Naxçıvan Ali Məclisi sədrinin xalası oğlunun həbsindən sonra yaxın qohumu da vəzifəsini itirdi; Binəqədinin icra başçısı Xaləddin İsgəndərov vergilər naziri Fazil Məmmədova güvənsə də, “Naxçıvan xanı”nı yenəcək gücdə deyil; bəs nə baş verir?
Binəqədi Rayon İcra Hakimiyyətinin başçısı Xaləddin İsgəndərov özünün birinci müavini Qəzənfər Novruzovu tutduğu vəzifədən azad edib. Modern.az saytının xəbərinə görə, bu barədə icra başçısı 7-ci mikrorayon Fərman Məlikov küçəsindəki “Xeyir-şər evi”ndə sakinlərlə keçirdiyi görüşdə məlumat verib. Q.Novruzovun işdə yol verdiyi nöqsanlara görə vəzifədən çıxarıldığını deyən icra başçısı birinci müavininin buraxdığı səhvlər barədə ətraflı məlumat verməyib.

Qeyd edək ki, bu görüşdə icra başçısı ilə yanaşı, müavinləri, aparatın şöbə müdirləri, məsul işçiləri, hüquq-mühafizə orqanlarının, dövlət idarə, müəssisə və təşkilatlarının, xidmət sahələrinin rəhbərləri və 136 nəfər mikrorayon sakini iştirak edib.
Q.Novruzovun adı müxtəlif qalmaqallarda hallandırılırdı. Eyni zamanda Binəqədi sakinləri arasında da ondan narazılıq edənlərin çox olduğu bildirilir.

Maraqlıdır ki, icra başçısının birinci müavinin çıxarılması xəbərindən dərhal sonra Q.Novruzovun adı Binəqədi Rayon İcra Hakimiyyətinin http:binegedi-ih.gov.az saytından çıxarılıb, birinci müavinlə bağlı qrafa boş qalıb.

“Yeni Müsavat” işdən çıxarılan Q.Novruzovla bağlı ilginc məlumatlar əldə edib. Məlumata görə, Q.Novruzov Naxçıvan Muxtar Respublikasının daxili işlər nazirinin müavini Səbuhi Novruzovun qardaşıdır. Səbuhi Novruzov isə Naxçıvan Ali Məclisinin sədri Vasif Talıbovun bacısının həyat yoldaşıdır. Onun bir qardaşı hazırda Bakı Şəhər İcra Hakimiyyətinin yaşıllaşdırma departamentinin rəisi, digər qardaşı isə Nizami rayonunun sosial təminat idarəsinin rəisi postlarını tutur.

Əldə etdiyimiz digər məlumata görə, Q.Novruzov bir aya yaxındır ki, işə çıxmırmış. Onun hətta ölkədən gizli çıxdığı barədə də xəbərlər vardı. İddia olunurdu ki, başçının birinci müavini rayon icra hakimiyyətinə dövlət büdcəsindən ayrılan 2 milyon manatlıq vəsaitin mənimsənilməsindən sonra işə gəlmirmiş. Qeyd edək ki, bu mənimsəmə faktı ilə bağlı Binəqədi İH-in Yaşıllaşdırma İdarəsinin müdiri həbs olunub. Aparılan araşdırmalar nəticəsində Binəqədinin abadlaşdırılması və yaşıllaşdırılması işlərinə məsul olan Q.Novruzovun məhz həmin müəmmalı 2 milyon məsələsində əsas suçlu olduğu müəyyənləşib. Bundan sonra isə onunla “əlaqə kəsilib”. Hətta icra başçısı ona “gəlsin, söhbət edək” mesajı yollasa da, Q.Novruzov kabinetinə qayıtmayıb.

Prezidentinin 26 aprel 2012-ci il tarixli sərəncamı ilə Binəqədiyə icra başçısı təyin edilən X.İsgəndərov bir sıra vəzifəli adamlarla yola getmirdi. Onların sırasında YAP-ın Binəqədi təşkilatına 2007-ci ildən rəhbərlik edən Nəbi Xəlilov da vardı. Deputat Rafael Cəbrayılovla iş ortağı olan N. Xəlilov bu ilin iyul ayında vəzifəsindən getdi. X.İsgəndərov təşkilatın yeni sədri vəzifəsinə yaxın adamı, Binəqədi İHN-in Ərazi və yerli özünidarəetmə orqanları ilə iş şöbəsinin müdiri Ramiz Göyüşovu seçdirdi. Məlumatlı mənbənin dediyinə görə, Q.Novruzovla da X.İsgəndərovun pul qalmaqalından əvvəl də münasibətləri gərgin olub. Binəqədinin yaşıllaşdırmasına ciddi fikir verən icra başçısı, nəhayət, yeyinti faktından sonra Q.Novruzovla “qırılmağa” bəhanə tapıb.

Aydındır ki, icra başçısı V.Talıbov kimi qüdrətli adamın qohumunu yalnız öz ambisiyaları səbəbindən sıxışdıra bilməzdi. Q.Novruzovun 2 milyonluq mənimsəmədə əli varsa belə, onu Bakıdan didərgin salmaq X.İsgəndərovun təkbaşına bacara biləcəyi iş deyil. X.İsgəndərov qaynı olan vergilər naziri Fazil Məmmədova arxalansa belə V.Talıbovla üz-üzə gələ bilmək gücündə deyillər. Bu fakt onu göstərir ki, V.Talıbovun zəiflədilməsi prosesi daha da sürətlənib və yerli məmurlar da, sadəcə, sifarişi icra edirlər.

V.Talıbovun “vurulması” barədə xəbərlər bu ilin avqust ayının 7-də xalası oğlu, Azərbaycanın sabiq xarici iqtisadi əlaqələr naziri əvəzi işləmiş Nicat Quliyevin həbsindən sonra daha da intensivləşib. Məlumdur ki, artıq 5 aya yaxındır həbsdə olan N.Quliyev MTN-in xüsusi əməliyyatı nəticəsində həbs edilib. MTN-in rəsmi açıqlamasında bildirilib ki, N.Quliyev Cinayət Məcəlləsinin 228.1-ci (Qanunsuz olaraq odlu silah, onun komplekt hissələrini, döyüş sursatı (yivsiz odlu ov silahı və həmin silah üçün döyüş sursatı istisna olmaqla) partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) maddəsində nəzərdə tutulan cinayəti törətməkdə şübhəli bilinir. N.Quliyev isə bu müddətədək izahat vermir və ittihamları rədd edir.

V.Talıbov da bu həbsi daha çox Bakıdakı - hakim komandadakı rəqiblərindən görür. Məlumdur ki, “Naxçıvan xanı” uzun müddətdir ki, Bakıdakı bəzi nazirlərin muxtar vilayətə gəlməsinə qadağa qoyub. Bu və digər səbəblərdən Bakıda çoxlu güclü düşmən qazanan V.Talıbov bu əməliyyatı özünə qarşı qurulmuş kompromat hesab edir. Son aylar Vasif Talıbov Bakıya az-az gəlir. Məlumata görə, sonuncu dəfə Bakıya oktyabrın 19-u səhər inauqurasiya mərasiminə şəxsi təyyarəsi ilə gələn V.Talıbov tədbirdə iştirak etdikdən dərhal sonra Naxçıvana qayıdıb. Mərasimdən sonra da heç kimlə xüsusi vidalaşmadan zalı tərk edib. V.Talıbovun Bakıda yaşayan oğlanlarının da son vaxtlar bahalı avtomobilləri ilə küçələrdə gözə dəymədikləri deyilir. İddialara görə, hansısa səbəbdən onların mühafizəsinin gücləndirildiyi də söylənir.

İndi belə görünür ki, V.Talıbovun Bakıdakı uzantıları da yavaş-yavaş kəsilir və ondan narazı olan məmurlar bu prosesi həm də qisas üçün fürsət bilir.