Beləliklə, Ermənistanda aylardır gözlənilən parlament seçkisi arxada qaldı. Bu, Ermənistanın müstəqillik tarixində seçicilərin ən az iştirak etdiyi seçki kimi tarixə düşdü. İki ermənidən biri seçkiyə getmədi.

Politoloq Elxan Şahinoğlu Nikol Paşinyanın siyasi həyata canlanma gətirdiyini, ancaq bunun seçici marağını artırmadığını bildirib.

“Buna baxmayaraq, Paşinyanın lideri olduğu partiya qələbə çaldı, o, təkbaşına hökuməti formalaşdırmaq imkanı qazandı. 20 ildən sonra “Qarabağ klanı” rəsmən hakimiyyətdən uzaqlaşdırıldı”, - politoloq qeyd edib.

E.Şahinoğlunun fikrincə, qarşıda N.Paşinyanı 3 çətin vəzifə gözləyir:

1. Dağlıq Qarabağ münaqişəsinin həllində addım atmasa, cəbhə bölgəsində vəziyyət gərginləşəcək, üstəgəl, Qarabağdakı girovlarımızın “hamının hamıya” dəyişdirilməsini uzada bilməyəcək;

2. İstisadi islahatlar aparmaq üçün əlavə vəsaitə ehtiyac var, o biri tərəfdən də Ermənistanın artan xarici borc problemini həll etməlidir;

3. Xarici siyasət kursunu müəyyənləşdirməlidir, Rusiya və Qərb arasında vurnuxması Moskvanın xoşuna gəlmir, ancaq Qərbə yaxınlıq da Paşinyana xüsusi divident vəd etmir.

Qeyd edək ki, 9 dekabrda keçirilən seçkilərdə seçici aktivliyi 48,63 faiz olub. N.Paşinyanın bloku 70%-dən çox səs toplayıb. Seçki barajını isə Mənim Addımım Blokundan başqa Çiçəklənən Ermənistan və İşıqlı Ermənistan partiyaları aşa bilib.

S.Sərkisyanın Respublikaçılar Partiyası da daxil olmaqla, seçkidə iştirak edən 8 siyasi güc parlamentdən kənarda qalıb./axar.az