ABŞ hakimiyyəti Vaşinqtonda keçirilən Ümumdünya qaz konqresi zamanı Rusiya qazının Avropa bazarlarına nəqlini artırmaq üçün nəzərdə tutulan “Şimal axını-2” və “Türk axını” kəmərinin ikinci qolu kimi layihələrə qarşı olduğunu bildirib.

gundemxeber.az xəbər verir ki, bu barədə Dövlət Departamentinin rəsmi nümayəndəsi Hizer Noyert bəyanat verib.

Diplomat deyib ki, bu boru kəmərləri Avropanın Rusiyadan energetika asılığını dərinləşdirəcək. Noyertin sözlərinə görə Dövlət Departamenti Azərbaycan qazının Avropaya nəqli üçün nəzərdə tutulan “Cənub Qaz Dəhlizi” kimi layhələrə dəstək verir. Habelə Polşanın ABŞ-dan sıxılmış qaz almaq barədə 20 illik müqavilə bağlamasını alqışlayır.

Noyert “Şimal axını-2” layihəsində işləyən şirkətlərə qarşı ABŞ tərəfindən sanksiyaların tətbiq ediləcəyini mümkün sayıb. Onun sözlərinə görə, həmin firmalar “Amerikanın rəqiblərinə sanksiyalarla təsir” haqda qanunun (CAATSA) təsiri altına düşə bilər.

Xatırladaq ki, bir neçə ay əvvəl Rusiya və Türkiyə “Türk axını” qaz kəməri layihəsinin Yunanıstana doğru ikinci qolunun çəkilməsi barədə razılıq əldə ediblər. Əvəzində “Qazprom” Türkiyəyə qaz satışında 1 milyard dollarlıq endirim edib.