İranın sabiq kürd deputatı: “Qərbi Azərbaycanın adını Şimali Kürdüstan qoyun!”

İrandakı kürd separatçıları Azərbaycana qarşı təhdidlərini və iddialarını davam etdirir.

Virtualaz.org musavat.com-a istinadən bildirir ki, Mahabadın İran parlamentindəki millət vəkili Osman Əhmədinin Şimali Kürdistanın yaradılması təklifindən sonra Sənəndəcin keçmiş deputatı da oxşar mövqe sərgiləyib. Cəlal Cəlalizadə Facebook səhifəsində “Azərbaycan Türkistan deyil” başlığı altında yazı yazıb. O, aşağıdakı cəfəng iddialarını ortaya qoyub: “İstinad edə biləcəyimiz sənədlərdən biri tarixi sənədlər, mövcud mətnlər, kürd və azəri şəxsiyyətləri və türklərin Orta Asiyadan bu bölgəyə gəlməsidir. Əyyubilər, Səfəvilər, Saib, Xaqani və s. kimi minlərlə kürd alim, şair və yazıçının bu bölgədən çıxması, coğrafi adlar və kəndlərin böyük əksəriyyətinin kürd olması ciddi faktdır. Həmçinin mərhum Kəsrəvi və digər tarixçilərin qeydləri də sübut edir ki, bu torpoqlar hansı millətə aiddir! Maraqlıdır ki, Saib Təbrizinin ləhcəsi Horami kürdcəsi olub və bu barədə çoxlu dəlil var!”



GunAz.TV xəbər verir ki, keçmiş fəaliyyətlərində terror qruplaşmaları ilə yaxın əlaqədə olduğu kimsədə şubhə doğurmayan keçmiş deputat hətta Osman Əhmədidən də irəli gedib. O, Qərbi Azərbaycanın Şimali Kürdistan adlanmalı olduğunu yazıb: “Nə problem var ki, bu vilayətin bir hissəsi deyil, elə bütövü Şimali Kürdistan adlansın?!”

Bu arada Urmiyənin İran parlamentindəki kürd millət vəkili Abid Fəttahi də gözlənilən mövqe tutub. O, Qərbi Azərbaycanın vilayətinin parçalanması məsələsi siyasi məsələ deyil və kimsə buna siyasi don geyindirməsin. Bu sadəcə vilayətlərin sayını artırmaq məqsədi güdür- deməklə O.Əhmədinin Azərbaycan torpaqlarında Kürdüstan vilayətinin yaradılmasına dair irəli sürdüyü təklifi dəstəkləyib.

Qeyd edək ki, son vaxtlar Azərbaycan torpaqlarında “Kürdüstan” yaradılmasına cəhd göstərənlər xeyli fəallaşıb.