Madrid “Real”ının futbolçusu Kriştiano Ronaldo İspaniya La Liqasının 22-ci turunda dünən “Ateltiko”ya uduzduqları oyundan (0:4) sonra qadın jurnalistə qarşı hörmətsizlik edib.

Portuqaliyalı hücumçu TV3 telekanalının müxbirinin ona verdiyi sualdan sonra özündən çıxıb.

Qadın jurnalist Ronaldodan “Kordoba” ilə matçda qırmızı vərəqə aldıqdan sonra formasındakı emblemi silməsinin səbəbini soruşub. Ronaldo isə suala sərt reaksiya verib:

“Bugünkü matç haqda soruşmayacaqsınız? “Kordoba” ilə oyun 3 ay əvvəl olub”.

Müxbirin israrla sualın cavabını almaq istədiyini görən futbolçu onu təhqir edib: “Niyə bu qədər maraqlanırsınız? Ağıllı müxbir olsaydız, bugünkü oyundan sual verərdiz. Amma bunu etmədiz. Bağışlayın, savadlı deyilsiz”.

Qeyd edək ki, La Liqanın 20-ci turunda “Kordoba” ilə oyunda Ronaldo rəqib futbolçuya qarşı etdiyi kobud hərəkətə görə qırmızı vərəqə alıb və iki oyunluq cəzalandırılıb. O, qırmızı vərəqə alıb, meydanı tərk edəndə formasındakı “Real”ın embleminə toxunaraq nəyəsə işarə edib. (qol.az)