“Biz Azərbaycan xalqını Azərbaycan hakimiyyətindən ayırırıq. Onları bir tutmuruq, eyniləşdirmirik. Biz Azərbaycan xalqı uğrunda çox şeyə hazırıq. Amma təəssüf ki, Azərbaycan hakimiyyəti Türkiyənin bu münasibətindən sui-istifadə edir. Erməni-türk barışığına məhz Azərbaycan hakimiyyəti mane olur. Azərbaycanda yarımdiktatura rejimi yaranıb”.

Virtualaz.org saytı xəbər verir ki, bu sensasion bəyanatla Qafqaz Strateji Tədqiqatlar Mərkəzinin rəhbəri, professor Hasan Oktay çıxış edib. O, bu fikirlərini İstanbuldakı Mərmərə Universitetində keçirilən və öz işinə dekabrın 2-də başlayan “Xəzərdən Qara dənizə qədər: strateji baxış” adlı beynəlxalq simpoziumdakı çıxışında bildirib.

Türkiyə siyasi isteblişmentində kifayət qədər yaxşı tanınan aparıcı türk analitikin sözlərinə görə, Azərbaycan hökuməti öz siyasəti ilə regionda fəal sülh yaradıcılığı prosesinə mane olur: “Azərbaycan öz yolunu müəyyən eləməlidir: o, ya Qarabağı və işğaldakı digər torpaqları azad etmək niyyətini qəti şəkildə ortaya qoymalı, ya həmin torpaqlardan birdəfəlik imtina etməli, ya da Suriyanın təcrübəsini əsas götürərək bu regional münaqişəni onilliklər müddətinə dondurmalıdır. Amma Azərbaycan Qarabağ problemi ilə bağlı son və qəti mövqeyini işləyib hazırlamağa və ortaya qoymağa tələsmir. Azərbaycan hakimiyyətinin məntiqindən belə çıxır ki, Qarabağın işğal olunmasında sanki Türkiyə günahkardır və Türkiyə bu məsələdə Ermənistana hətta kömək də edib. 2009-cu ildə Bakıda hansı isterika yaşandı? Əlbəttə, heç kimdə şübhə yoxdur ki, rəsmi Bakının o zaman apardığı təbliğatın tezislərini onun qulağına erməni-türk sülh prosesinə hücuma keçən Kreml, habelə Rusiyanın xarici işlər naziri Sergey Lavrov pıçıldamışdı”.



Türkiyənin nəhəng müxalifət partiyasının tanınmış xadimi olan (Hasan Oktay ötən parlamnet seçkilərində bu milliyyətçi partiyanın siyahısında da var idi) analitikin birmənalı olmayan bu qiymətləndirməsi bu zaman zalda olan azərbaycanlı ekspertlərin və QHT nümayəndələrinin narazılığına səbəb olub. Amma professor Hasan Oktay tədbirin azərbaycanlı iştirakçılarının narazılığına və yerdən verdikləri replikalara məhəl qoymayaraq rəsmi Bakının ünvanına tənqidi çıxışını davam etdirib.

O deyib: “Azərbaycan öz siyasəti ilə Türkiyəni özünün diplomatik girovuna çevirib. Təsəvvür edin, xarici işlər naziri Əhməd Davudoğlunun İrəvana rəsmi səfəri bu günlərdə məhz ona görə təxirə salındı ki, “Sabah” qəzetində Türkiyə ilə Azərbaycan arasında Azərbaycanın iki rayonunun işğaldan azad edilməsinə dair məsləhətləşmələrin aparılmasına dair yoxlanılmamış məlumat dərc edildi. Tamamilə mümkündür ki, bu informasiya mətbuata Azərbaycan nümayəndələri tərəfindən ötürülüb. Belə hallar bizim Qafqazdakı siyasətimizə zərbə vurur. Mən bir şeyi başa düşə bilmirəm: Azərbaycan nə istəyir? Əgər Qarabağın azadlığını istəyirsə, gözləsin, Türkiyə bu məsələdə ona kömək edəcək. Yox, əgər Qarabağdan imtina etmək istəyirsə, onda bunu açıq demək lazımdır”.

Türk analitikin iddiasına görə, Azərbaycanın hazırkı siyasi rejimi Qarabağın Azərbaycanın tərkibinə qayıtması imkanlarını istisna edir: "Çünki Bakıda yarımdiktatura rejimi hökm sürür. Ermənilərin təbliğat maşını isə Azərbaycan hakimiyyətinin antidemokratik xarakter daşımasını tez-tez qabardır, bildirir ki, bəs biz nə edək, o ölkənin tabeliyinə necə qayıdaq. Əliyev hakimiyyətdə nə qədər qalacaq? Əgər Cəmil Həsənli, yaxud da digər bir müxalifətçi prezident olsaydı, yeni hakimiyyətin Qarabağ siyasəti bəyəm antimilli xarakter daşıyacaqdı?!"

Professor Hasan Oktayın son sözləri şok effektli idi. Onun sözlərinə görə, Türkiyə ilə Ermənistan arasında heç bir problem qalmayıb - yeganə əngəl Qarabağ məsələsidir.

Təəccüblüsü budur ki, H.Oktayın bu mövqeyini digər türk politoloqu, professor Nesrin Sarıahmedoğlu da dəstəkləyib. O da həmkarının fikirlərini təkrarlayıb: "Türkiyənin Ermənistanla heç bir problemi qalmayıb".

Türk politoloqlarının bu mövqeyi zaldakı azərbaycanlıların emosional etirazlarına və narazılığına səbəb olub.

Azərbaycan Atatürk Mərkəzinin əməkdaşı, ictimai fəal Əkbər Qoşalı türk analitiklərinin çıxışına etirazını bildirib: "Mən özüm Ermənistandan çıxmış qaçqınam. Ermənilər 1988-ci ildə bizi qırmağa başlaynda bizə "azərbaycanlı" demirdilər, bizi "türk" adlandırırdılar. Ermənistan bəyəm Türkiyəyə qarşı ərazi iddialarından imtina edib? Ermənistan bəyəm "erməni genosidi"nin tanıdılması üçün ideoloji hücumlarına son qoyub?"

Bununla da türk alimləri ilə azərbaycanlı ictimai fəallar arasında qızğın mübahisələr başlayıb. Simpoziumun aparıcısı olan professor Belkis Ulusoy Nalçıoğlu qızğın mübahisələri kəsmək üçün fasilə elan etməyə məcbur olub, sonra da belə deyib: "Təəssüf ki, biz erməni ekspertlərini də bura dəvət etməmişik".

P.S. virtualaz.org-un redaksiya qeydi:



Türkiyənin Qafqaz Araşdırmaları Mərkəzinin rəhbəri Hasan Oktayın İstanbulda keçirilən beynəlxalq konfransda etdiyi bu çıxış qardaş ölkənin siyasi, biznes və ekspert çevrələrində Azərbaycanın milli maraqlarını öz məkrli maraqlarına qurban verməyə hazır olan adamların hələ də mövcud olduğunu bir daha nümayiş etdirir.

Belələri hər fürsətdə Qarabağ münaqişəsi həll olunmadan və Azərbaycan ərazilərinin işğalı problemi ortadan qalxmadan Ermənistanla sərhədlərin açılması üçün lobbiçilik edirlər. Bu da mümkün olmayanda isə Türkiyə mediasında Azərbaycan hakimiyyətinə, onun rəhbərliyinə qarşı “qara piar” təşkil edirlər.

Axı 2009-cu ildə Azərbaycan hakimiyyətinin qətiyyətli addımları və Türkiyə ictimaiyyətinin öz mövqeyini ortaya qoyması həmin çevrələrin və Vaşinqtondakı dəstəkçilərinin məlum “erməni açılımı” projesini pozub. Sürixdə imzalanan protokollar həyata keçirilməmiş qalıb və bölgədə Azərbaycanın mövqeyini, maraqlarını hesaba almadan qurulan planlar iflasa uğrayıb.

Nəticədə Türkiyədə Azərbaycanla münasibətlərə zərbə vurmaq hesabına Ermənistanla ticarət qurub varlanmaq istəyənlərin arzuları reallaşmayıb. Eləcə də Azərbaycanın mövqeyinə məhəl qoymadan Ermənistanın guya Türkiyə üzərindən Qərbə inteqrasiyası barədə boş xəyallar quran strateqlərin planları boşa çıxıb.

Bu baxımdan təsadüfi deyil ki, H.Oktay kimiləri əllərinə düşən ilk fürsətdə Azərbaycanın xarici siyasət kursunu qaralamağa çalışırlar.