Turçinov Slavyansk yaxınlığındakı ərazinin terrorçulardan təmizləndiyini bildirib

Ukraynada hökumət qüvvələri terrorçuların Kramatorsk şəhəri yaxınlığındakı hərbi bazasını məhv ediblər. Bunu Ali Radada çıxışı zamanı Ukrayna prezidenti səlahiyyətlərini icra edən Aleksandr Turçinov bəyan edib. Turçinov həmçinin Slavyansk yaxınlığındakı ərazinin terrorçulardan təmizləndiyini bildirib.
Ötən gün baş verən insident Ukraynın şərq vilayətlərində aparılan antiterror əməliyyatları zamanı ən ağır insident olub. Verilən məlumatlara görə, 30-a yaxın rusiyayönmlü silahlının pusqusu nəticəsində atışma başlayıb və nəticədə Ukrayna Milli Qvardiyasının 6 hərbçisi həlak olub, daha 8 nəfər yaralanıb. Döyüşlərə piyada qüvvələrilə yanaşı, helikopterlər də cəlb edilib. Bəzi məlumatlarda artilleriyadan istifadə edildiyi deyilir. Bu əməliyyatlarda Ukraynanın müdafiə naziri Mixail Kovalın böyük oğlunun da iştirak etdiyi deyilir. O, ön xətdə atası ilə birgə Ukraynanı müdafiə edir.
Bu arada ATƏT rəsmiləri Ukranya hökumətilə sülh danışıqlarına başlayıb. Ölkənin şərqində müstəqilliyini elan etmiş separatçılar dəyirmi masanı baykot ediblər. Qərb bu danışıqları alqışlayaraq Rusiyadan səyləri artırmağa çağırıb.
Kiyevdə Ukrayna mərkəzi seçki komissiyası 25 may prezident seçkilərinə hazırlaşır. Artıq seçki büllütenləri çap edilməyə başlayıb.