Novella Cəfəroğlu: “Gülər xanımın məhkəməsi digərlərindən yaxşı gedir”; Siyavuş Novruzov: “Biz prosesə getsək, bunu məhkəməyə təzyiq kimi qiymətləndirəcəklər”; Fazil Mustafa: “Kiminlə daha çox münasibəti olubsa, onlar daha çox həssaslıq nümayiş etdirməlidilər”
Sabiq deputat Gülər Əhmədovanın məhkəməsi sona doğru yaxınlaşır. Dekabrın 2-də G.Əhmədova son söz deyəcək və həmin gün hakimin hökm çıxaracağı da istisna deyil. Amma proses boyunca jurnalistlərin ən çox diqqətini cəlb edən məsələlərdən biri bu məhkəməyə qatılanların kimliyi oldu. Əsasən jurnalistlərdən və G.Əhmədovanın yaxın qohumlarından ibarət olan heyətə gözlənilənlərin əksinə olaraq, YAP-çılardan və deputatlardan heç kim qatılmadı.

Bundan başqa, adətən siyasi prosesləri izləyən, monitorinq aparan tanınmış hüquq müdafiəçiləri G.Əhmədovanın məhkəməsində nəyə görəsə gözə görünmədilər. Biz də bunun səbəbləri ilə maraqlandıq.



Dilarə Əliyeva adına Qadın Hüquqları Müdafiə Cəmiyyətinin sədri, Monitorinq Qrupunun üzvü Novella Cəfəroğlu bildirdi ki, 3 həftə bundan əvvəl G.Əhmədova ilə saxlandığı 1 saylı İstintaq Təcridxanasında görüşüblər. Onun sözlərinə görə, elə həmin vaxt ona məhkəməsində iştirak edəcəkləri ilə bağlı vəd veriblər: “Söz vermişdik ki, gedəcəyik. Amma mənim yaşım o yaş deyil ki, gedib məhkəmələrdə oturum. Cəmiyyətimizin xanım əməkdaşları isə prosesə gedirlər, müşahidə aparırlar. Biz hamının məhkəməsinə gedirik. Amma yaşımla bağlı olaraq bütün məhkəmələrə qatıla bilmirəm. Bizim təşkilatın əməkdaşları bildirdilər ki, Gülər xanımın məhkəməsi digər məhkəmələrdən daha yaxşı gedir. Siyasi məhbuslarınkından daha yaxşıdır. Bizim qızlar ”NİDA"çıların, Tofiq Yaqublunun, İlqar Məmmədovun məhkəməsinə də gedirlər. Müşahidələri odur ki, Gülər Əhmədovanın məhkəməsi onların hamısınınkından daha sakit keçir".

Müsahibimiz Kürdəxanıda G.Əhmədova ilə baş tutan görüşlərindən də danışdı. Dedi ki, sabiq deputat onlara “məni niyə müdafiə etmirsiz” deyə irad tutub: “Biz də dedik ki, saxlanma şəraitinizlə tanış olacağıq, məhkəmənizdə iştirak edəcəyik. Saxlandığı kamera adi kamera idi, orda ondan başqa iki qadın məhbus da vardı. Kamerada lüks şəraitin olması ilə bağlı deyilənlər yalandır. 4 çarpayı vardı kamerada. Adi şəraitli kamera idi”.
YAP sədrinin müavini Siyavuş Novruzov isə keçmiş deputat həmkarının, partiydaşının məhkəməsinə niyə qatılmadıqlarına aydınlıq gətirdi. Onun fikrincə, istintaq və məhkəmə prosesində hər hansı həmkarının bu məsələyə münasibət bildirməsi, qarışması əks tərəfdən məhkəməyə təzyiq kimi qiymətləndirilə bilərdi: “O baxımdan da kimliyindən asılı olmayaraq, hamı qanun qarşısında bərabərdir. Əgər prosesə qatılsaydıq, bu da məhkəməyə təzyiq kimi qiymətləndirilə bilərdi. Baxmayaraq ki, bu, belə qiymətləndirilməməlidir. Bilirsiz ki, qarşı tərəf, yəni Elşad Abdullayev dələduzun biridir. Amma onunçün fərqi yoxdur. Bunu görüb məhkəməyə təzyiq kimi qiymətləndirə və belə ictimai rəy formalaşdıra bilərdi”.

Müsahibimiz G.Əhmədovaya prokuror tərəfindən 4 il iş istənilməsinə də münasibət bildirdi. Dedi ki, bu, qanunla tənzimlənən bir məsələdir: “Bu, məhkəmə araşdırmasıdır. Həmkarlarının nə düşünməsindən asılı olmayaraq, qərar hakimindir, məhkəmənindir. Mən də bir insan kimi Allah qapısını açsın deyirəm. Amma qərara qarışa bilmərəm”.
“Gülər Əhmədovaya şərti cəza verilsə, keçmiş həmkarları buna sevinərmi” sualına cavabda isə S.Novruzov dedi ki, Allah-təalanın hamının qapısını açmasını arzulayır.
G.Əhmədovanın həbsinin ev dustaqlığı ilə əvəzlənməsi ilə bağlı müraciəti imzalayanlardan olan deputat Fazil Mustafa da sualımıza cavabında dedi ki, G.Əhmədova Yeni Azərbaycan Partiyasının üzvüdür və bu məsələ onun partiya yoldaşları tərəfindən diqqətdə saxlansaydı daha yaxşı olardı: “Hər halda, bir yerdə mübarizə aparıblar. Başqa partiyanın nümayəndələrinin YAP üzvünün məhkəmə prosesinə həssas yanaşmasını anlamaq olar. Deputat həmkarı kimi də kiminlə daha çox münasibəti olubsa, ailəvi yaxınlığı olubsa, onlar daha çox həssaslıq nümayiş etdirməlidilər. Bizim işlərin çoxluğu var. Digər tərəfdən, bizim onunla məsafəli münasibətimiz olub. Sadəcə, əlimizdən gələni etdik. Gördük ki, YAP üzvləri onun ev dustaqlığı ilə əvəz olunmasına imza atmadılar. Amma biz imza atdıq ki, onun həbsi ev dustaqlığı ilə əvəz olunsun. Bizim maraq dairəmizdə çox da geniş yer tutmur. Çünki bu proses partiya üzvlərini daha çox maraqlandırmalıdır”.

Müsahibimiz hesab edir ki, partiya üzvlərinin bu məsələdəki passivliyi də səbəbsiz deyil. Onun fikrincə, ümumən mətbuatda məsələyə əvvəlki maraq yoxdur: “Hamıda elə bir təsəvvür var idi ki, Gülər Əhmədova həbs olunandan sonra ölkədə korrupsiya tam durdurulacaq, heç kim heç kimdən rüşvət almayacaq. Amma bu həbsdən sonra rüşvətin də məzənnəsi artdı, korrupsiyanın da səviyyəsi yüksəldi”.

F.Mustafa hakimin sabiq deputatla bağlı verəcəyi qərardan nə gözlədiyini də dedi. Onun sözlərinə görə, Azərbaycanda məhkəmələr o qədər müstəqildir ki, əvvəldən müəyyən etmək olmur ki, nə qədər iş verə bilər.