“Artıq, ölkəmizdə yeni siyasi mədəniyyət formalaşması prosesinə başlandığını deyə bilərik” Bunu Ermənistan prezidenti Serj Sərkisyan bir il əvvəl konstitusiya düzəlişlərindən danışarkən demişdi. Amma müxalifət deyir ki, Sərkisyanın rəhbərlik etdiyi hakim Respublika partiyasının siyahısı əslində bu rejimin yenə elə əvvəlki şəxslərdən ibarət olacağını göstərir.

“Azadlıq” radiosunun Ermənistan xidməti yazır ki, Sərkisyanın rəhbərlik etdiyi seçki siyahısına deputat-biznesmen Samvel Aleksanyan(“Lifçik Samo” ) da düşüb , o, 3 saylı seçki dairəsindən mübarizə aparacaq. 2003-cü ildən deputat olan Aleksanyan həmişə hakimiyyətin tərəfində olub. Müxalifət onu daima seçicilərə rüşvət paylamaqda və siyasi rəqiblərə qarşı zorakılqda ittiham edir. Müxalifətçi Nikol Paşinyan 2012-ci il seçkilərində onun mübarizə apardığı seçki dairəsinə daxil olan Malatiya-Sebastiya rayonunu “Osvensim” nasist düşərgəsinə bənzətmişdi.



Hakim partiyanın siyahısına deputat Arakel Movsisyan da düşüb və bu dəfə o, Armavir vilayətinin daxil olduğu 6 saylı seçki dairəsindən mübarizə aparacaq.Movsisyan müxalifəti “baş kəsmək və zorlamaqla” hədələyən, həmçinin parlamentdə müxalif deputatları təhqir edən bir deputat kimi tanınır. Məsələn, o deyib: ”Onları öz yerlərində oturmağa çağırıram. Allah eləməsin, əgər tutsaq, mütləq zorlanacaqlar”.Movsisyan ötən 5 il ərzində parlamentdə bir dəfə də olsun sual verməyib, çıxış etməyib.

Hakim partiyanın seçki siyahısına ofşor qalmaqalında adı hallanan və buna görə cinayət məsuliyyətinə cəlb olunan Miqran Poqosyanın da adı salınıb. General Poqosyan Ədliyyə Nazirliyi məhkəmə qərarlarının icrasına nəzarət orqanının keçmiş rəisidir və bu yaxınlarda ona qarşı açılan cinayət işi bağlanıb. Poqosyan 3 rayonu birləşdirən 1 saylı seçki dairəsindən mübarizə aparacaq.



Hakim partiyanın siyahısına SAS supermarketlər şəbəkəsinin “Sasi” kimi tanınan sahibi Artak Sərkisyan da düşüb. Yerli gəlmişlən o, ötən həftə ilk dəfə parlamentdə çıxış etməyə cəhd göstərdiyinə görə, mətbuatın diqqət mərkəzinə düşüb. Amma mikrofon işləməyib. Deyilənlərə görə Artak Sərkisyan da deputat olduğu 5 il ərzində bir dəfə də olsun parlamentdə çıxış etməyib.

Deputatlıq uğrunda yenidən Ermənistanın polis rəisi Vladimir Qasparyanın kürəkəni Artur Gevorkyan və Yerevan meri Taron Markaryanın qaynı Robert Sərkisyan da mübarizə aparacaqlar ki, onlar da bir dəfə olsun parlamentin iclaslarında ağızlarını açmayıblar.

Müxalifətdə olan “Erməni milli konqresi” partiyasının sədr müavini Levon Zurabyan yada salır ki, onların partiyası daima Serj Sərkisyanın elədiyi konstitusiya düzəlişləri hakimiyyətin saxlanmasına yönəldiyini deyirdi. Yəni əslində proporsional sistem adı altında, daima hakimiyyətlə əməkdaşlıq edən yerli avtoritetlərin üstünlük qazandığı həmən majoritar sistem işləyəcək.



“Bu elə eyni hakimiyyət, həmən rejim, eyni şəxslərdir. Yalnız eyni şeyin həyata keçirilməsi üsulları dəyişir, yenə də köhnə çirkli şeylər edilir” Zurabyan deyib.Müxalifətçinin sözlərinə görə, onlarda olan məlumata görə hakimiyyət artıq indidən seçiciləri ələ almağa, onlara pul paylamağa başlayıb. Amma Zurabyan məbləğin artdığını deyir-bir səsə görə təxminən 200 dollar.

“İrs” partiyasının sədr müavini Armen Martirosyan isə deyir ki, Sərkisyan yenidən seçkiyə eyni adamlarla getməklə, hakimiyyətini möhkəmləndirmək istəyir. Martirosyan deyir ki, hakimiyyət konstitusiya düzəlişləri ilə ölkənin siyasi və seçki sisteminə qarşı daha vülqar addım atıb.



Onun sözlərinə görə, bundan əvvəl majoritar sistemlə seçilən namizədlər özləri uğrunda mübarizə aparırdılarsa, indi yerli avtoritetlər və oliqarxların gətirəcəyi səslər birbaşa hakim partiyanın xeyrinə işləyəcək.

Martirosyan prezident Sərkisyanı vədlərinə əməl etməməkdə günahlandırır, deyir ki, prezidentliyinin ilk günlərində olan anlaşılmazlıq, qeyri-müəyyənlik divarı indi daha da möhkəmlənib. Hakim partiyanın parlamentdəki fraksiyasının rəhbəri Bagram Bagdasaryansa deyir ki, onların namizədlərinə real qiyməti, aprelin 2-də keçiriləcək parlament seçkisində xalq verəcək.