Misirin müdafiə naziri Əbdel Fəttah əl Sisi az öncə ölkə vətəndaşlarına televiziya ilə müraciət edərək bəyan edib ki, Məhəmməd Mursi artıq prezident deyil.

Nazirin çıxışını Al Jazeera telekanalı birbaşa translyasiya edib.

"Ölkədəki ictimai və dini təşkilatlarla məsləhətləşmələrdən sonra silahlı qüvvələr Konstitusiyanın fəaliyyətini dayandırmaq, Konstitusiya Məhkəməsinin sədrini ölkənin müvəqqəti dövlət başçısı təyin etmək, habelə neytral texnokratik hökumət formalaşdırmaq və yeni seçkilər keçirmək qərarına gəldik", - Əbdel Fəttah əl Sisi deyib.

Misirdə Milli Vəhdət Komitəsi yaradılacaq. Ölkədəki bütün siyasi və ictimai qüvvələrin təmsil olunacağı komitənin funksiyaları bəlli deyil.

"Ordu siyasətə qarışmayacaq, amam keçid dövründə əmin-amanlıq, qanunlara riayət və sakitliyi təmin edəcək", - general Sisi deyib.

Məhəmməd Mursinin harada olduğu bəlli deyil. Ona və ən yaxın silahdaşlarına ölkəni tərk etmək yasaqlanıb.

-------------

APA-nın “Vesti”yə istinadən verdiyi xəbərə görə, bu barədə Misir telekanalı “Əl Həyat” yayıb.

Bu arada Misirin güc strukturlarına xalqın və etirazçıların mühafizəsizini təmin etmək üçün silah istifadə etməsinə əmr verilib. Müvafiq göstərişi daxili işlər naziri Məhəmməd İbrahim imzalayıb.

Əmr terror aktlarının qarşısını almaq məqsədi ilə silahın istiifadə edilməsini nəzərdə tutur. Terror aktlarının müdafiə naziri Abdel Fəttah əs-Cirinin gözlənilən bəyanatından sonra törədiləcəyi gözlənilir.

Xatırladaq ki, ötən gün Məhəmməd Mursinin çıxışından sonra Qahirə Universitetinin qarşısında islamçılarla yerli sakinlər arasında toqquşma baş verib. “Müsəlman qardaşlar”ın tərəfdarları odlu silahlardan insanlara açdığı atəş nəticəsində 17 nəfər həlak olub, 600-dək insan yaralanıb.

---------
21:00

Misir prezidenti Məhəmməd Mursi parlament seçkilərinin hazırlığı və keçirilməsi ilə məşğul olacaq koalisiya hökuməti yaratmağı təklif edib.

Milli.Az APA-ya istinadən bildirir ki, bu barədə Misir prezidentinin mətbuat xidmətinin bəyanatında deyilir.

Komünikedə həmçinin konstitusiyaya dəyişikliklər edilməsi üçün müstəqil komissiyasının yaradılması təklif olunub. Bu komissiya həmçinin gələcəkdə parlamentin yeni heyətini təsdiq etmək hüququna malik olacaq.

Prezident Məhəmməd Mursinin adından yayılan bəyanat ordu komandanlığının Misirin tanınmış dini, siyasi, ictimai və gənc xadimləri ilə görüşü fonunda səslənib. Görüşdən sonra hərbçilərin xüsusi bəyanatla çıxış edəcəyi gözlənilir.

---------
19:26

Misir silahlı qüvvələri tərəfindən prezident Məhəmməd Mursiyə verilən məlum ultimatumun dolmasına az qalmış ordu Misir dövlət televiziyasının Qahirə studiyasını ələ gecirib. Anspress Türkiyə mətbuatına istinadən xəbər verir ki, bu zaman canlı yayımda vəzifəsini yerinə yetirən TV personalı binanı tərk edib.

Qeyd edək ki, Misir prezidenti Məhəmməd Mursi ordunun proseslərə müdaxilə edəcəyi təqdirdə geri bir addım belə atmayacağını açıqlayıb.

---------
10:11

Misirdə prezident Məhəmməd Mursinin tərəfdarları ilə Qahirə Universitetinin yanında təhlükəsizlik qüvvələrinin toqquşmasında 16 nəfər həlak olub

Milli.Az Al Arabia-ya istinadən bildirir ki, toqquşmada 200 nəfər yaralanıb. Yaralılar arasındakı polislərin sayı dəqiq bəlli deyil. Şahidlərin dediklərinə görə, polis yürüş edən insanları dağıtmaq üçün gözyaşardıcı qazdan istifadə edib, atəş açıb.

Qahirə Universitetinin yanında toqquşmalar M.Mursinin misirlilərə 45 dəqiqəlik müraciətlə çıxış etməsindən sonra başlanıb.

Demokratik seçkilər yolu ilə dövlət başçısı postuna seçildiyini xatırladan Mursi istefa verməyəcəyini, "Konstitusiya qayda-qanununu həyatı bahasına qoruyacağını" bəyan edib.

O, müxalifəti yenə də dialoqa çağırıb, Konstitusiyaya dəyişikliklər etməyi və cəmiyyətdə anlaşmaya nail olmaq üçün xüsusi komitə yaratmağı təklif edib.

Mursinin əleyhdarları bu çıxışı narazılıq, qəzəblə qarşılayıblar.
Müxalifət liderlərindən biri Xaled Daud deyib: "Prezidentin çıxışı əslində ölkədə vətəndaş müharibəsinin elanıdır. Çünki o, istefasını tələb edən milyonlarla insanın mövqeyini heçə sayır".

Misir ordusunun ölkədəki bütün siyasi qüvvələrə verdiyi ultimatumun vaxtı bu gün 18.00-da başa çatır. Generallar bildiriblər ki, küçələrdə toqquşmalar və iğtişaşlara son qoyulmasa, güzəştli anlaşma əldə olunmasa, ordu ölkədəki situasiyanı nəzarət altına alacaq.

----------
09:06

Misir prezidenti Məhəmməd Mursi bildirib ki, müxalifətin istefaya getmək çağırışlarına baxmayaraq, ölkənin konstitusiyasına uyğun olaraq öz postunda qalacaq. Bu barədə Trend RİA Novosti agentliyinə istinadən məlumat verir.

"Mən başqa cür hərəkət edə bilmərəm, xalq məni seçib, mən qanuniliyə riayət etmək niyyətindəyəm və sonra məsuliyyəti daşımağa hazıram", - Mursi dövlət telekanallarında translyasiya edilən xalqa müraciətində bildirib.

O vurğulayıb ki, yalnız misirlilərin əksəriyyəti səs verən konstitusiyaya riayət etməsi, Misirə qan tökmədən və zorakılıqdan qaçmağa kömək edəcək.

Misirin əsas problemlərində o, prezident Hüsnü Mübarək rejiminin yeni qanuni seçilmiş hakimiyyəti etibardan salmaq üçün sabotajla məşğul olan tərəfdarlarını ittiham edib.

X X X

Misir prezidenti Məhəmməd Mursi çərşənbə axşamı ölkənin silahlı qüvvələrinin komandanlığını böhranın nizama salınması haqqında razılaşmaq üçün 48 saat siyasətçilərə verən ultimatumu geri götürməyə çağırıb. Bu barədə Trend RİA Novosti agentliyinə istinadən məlumat verir.

Bazar ertəsi Misirin silahlı qüvvələrinin komandanlığı qüvvədə olan hakimiyyətin tərəfdarlarını və rəqiblərini 48 saat ərzində siyasi böhranın nizama salınması haqqında razılığa gəlməsinə çağırıb, əks təqdirdə ordu onun nəzarəti altında həyata keçiriləcək "böhrandan çıxış hərəkət xəritəsi" haqqında elan etmək niyyətindədir.

"Prezident Mursi konstitusiyanın aliliyinə öz sədaqətini təsdiq edir və onun pozmasının istənilən cəhdlərini rədd edir, bununla əlaqədar olaraq silahlı qüvvələri ultimatumu geri çağırmağa çağırır", - prezidentin Twitter mikrobloqunda yerləşdirilmiş məlumatında deyilib.