“Bizə məlumat çatıb ki, şəhərin mərkəzində olan rabitə hərbi hissəsi tamam başqa profilli hərbi hissə ilə birləşdirilib, onun ərazisi isə Müdafiə Nazirliyinin rəhbərliyində təmsil olunan şəxslərin yaxınlarına tikinti fəaliyyəti üçün satılmağa razılaşdırılıb. Bizdə o hərbi hissələrin şəkilləri, video görüntüləri var. Əgər qısa bir müddətdə orda tamam başqa bir işlər həyata keçiriləcəksə, biz bu haqda ictimaiyyəti lazımlı şəkildə məlumatlandıracağıq”.

Bunu hərbi ekspert Üzeyir Cəfərov Bakıda ləğv edilmiş hərbi hissələrin yerləşdiyi ərazilərin təyinatı üzrə istifadə edilib-edilməməsinə cavab olaraq “Axar.az” dedi.

“Müdafiə Nazirliyinin keçmiş SSRİ-dən qalmış ərazilərini yavaş-yavaş kiçiltməyə başlayıblar”

Üzeyir Cəfərov nazirliyin ölkə üzrə bir neçə hərbi hissəni ləğv etdiyini deyir:

“Ləğv olunan hərbi hissələrin sayı üçdən artıqdır. Çəkinmədən deyirəm ki, bu məlumatın da mənbələrindən biri mənəm. Ləğv olunan hərbi hissələrin tam əksəriyyəti Nəcməddin Sadıqovun tabeliyində olan rabitə və kəşfiyyat hərbi hissələridir. Yenə də deyirəm ki, bu Bakıda, Bakı ətrafında və ondan kənarda olan hərbi hissələrdi. Müdafiə Nazirliyi deyir ki, Bakıda üç hərbi hissə ləğv olunub. İndi Müdafiə Nazirliyi Bakıda ləğv olunan hərbi hissələrin yerini ictimaiyyət üçün açıqlasa, yaxşı olar. Amma adına hərbi sirr qoyub, açıqlamır!

Bundan başqa, Biləcəri qəsəbəsində, Salyan şosesində eyni hal yaşanır. Müdafiə Nazirliyinin keçmiş SSRİ-dən qalmış ərazilərini yavaş-yavaş kiçiltməyə başlayıblar. Guya Müdafiə Nazirliyinin tabeliyində olan bəzi hərbi hissələrinin təşkilat ştat strukturunun optimallaşdırılması həyata keçirilir”.

Məgər Azərbaycan Silahlı qüvvələrinə rabitəçilər, kəşfiyyatçılar, xüsusi təyinatlılar lazım deyil?

Ekspert həmçinin iddia edir ki, hərbi hissələrin ləğv olunmasında Müdafiə Nazirliyinindəki rəhbər şəxslərin kommersiya maraqları var:

“Nazirliyin mətbuat xidməti açıqlama verir ki, orduda gedən islahatlar birbaşa Prezidentin göstərişi ilə baş tutur. Amma mən Müdafiə Nazirliyi mətbuat xidmətindən başqa nə Prezidentin təhlükəsizlik üzrə müşaviri Vahid Əliyevdən, nə də yüksək səlahiyyətli məmurlardan bu haqda eşitmişəm. Bunu Prezidentin adına bağlayırlar ki, orduda gedən lazımsız islahatlara susaq. Lakin bu belə olmayacaq. Həmin hərbin hissələrin ərazisini biz çox gözəl bilirik, sadəcə, etik baxımdan bunu açıqlamırıq. Bunu ilk dəfə “Axar.az”a deyirəm. Artıq böyük biznes iddiasında olan bəzi şəxslər təklif veriblər. Çox təəssüflər olsun ki, o təklifə əsasən Müdafiə Nazirliyi ərazisində olan iki beşmərtəbəli bina sökülür. Bütün idarələr oradan köçürüləcək. O binaların yerində yeddimərtəbəli yeni binalar tikiləcək. İndi sual olunur, bizim müdafiə sahəsinə pul ayrılıb deyə, indi hər nazirlik özünə yeni binalar tikməlidir? Onsuz da bu binalara keçmiş SSRİ zamanında SSRİ-nin ən nəhəng cənub istiqamət qoşunlarının mərkəzi qərargahı olub. Beş keçmiş SSRİ respublikası Bakıdakı həmin Müdafiə Nazirliyinin məskunlaşdığı ərazidə olan qərargaha tabe idilər. İndi nə ehtiyac yaranıb o binaları sökürlər, yerinə yeni binalar tikirlər? Aydın məsələdir ki, tikinti-söküntü işində özlərinə yaxın şəxslərin biznes maraqlarını təmin edirlər. Bunu başa düşdük, amma bu hərbi hissələrin ləğv olunmasını anlaya bilmirik. Məgər Azərbaycan Silahlı Qüvvələrinə rabitəçilər, kəşfiyyatçılar, xüsusi təyinatlılar lazım deyil?

Bu sadəcə biabırçılıqdır”.

Hərbi ekspert Üzeyir Cəfərovun səsləndirdiyi bəzi müdhiş ittihamlarla bağlı qarşı tərəfin mövqeyini öyrənmək üçün Müdafiə Nazirliyinin mətbuat xidmətinə yeni qaydalara uyaraq, yazılı müraciət göndərilib. MN-nin rəsmi mövqeyi “Axar.az”a daxil olan kimi oxuculara təqdim edəcəyik.