Türkiyədə Soma mədənindəki faciədən sağ qurtulmuş Həsən Dəmirçi o dəhşətli anları media ilə bölüşüb

Türkiyədə Soma mədənindəki faciədən saatlar sonra mədəndən sağ çıxarılan Həsən Dəmirçi baş verənləri media nümayəndələri ilə bölüşüb. Mədənçi xilas olmaqla özünü sanki yenidən dünyaya gəlmiş kimi hiss etdiyini deyib.
31 yaşlı mədənçi bildirib: "Saat 15:00 radələrində işim qurtardı. Elə çıxacağım vaxt qara bir duman üstümüzə gəldi. Bu vaxt bizə «yuxarı çıxmayın, qaz maskalarınızı taxın, aşağı enin» dedilər. Təkcə mən deyildim, yanımda 100-110 nəfər var idi. Sonra işçilərin hər hansı fövqəladə hal zamanı sığına biləcəyi yerlər var idi, ora getdik. Orada bizə təmiz hava verildi. Təmiz hava alan kimi bir az rahatlaşdıq, amma yenə də zəhərli hava da gəlirdi. Buna görə də huşunu itirən və halı pisləşən yoldaşlarımız oldu" - deyə, Həsən Dəmirçi bildirib.
Həsən Dəmirçinin ay yarım sonra ikinci övladı dünyaya gələcək. Mədənçi yerin təkində ona məhz doğulmalı olan körpəsini görmək istəyinin güc verdiyini deyir. "Allahım, doğulmalı olan uşağımın üzünü mənə göstər. Məni övladlarıma bağışla deyə dua etdim.Sadəcə əllərimi açıb dua etdim. 8 yaşında bir övladım var, ay yarım sonra da ikinci övladım dünyaya gələcək. Ancaq onu düşünüb dua etdim" - deyə, mədənçi bildirib.
Bir daha mədəndə işləyib-işləməyəcəyi barədə suala isə Həsən Dəmirçi "Məcburam, borclarım var, işləmək məcburiyyətindəyəm, amma borclarım bitəndən sonra daha getmək istəmirəm» deyərək cavab verib. Xilas olan mədənçinin həyat yoldaşı Zəhra Dəmirçi isə yaşadığı dəhşət dolu anları belə xatırlayır:
"Ortada heç nə yoxdur, adının çəkiləcəyini gözləyirsən. O an hiss etdiklərimi izah edə bilmərəm. Çox çətin vəziyyət idi. Allaha yoldaşımı övladlarıma bağışlaması üçün dua etdim. Əlimdən başqa bir şey gəlmirdi. Mən rahatladım, amma burada hər kəsin evinə atəş düşdü. Həmin vəziyyət, meyidlərə baxmaq çox çətin idi. Meyidlərin, xəsarət alanların arasında yoldaşını axtarmaq. Görəsən, ölülərin arasındadır yoxsa xəsarət alanların? O an çox pis duyğular hiss edirsiniz", - deyə Zəhra Dəmirçi bildirib.
Xilas olan mədənçinin 8 yaşlı oğlu Mehmet isə anası ağlayarkən onu təsəlli etdiyini deyir.