Misirdə prezident Məhmməd Mursinin dünənki devrilişinin ardından bu gün müvəqqəti prezident postuna gətirilən Konstitusiya Məhkəməsinin sədri Ədli Mənsur and içib. Ədli Mənsur yeni prezident seçilənə qədər ölkəni idarə edəcək.

Dünənki çevrilişə müdafiə naziri Abdel Fattah as-Sisi rəhbərlik edib. O, deyib ki, ordu prezident Mursiyə siyasi böhranın aradan qaldırmaq üçün 48 saat vaxt versə də, ölkə başçısı bu istiqamətdə bütün təklifləri rədd edib.

Mursinin prezidentlikdən kənarlaşdırılmasından sonra təklif olunan 4 bənddən ibarət "yol xəritəsi"nə görə, Konstitusiya qüvvədən düşür; tezliklə seçkilər keçirilir, o vaxta qədər ölkəni Konstitusiya Məhkəməsi idarə edir; koalisiyadan ibarət milli etimad hökuməti təşkil olunur; Konstitusiyaya dəyişiklik və ya əlavə üçün xüsusi komitə yaradılır.

Misir Konstitusiya Məhkəməsinin sədri Ədli Mənsur müvəqqəti olaraq prezident səlahiyyətlərini icra etməyə başlayıb. Artıq and içən Ə.Mənsur Misir Silahlı Qüvvələrini və xalqını azadlıq, bərabərlik və demokratiya ideyalarına sadiqliyinə görə təşəkkür edib.

Televiziya efirində “Allahına adı ilə ölkənin keçid dövrü üçün müvəqqəti hökumətinə rəhbərlik məsuliyyətin öz üzərimə götürürəm”, – deyən Ədli Mənsur uzun müddət Dövlət Şurasında inzibati vəzifələrdə çalışıb.

Son bir həftə ərzində 100-ə yaxın qadının zorlandığı Təhrir Meydanındakı kütlə isə dağılmağa tələsmir. Mursinin həbs edilməsini və çevrilişi böyük sevinclə qarşılayan milyonluq kütlə Misir müxalifətinin lideri, MAQATE-nin keçmiş rəhbəri Məhəmməd əl-Baradeyin prezident olmasını istəyir.

Yaxın bir neçə saat ərzində Məhəmməd Musiyə qarşı ittihamların irəli sürüləcəyi güman edilir.

Müxalifətin əsas narazılığı Mursi hakimiyyətinin yalnız “Müsəlman Qardaşları” təşkilatına üzv olan şəxslərdən təşkil etməsi idi. Onların fikrincə, indiki siyasi və iqtisadi böhranın səbəbi Mursi hakimiyyətinin siyasi həyatı inhisara alması idi. Artıq Misir polisi “Müsəlman Qardaşları” təşkilatının üzvlərinin həbsinə başlayıb. Qahirə və İsgəndəriyyədəki qərargahları isə fəaliyyətini dayandırıb.

Xatırladaq ki, prezident səlahiyyətlərinin müvəqqəti icra edən Ədli Mənsur xristian qibtidir. Misir əhalisinin 10%-ini təşkil edən qibtilər Yaxın Şərq və Şimali Afrika regionundakı ən böyük dini-milli azlıqdır. Beləliklə, 1952-ci ildə müstəqillik əldə etməsindən sonra ilk dəfə Misirə xristian prezident rəhbərlik edəcək.