Cüdo Federasiyasının prezidenti Fizuli Ələkbərov bu idman növünün gələcəyini məhv edir

Cüdo üzrə gənclər millimizin üzvləri avqustun 17-də etiraz aksiyası keçiriblər. "Koroğlu" stansiyasının yaxınlığında yerləşən parkda toplaşan idmançılar media nümayəndələrinə etirazlarının səbəblərini açıqlayıblar.

Məsələ burasındadır ki, Azərbaycan Cüdo Federasiyadan idmançılara Dünya və Avropa birinciliklərinə aparılmayacaqlarını söyləyiblər. Onlara "Pul yoxdur, gedin nə istəyirsinizsə, onu da edin" deyiblər. İdmançıların etirazları da buna görədir.

Cüdoçularımızın sözlərinə görə, onlara diqqət ayrılmır: "Biz hər zaman layiqli yerlər qazanmışıq. Uğurlarımız olub. Amma maddi dəstək verilmir. Qarşıda iki güclü yarış var. Dünya və Avropa yarışlarında iştirak etmək istəyirik. Amma Cüdo Federasiyası bizə kömək etmir. Nə məşq edə bilirik, nə də buna şərait var. Məşq olmadan biz nə edə bilərik? Heç nə... Gənclərdən ibarət yığma komandanı unudublar. Federasiya bizə dəstək olmasa, bizim əlimizdən heç nə gələ bilməz".



Cüdo üzrə gənclər millimizin üzvü Firudin Dadaşov deyir: "Müəllimimiz deyir ki, bizdən asılı bir şey yoxdur. Gedirik federasiyaya... Bizə rədd cavabı verirlər. Deyirlər ki, maliyyələri yoxdur. Yeniyetmələr öz hesablarına Avropa və Dünya Çempionatına getdilər. Bu, çox davam edə bilməz. Gənclərə indi dəstək verməsələr, gələcəkdə onların heç biri uğur əldə edə bilməyəcək. Cüdonun gələcəyi bu gedişlə sual altında qalacaq".



Haqlarını tələb edən idmançılarımız bildirirlər ki, onların tək istəyi dəstəkdir: "Bizim tək istəyimiz yarışlara qatılıb, uğurlar əldə etməkdir. Qalib olub, bayrağımızı birinci pilləyə yüksəltməkdir. Bunun üçün də bizə dəstək lazımdır. Çünki qarşıdan Avropa Çempionatı gəlir. Bu yarışmada iştirak etmək üçün hər bir idmançıdan 1900 manat pul tələb edirlər. Kimin pulu varsa gedəcək, kimin yoxdursa qalacaq. Həmin idmançı bəlkə də yüksək yerləri tuta bilər. Amma maddi imkanı yoxdur deyə yarışdan kənarda qalacaq. Üstəlik bu iştirak qərarının veriləcəyi vaxt sentyabrın 7-də bitir. O günə kimi yarışda iştirak edəcək idmançıların siyahısı göndərilməlidir”.



Fizuli Ələkbərov yenə də diqqətsizlikdə ittiham edilir: "Bizə köməklik göstərməli olan şəxs Azərbaycan Cüdo Federasiyasının prezidenti Fizuli Ələkbərovdur. O da deyir ki, "Pul yoxdur". Əvvəllər də bu problemlər var idi. Amma bu qədər qabarıq deyildi. Əsas yığma komanda yarış öncəsi məşqlər edəndə biz də gedirdik. Bu il isə heç bu da yoxdur. Öz zalımızda məşq etməklə heç kim gedib, Avropa Çempionatında yer tuta bilməz. Bizə normal şərait və məşq lazımdır".

Cüdoçular prezidentə müraciət edəcəklər: "Biz qərara almışıq ki, Prezident İlham Əliyevə və Mehriban Əliyevaya məktub yazaraq, müraciət edək. Biz idmançıyıq. Yarışlara qatılmaq istəyirik. Ölkəmiz üçün uğur əldə etmək istəyirik. Xahiş edəcəyik ki, yardım etsinlər ki, bizə şərait yaradılsın".



Məlumat üçün qeyd edək ki, cüdoçuların bu tipli etirazları dəfələrlə olub. Bakıda keçirilən Avropa Çempionatında cüdoçularımız uğursuz nəticə əldə etdilər. Bundan sonra isə yarışda iştirak edən qadın cüdoçularımız bütün günahın federasiyasının prezidenti Fizuli Ələkbərovda olduğunu deyirdilər: “Bizdən heç kim medal gözləyə bilməzdi. Axı nəticə qazanmaq üçün gərək təlim-məşq toplanışı keçirəsən. Bizim isə belə şansımız olmadı. Federasiya rəhbəri Füzuli Ələkbərovu nə vaxt gördüyümüzü xatırlamıram. Nə yarışlardan öncə, nə də sonra gəlib, bizimlə maraqlanmayıb. Yarış günü tatamiyə çıxmaq üçün kimano verməli idilər. Təsəvvür edin ki, biz düşüb, ondan-bundan kimano axtarırdıq. Öz pulumuza gedib aldıq ki, kimanosuz qalmayaq. Kim bizdən nəticə tələb edə bilər ki? Mən 11 ildir ki, cüdodayam. Hələ görməmişəm ki, Füzuli Ələkbərov gəlib, problemlərlə maraqlansın".

Bu ilin fevral ayında isə cüdo üzrə yığma komandamızın üzvləri 3 ay maaş ala bilmədikləri üçün etiraz aksiyası da keçirmişdilər.



ederasiya rəhbərinin idmançılara qarşı bu qayğısızlığı, yarışlarda özünü büruzə verir. Bir neçə idmançı uğur qazanır. Onlar da yarışlara öz hesabları sayəsində qatılırlar. Yarışda iştirak üçün lazım olan maddi vəsaiti idmançı özü tapır. Məşq edir, yarışda uğur qazanır. Bu uğuru isə federasiyanın adına yazırlar. Hansı ki, federasiya idmançılara heç bir maddi dəstək vermir.

Bakıda keçirilən I Avropa Oyunları zamanı iştirak edən 18 idmançımızdan cəmisi 1 nəfər yer tuta bilmişdi. Bu göstərici belə, çox şeydən xəbər verir.

Fizuli Ələkbərov maliyyə problemlərinin olduğunu deyir. Amma hər il dövlət tərəfindən idmana milyonlarla vəsait ayrılır. Bəs bu pullar hara xərclənir?

Məhəmməd Türkmən,
Fotolar müəllifindir.