Türkiyədə davam edən etirazlarda ikinci adamın ölməsi barədə məlumat Antakyanın icra hakimiyyəti tərəfindən təsdiq olunub.

22 yaşlı Abdullah Comert "naməlum şəxs tərəfindən açılan atəş nəticəsində ... ciddi xəsarət almışdı", icra hakimiyyəti deyib, və onun az sonra hospitalda öldüyünü əlavə edib

Eyni zamanda Türkiyənin əsas həmkarlar ittifaqlarından biri çərşənbə axşamı və çərşənbə günləri bir çox şəhərdə tətilə çıxdığını bəyan edib.

240 000 işçini təmsil edən, solçu Kesk həmkarlar ittifaqı konfederasiyası, höküməti "dövlət terroru" törətməkdə ittiham edib.

Bazar ertəsi isə İstanbulda davam edən etiraz aksiyasında bir gəncin hospitalda ölməsi bəlli oldu.

Türkiyə Həkimlər Dərnəyinin məlumatına görə, Mehmet Ayvalıtaşın ölümünün səbəbi - Mustafa Kemal Mahallesində kütlənin içinə sürən maşının vurduğu zərər olub.
Türkiyə baş naziri Recep Tayyip Erdoğan deyib ki, hökümətə qarşı dörd gündür davam edən etirazlar Türk Baharı təşkil etmir.

Onun bazar ertəsi Mərakeşə getməzdən əvvəl keçirdiyi mətbuat konfransında dediklərinə görə, etirazlar ekstremistlər tərəfindən təşkil olunub və müxalifət "onun vətəndaşlarını" qızışdırıb.

Əvvəlcə İstanbulda parkın sökülməsinə qarşı etirazlar sonradan hökümət əleyhinə ümümvətəndaş aksiyaya çevrilib.

Cənab Erdoğan televiziyada yayımlanan konfransda deyib: "Ekstremistlərin təşkil etdiyi bu etirazlarda iştirak edənlər var. Bu, artıq Gezi Parkı haqqında deyil. Bu, Türkiyənin həm daxili, həm xarici ilə əlaqəsi olan mütəşəkkil hadisələrdir.
"Əsas müxalifət partiyası olan CHP bir çox günahsız vətəndaşı qızışdırıb. Xəbərləri yaradanlar, bu hadisələri "Türk Baharı" adlandıranlar, Türkiyəni tanımırlar", cənab Erdoğan əlavə edib.

İstanbulda baş nazirin ofisinə doğru yürüş edən bir qrupun qabağını almaq üçün polis gözyaşardıcı qazdan istifadə edib, Doğan xəbər agentliyi xəbər verir.

Eyni zamanda İstanbulun Beşiktaş məhəlləsində aksiyaçılarla polislərin qarşıdurması olub.

Bir neçə min adam bu yaxınlarda istifadədən çıxarılan Beşiktaş stadionunun qarşısında aksiya keçirib.

Aksiyaçılar barikadalar qurub, polislər isə gözyaşardıcı qaz və su şırnaqlarından istifadə edir.

Etirazçılar deyirlər ki, cənab Erdoğanın AK Partiyasının öz islamçı dəyərlərini ölkədə zorla tətbiq etmək istəyir.

Rəsmilər deyir ki, 67 şəhər və rayonda 1700-dən çox şəxs həbs edilib, bəziləri isə artıq buraxılıb.
Amerikadan reaksiya

Bazar günü aksiyaları demokratiyanın bir hissəsi adlandıran Ağ Ev bildirib ki, bütün tərəflər vəziyyəti "sakitləşdirməyə" çalışmalıdır.

Amerika həm də aksiyaçılara qarşı zor tətbiq edilməsini də "pisləyib".

Türk Doktor Assosiasiyası deyib ki, 484 etirazçı cümə günündən bəri İstanbul xəstəxanalarında müalicə alır.

Aksiyaçılar arasında çoxluq təşkil edən gənclər və orta şəhər kəsimi baş nazir Recep Tayyip Erdoğana İslamçılığa görə etiraz edir.

Ötən həftə hökümət spirtli içkilərin satışı və reklamına qadağa qoyan qanun qəbul edib.

Erdoğan isə aksiyaları "demokratiyaya qarşı" hesab etdiyini və əsas müxalifət partiyası, Cümhuriyyət Xalq Partiyası (CHP) tərəfindən təşkil edildiyini deyib.

Dörd gün davam edən proseslərdən sonra məscidlər, dükanlar və bir universitet hospitala çevrilib və yaralıları qəbul edir.

İzmir, Adana və Gaziantep şəhərlərində də aksiyaların keçirilməsi barədə məlumat var.

Ötən həftə parlament alkoqol içkilərin satışı və istifadəsini məhdudlaşdıran qanun qəbul edib.

Tənqidçilərə cavab verən Türkiyə baş naziri bəyan edib ki, zorla müsəlman dəyərlərini qəbul etdirməyə çalışmır, gənclərin "sərxoş halda veyllənməsinə" son qoymaq istəyir.