Ötən gün İstanbulun Esenyurd Fatih məhəlləsində qorxunc hadisə baş verib.

Təmizlik işçiləri zibil konteynerini boşaldarkən, onun içərisində ədyala bürünmüş meyit aşkarlayıblar.

Hadisə barədə polisə məlumat verilib. Polis araşdırma zamanı öldürülən şəxsin bədənində 19 bıçaq yarası olduğunu təsbit edib.

Araşdırma davam edərkən polisə 907-cü küçədə cinayət baş verdiyi barədə xəbər daxil olub. Deyilən ünvana gedən polislər evdə silinmiş qan izləri aşkar edib. Hadisə vaxtı evdə olan ikisi qadın olmaqla 3 nəfər həbs edilib. Onlar dindirildikdən sonra cinayətin səbəbi aydın olub.

Məlum olub ki, zibillikdən tapılan cəsəd 38 yaşlı suriyalı Əhməd Zahraya aiddir. Zahranın arvadı, 27 yaşlı Məryəm Mehnənin 28 yaşlı Əhməd Abusteflə sevgili olduğu aydınlaşıb. 3 gün əvvəl onun əri bu xəyanətdən xəbər tutub. İddiaya görə, ertəsi gün evə tez gələn ər Əhməd Zahra Əhməd Abustefi evdə görüncə onların arasında dava düşüb. Dava zamanı Abusef və Məryəm Mehnə Əhməd Zahranı bıçaqlayıblar.

Bu cinayətlə əlaqədar Məryəm Mehnə, sevgilisi Əhməd Abustef və baldızı Nede Muhanna həbs ediliblər.