Ermənistanın Dağlıq Qarabağ münaqişəsi ilə bağlı danışıqlarda qeyri-konstruktiv mövqeyi davam edir.

Problemin həlli istiqamətində heç bir əməli addım atmayan İrəvan danışıqlar prosesininin pozulmasında maraqlıdır. Ermənistan əsirlərin dəyişdirilməsi ilə bağlı razılaşmadan imtina edir. Məlumdur ki, Rusiyanın xarici işlər naziri Sergey Lavrov "münaqişə zonalarında etimad mühitinin qurulması vasitəsi kimi əsirlərin hamının hamıya prinsipi ilə dəyişdirilməsi” və bunun Dağlıq Qarabağ münaqişəsinin nizamlanmasına proyeksiyası barədə bəyanat verib.

Bəyanatla bağlı Rusiya XİN-dən bildirilib ki, ATƏT Minsk qrupunun həmsədrləri mayın sonunda regiona səfəri zamanı əsirlərlə bağlı təklifləri Dağlıq Qarabağ münaqişəsinin tərəflərinə təqdim edəcək.

"Bu məqsədlə ATƏT Minsk qrupunun həmsədrləri və Beynəlxalq Qızıl Xaç Komitəsinin köməyi ilə hərbi əsirlərin dəyişdirilməsi ilə bağlı razılaşma əldə olunmuşdu. Bakı və İrəvan gələcəkdə bu yanaşmanı rəhbər tutmaq barədə razılıq əldə ediblər. Hesab edirik ki, bu razılaşma öz aktuallığını qoruyur. Əsirlərin dəyişdirilməsi ilə bağlı məşvərətlər davam edir”-deyə, Rusiya XİN-dən bildirilib.

Amma bir neçə gün öncə Ermənistanın baş naziri Nikol Paşinyan dəyişdirilməyəcəyini bəyan etdi. Göründüyü kimi, Ermənistan bir daha razılaşmadan imtina edib. Bu da Azərbaycanın sülh təklifi imkanlarını daraldır, Bakını müharibə qərarı verməyə məcbur edir. Maraqlıdır, beynəlxalq təşkilatlar nəhayət, Ermənistan hökumətinə sanksiyalar haqqında düşünməli deyilmi?

Politoloq Natiq Miri “Cümhuriyət” qəzetinə şərhində müharibə ehtimalının daim gündəmdə olduğunu, Qarabağ probleminin həlli üçün alternativ yolun qalmadığını deyib. N.Miri hesab edir ki, beynəlxalq təşkilatlar və həmsədr ölkələr Ermənistana sanksiya tətbiq etməyəcək:

“Əgər sülh danışıqlarında anlaşma potensialı tükənirsə, bunun alternativi müharibədir. Ona görə də Ermənistan sülh masasında Azərbaycan üçün başqa əl yeri qoymursa, deməli, Azərbaycan müharibə haqqında artıq çox ciddi şəkildə düşünməlidir. Əslində, bu yeni bir situasiya deyil. Əvvəlcədən də bəlli idi ki, Paşinyan hökuməti sülh masasında hansısa ciddi güzəştlərə getməyəcək. Çünki bunun üçün Paşinyanın böyük zamana ehtiyacı var. İlk növbədə Ermənistan daxili və Azərbaycanın işğal olunmuş bölgələrində Paşinyan hakimiyyətinin belinin bağlı olmaması, bununla yanaşı, Ermənistan daxilində ictimai-siyasi vəziyyətin gərginliyi, Rusiyanın təzyiqlərini də nəzərə alanda təbii ki, rəsmi İrəvanın Qarabağ danışıqlarında güzəştə getmək imkanlarının məhdud olduğu görünür. Ona görə də Azərbaycan artıq bu istiqamətdə siyasi qərar verməlidir. Bəllidir ki, Rusiya bu məsələni həll etmək istəmir. Başda ABŞ olmaqla digər həmsədr ölkələr regionda, ancaq öz maraqları kontekstində fəaliyyət göstərir. İki ölkə arasında görüş təyin etmək istəyir ki, bu da Rusiya ilə Cənubi Qafqaz uğrunda savaşın tərkib hissəsidir. Yəni əsas hədəf Dağlıq Qarabağ problemini həll etmək deyil. Bu baxımdan heç bir həmsədr dövləti, Avropa Birliyi və digər beynəlxalq strukturlar Ermənistana hər hansı bir iqtisadi, siyasi, hərbi sanksiya tətbiq etməyəcək. Bunu təcrübədə artıq 27-ci ildir ki, görürük. Bunu başa düşmək üçün bu qədər zamanın keçməsinə ehtiyac var idi? Təbii ki, bütün beynəlxalq təşkilatlar, ATƏT-in Minsk Qrupunun həmsədr dövlətləri, bir sözlə bu prosesdə maraqlı olan güclərin hamısı xristian dünyasının təmsilçiləridir. Belə olduğu müddətdə Ermənistana heç bir sanksiya tətbiq olunmayacaq. Ona görə də aydındır ki, Dağlıq Qarabağ probleminin həlli, torpaqların qaytarılması məsələsi yalnız qısa və ya uzunmüddətli müharibədən keçir. Sadəcə olaraq, bunun üçün ciddi siyasi iradəyə, Rusiya qorxusunun üstündən adlamasına ehtiyac var. Bu qorxu “Domokl qılıncı” kimi hakimiyyətin üzərində qaldığı müddətdə təbii ki, hərbi əməliyyatlar keçirilməyəcək. Azərbaycan ictimaiyyətin başı da yalançı danışıqlarla qatılacaq. Cəmiyyətə bu istiqamətdə açıq şəkildə mesaj vermək lazımdır ki, artıq Dağlıq Qarabağ probleminin sülh masasına həlli potensialı tükənib. Ermənistandan hər hansı bir güzəşt gözləmək özünü aldatmaqdır. Ona görə də düşünürəm ki, milyonlarla vəsait xərclənən hərbi təlimlərin bir anda gerçək hərbi əməliyyatlara çevrilməsinə ehtiyac var. Artıq bunun zamanı gəlib”.//Cebhe.info