batka həmkarına adətən pul problemi yarananda müraciət edir”

“Belarus prezidenti Aleksandr Lukaşenko Bakıya azərbaycanlı həmkarı İlham Əliyevdən pul istəməyə gedib”.
Bu sözləri tanınmış Belarus politoloqu Andrey Suzdaltsev deyib.

A.Suzdaltsev A.Lukaşenkonun Bakı səfərini Belarusun charter97.org saytına şərh edərkən deyib ki, təkcə Belarus prezidenti yox, bu ölkənin siyasi və biznes elitasının digər nümayəndələri də yollarını tez-tez Azərbaycan tərəfə salırlar.

“Belarus isteblişmentinin nümayəndələri Azərbaycan paytaxtını tez-tez ziyarət edirlər. Belarusun güc strukturlarının, Daxili İşlər Nazirliyinin və digər qurumların nümayəndələri Bakıya tez-tez gedib-gəlirlər. Bu - bir. İkincisi, Aleksandr Lukaşenko həmkarı İlham Əliyevə adətən pulla bağlı böyük problemləri yarananda müraciət edir. Yadıma gəlir ki, bir dəfə İlham Əliyev Batkanı ona verdiyi xırda məbləğli borcla xilas etmişdi. Əlbəttə, Batkanın aldığı məbləğ o qədər də böyük görünməyə bilər. Amma necə deyərlər, dama-dama göl olar. Nəzərə almaq lazımdır ki, gözdən düşmək Lukaşenkonun imicinə böyük zərbə olardı. Bu mənada Lukaşenko Bakıya yenə dilənməyə gedib” - deyə Belarus politoloqu öz ehtimallarını bölüşüb.

A.Suzdaltsev həmçinin qeyd edib ki, Belarus hökmdarı özünün neft problemlərinin həlli yollarını həmişə Bakıda görüb: “Lukaşenko Moskva ilə münasibətlərin kəskinləşib pozulacağı təqdirdə Azərbaycandan Odessa-Brodı neft kəməri vasitəsilə lazımi miqdarda neft almağa bel bağlayır. Lakin bu zaman da çox maraqlı vəziyyət yaranır. Çünki Belarusun neftayırma zavodları Rusiyadan xahiş-minnətlə alınan 23 milyon ton xam nefti heç bir halda emal edə bilmirlər. Buna görə də görünür, Lukaşenko xam neftin alqı-satqısı və təkrar satışı ilə məşğul olmaq üçün belə fəal surətdə imkan və variantlar axtarır və bu mövzu onun Əliyevlə görüşlərində həmişə gündəmdə olur”.



Xatırladaq ki, Belarus prezidenti Aleksandr Lukaşenko noyabrın 20-də Azərbaycana rəsmi səfərə gəlmişdi. Onun səfəri bu gün başa çatdı.

Onu da yada salaq ki, Azərbaycan bir neçə il əvvəl Belarusa bu ölkənin xahişi ilə 300 milyon dollar borc vermişdi. Rusiyaya qaza görə olan borcunu ödəyə bilməyən və qarşısına konkret 72 saat müddət tələbi qoyulan Belarus prezidenti Avropanın maliyyə təsisatlarından rədd cavabı alandan sonra borc üçün Bakıya müraciət etmiş və bu məsələ bir neçə saatın içində həll olunmuşdu. Belarus tərəfi Azərbaycanın bu jestini həmişə minnətdarlıq hissi ilə xatırlayır.