2008-ci ilin Ramazan ayında “Ergenekon”çuları həbs edən polis zabitləri 4 il sonra sahurda həbsə girdi

İyunun 21-dən 22-nə keçən gecə AKP iqtidarı əsas rəqibi olan “Gülən camaatı”na qarşı genişmiqyaslı əməliyyat keçirib. 22 şəhərdə eyni zamandan keçirilən əməliyyat zamanı “Gülən camaatı”nın önəmli isimlərindən olan polis zabitləri yaxalanıb.

İstanbul prokurorluğu ötən gecə keçirilən əməliyyatlar haqqında açıqlama yayıb. Sənəddə bildirilir ki, “paralel qurum”un casusluq, qanundankənar dinləmə fəaliyyəti ilə bağlı 115 polis məmuru saxlanıb, onlardan 67-si haqqında həbs qərarı verilib. Saxlananlara qarşı irəli sürülən ittihamlar içərisində rəsmi sənədləri saxtalaşdırma, vəzifədən sui-istifadə, dəlilləri yox etmə, dəyişdirmə, dövlətin təhlükəsizliyi ilə bağlı xəbərləri kənara ötürmə, xəbərləşmənin gizliliyinin pozulması da var: “Digər şəxslərin dindirilməsi davam edir. Keçirilən əməliyyat 2010-cu ildə “Selami-Tevhid” adlı təşkilatın qanunsuz fəaliyyəti ilə bağlı açılan cinayət işinin davamıdır. 3 il ərzində cinayətkar dəstə dövlət və hökumət rəhbərlərinin, eləcə də nazirlərin telefonlarını dinləyib. İstintaq araşdırmaları zamanı 76 nəfərin Türkiyə dövləti əleyhinə casusluqla məşğul olduğu aşkarlanıb. Son əməliyyat zamanı onlardan 52-si saxlanıb. Digər şübhəlilərin axtarışı davam edir”.



Hörgütün dinlədiyi şəxslər sırasında AKP-nin, demək olar ki, bütün rəhbər şəxslərinin, partiyaya yaxın nüfuzlu millət vəkillərinin adı çəkilir. Prokurorluğun açıqlamasında göstərilir ki, telefon danışıqlarının dinlənməsi heç bir halda Türkiyə dövlətinin təhlükəsizliyi ilə bağlı deyil. Bütün dinləmələr özəl məqsədlidir.

Türkiyə mediası yazır ki, “Gülən camaatı” əməliyyatdan xəbərdar olub. Ancaq xəbərlər əməliyyatın başlanmasından bir neçə saat əvvəl olduğu üçün önləmə tədbirləri alınması mümkün olmayıb. 17 və 25 dekabrda gerçəkləşdirilən “Böyük rüşvət əməliyyatı” zamanı İstanbul maliyyə müdürlüyü başqanlığından uzaqlaşdırılan Yakub Sayğılı ötən gecə Twitter hesabında “Havada əməliyyat qoxusu var” mesajı yazıb. Ehtimal edilir ki, bu mesajdan sonra hakimiyyətin yaxalamaq istədiyi bir neçə önəmli şəxs ölkədən çıxa bilib.



Səhər saatlarında polis Yakub Sayğılının da evinə gəlib. Polisin axtarışına sərt təpki verən Sayğılı əməliyyatın qanunlara yox, bir nəfərin iradəsinə dayandığını deyib.

İyulun 22-də İstanbul polisinin sonuncu “camaat əməliyyatı” həm medianın, həm də sosial şəbəkələrin əsas mövzusu olub. Ölkənin bir çox ünlü ismi AKP-nin seçkiöncəsi belə bir əməliyyat keçirməsini siyasi rəqibləri üzərində güc nümayişi kimi dəyərləndirib.

İstanbulun keçmiş baş prokuroru Zəkəriyya Öz əməliyyatla bağlı sərt danışıb: “Bəziləri öz əməllərinə haqq qazandırmaq üçün bəhanə tapmayanda bizə yüklənirlər. Evindəki paraları sıfırlaya bilməyənlər, dövlətin və millətin etibarını sıfırladılar. İndi də məsum insanlara ləkə yaxmaq istəyirlər. İsrail Türkiyəyə hücum etdiyi kimi AKP də polislərə hücum edib. İsrailə gücü çatmayan zavallılar sahurda polislərə hücum edib. Tarixə zalım və oğru olaraq keçməkdənsə, məzlum və zərərçəkən olaraq keçmək şərəflidir. Həzrəti Yusifi quyuya atan qardaşları sonralar qapısında dilənçi oldular. Acizlər oğurluqlarını gizlətmək üçün polisə iftira atırlar. Hamısı uydurmadır”.

Keçmiş futbolçu, Gülən camaatının önəmli isimlərindən Hakan Şükür də əməliyyata mesaj həsr edib: “Vətən aşiqi vətəninə xidmətkar aslanlara Qədr gecəsini aradığımız bu günlərdə sahur vaxtının kölgəsi yaraşırdı”.



“Ergenekon” istintaqı zamanı həbs edilənlər isə mesajlarında tarixin ironiyasına işarə vurublar. Onların paylaşdığı mesajlardan bəlli olub ki, iyulun 22-də həbs edilən polis zabitlərinin çoxu 4 il öncə Ramazan ayında “Ergenekon”çuların həbs edilməsi əməliyyatına rəhbərlik edən şəxslərdir. İstanbul Mütəşşəkil Cinayətkarlıqla Mübarizə Şöbəsinin keçmiş müdiri Serdar Saçan yazır: “Alma məzlumun ahını, çıxar ahəstə, ahəstə. Bu əməliyyatı sonuna qədər dəstəkləyirəm. Bizi 2008-ci ilin Ramazan ayında həbs edənlər indi özləri həbsə girir. O zaman “Allah böyük” demişdik, indi böyüklüyünü bir daha görürük”.

OdaTV.com saytının baş redaktoru Barış Pehlivan əməliyyat haqqında açıqlamasında ötən gecə həbs edilənlərin bir zamanlar hakimiyyətin sifarişi ilə Türkiyənin vətənsevər insanlarını həbs etməsinə toxunub: “Bu şəxslər bir zamanlar onları həbs edənlərin yerindəydi. Diləyim əsl günahlarına görə ədalətli məhkəmə qarşısına çıxarılmalarıdır. Onlara bizə etdikləri zülmü görməməyi də arzu edirəm. Baxmayaraq ki, saxlanan polislərin əlində neçə suçsuz insanın qanı var”.

Aygün Muradxanlı