İxtisara salınan bələdçilər növbəti aksiyanı keçirdilər; onlar Dəmir Yolu İdarəsinin rəhbərliyi haqda sərt açıqlamalar verdilər: “Ən çox rüşvətxorluq, qanunsuzluq indiki idarə rəhbərlərinin vaxtında yaranıb”
“Azərbaycan Dəmir Yolları” QSC-nin kişi bələdçilərinin etirazları davam edir. Onların etirazına səbəb MDB ölkələri istiqamətindəki xətlərdən çıxarılmaları, yerlərinə, beynəlxalq xətlərə qadın bələdçilərin yerləşdirilməsi və bu səbəbdən maaşlarının azalmasıdır. Etirazların nəticəsi isə hələ də yoxdur.

Yanvar ayının 11-dən başlayan və hələ də davam edən bələdçi aksiyalarına dünən biri də qatılıb. Bələdçilər yanvarın 13-də Prezident Administrasiyasına etdikləri müraciətin nəticəsini öyrənmək üçün administrasiyasının qarşısına toplaşıblar. Oradan aldıqları cavabla razı olmayan bələdçilər məhkəmədən gələcək qərarı gözləyirlər. Bələdçilərin dediklərinə görə, onların haqları bərpa olmadan bu yoldan əl çəkən deyillər.
Bələdçilərdən Fərhad Səlimovun dediklərinə görə, internet üzərindən online alınan biletlərdə ən böyük haqsızlıq edilir: “”Azərbaycan Dəmir Yolları" QSC-nin rəhbərliyi bizi haqsız yerə səriştəsizlikdə, sərnişinlərə keyfiyyətsiz xidmət göstərməkdə, qanunsuz işlərdə günahlandırır, amma özləri ən böyük qanunsuzluqlarla məşğuldurlar. İnternet üzərindən online satılan biletlərdə insanlara zülm edirlər və onları aldadırlar. Bir nəfər online bilet alan zaman ona ən pis yerləri, məsələn, tualetin yanındakı kupeni satırlar. Çünki online satış onlara sərf etmir, çalışırlar ki, vətəndaş gəlib bileti kassadan alsın. Səbəb isə bundan ibarətdir ki, hər bilet satışı zamanı sərnişindən əlavə pul alınır. Bu pullar isə rəhbərliyin cibinə gedir. Əlbəttə ki, online satış onlara sərf etməz. Bizi qanunsuz əməllərdə günahlandırırlar. Bu qədər bələdçinin hamısı qanunsuz əməllərlə məşğuldursa, niyə bizi tutmurlar? Bunların hamısı şərdir, böhtandır. Utanmırlar, xəcalət çəkmirlər ki, bu qədər ailə başçısına şər atırlar".

Bələdçi Cavanşir Qafarovun dediklərinə görə, haqlarını tələb etdikləri üçün onlara şər atmağa başlayıblar: “Elyar Muradov deyir ki, guya yeni qatarlar gətirilib. Amma bu düz deyil. Yeni adı verilən qatarlar əslində köhnə qatarlardır, sadəcə, təmir edilib və rənglənib. Bunun sayəsində isə böyük pullar yeyilib. Bizə xalq düşməni, narkotik daşıyıcısı adı verirlər. Bunun səbəbi isə haqqımızı tələb etməyimizdir. Sabah başqa suçlamalar da ortaya çıxsa təəccüblənmərəm. Biz heç bir qanunsuz iş görmürük, halal zəhmətimizlə pulumuzu qazanmağa çalışırıq, ona da bunlar imkan vermirlər. Əsl xalqı aldadan Arif Əsgərovdur, Elyar Muradovdur, Ziya Məmmədovdur. Bunlardır bizim haqqımızı yeyənlər, camaatı aldadanlar. Biz heç vaxt narkotik kimi qanunsuz bir işə bulaşmarıq. Bizim ailələrimiz, uşaqlarımız var, heç birimiz istəmərik onların gələcəyini zəhərləyək”.
Digər şikayətçi Adil Balaxanovun dediklərinə görə, ən çox rüşvətxorluq və qanunsuzluq əməlləri indiki idarə rəhbərlərinin vaxtında yaranıb: “38 illik iş stajım var. Araşdırsanız görərsiniz ki, ən çox rüşvətxorluq, qanunsuzluq indiki idarə rəhbərlərinin vaxtında yaranıb. Deyirlər ki, kişi bələdçilər işləmir, yaxşı xidmət göstərmir. Bu idarənin əs pis vaxtlarında, ən ağır dövrlərində bu idarədə çalışan kişi bələdçilərlə, indi ixtisara düşən bələdçilər eyni insanlardı. Bu idarəni halal tərimizlə, zəhmətimizlə çalışıb ayağa qaldırmışıq, indi bu kişi bələdçilər lazım deyil?”

Bələdçilərin dediklərinə görə, mətbuatda gedən xəbərlərdən sonra onlara bir neçə ləvazimat veriblər: “Etirazlarımızdan sonra bizə iki ədəd sabun, tualet kağızı, döşəmə taxtası veriblər. Bu, qatarın tələblərini ödəmir. Bunu onlar özləri də yaxşı bilirlər. İndiyə kimi bizə siyahı üzrə düşən ləvazimatları mənimsəyirdilər. Bundan sonra bəlkə haqqımızı qaytararlar. Bizim məhkəmə prosesimiz davam edir. Məhkəmədə Elyar Muradov deyir ki, guya etirazçı bələdçilərin sayı cəmisi 11 nəfərdir. Bu, tamamilə yalandır. Şikayətçilərin sayı 100-ə yaxındır. Ehtiyac olsa öncədən günahsız yerə işdən çıxarılan 400 nəfər işçi də haqqını tələb etmək üçün məhkəməyə gələ bilər. Nə etsələr, xeyri yoxdur, biz haqqımızı onlardan alacağıq”.

Qeyd edək ki, “Azərbaycan Dəmir Yolları” QSC-nin Sərnişindaşımaları Departamentinin rəisi Elyar Muradov musavat.com-a açıqlamasında kişi bələdçilərin yeni qatarlara buraxılmama səbəbi kimi onların sərnişinlərə düzgün xidmət göstərməmələrini və qanunsuz yüklər daşımalarını göstərmişdi.

Mövzunu davam etdirəcəyik.