Ermənilər yüz ildən çoxdur ki, biz türklərə pislik etməyi həyat məqsədlərinə çeviriblər və bizə qarşı qəddarlıqları, zülmləri sərhəd tanımayıb. Amma, nə qədər pisliklər, qəddarlıqlar etsələr də, bu dünyada ən çox qorxduqları da, çəkindikləri də elə türklərdir. Bir əhvalatı xatrlatmaq yerinə düşər. Sovet dövründə ermənilər Türkiyə ilə sərhəd olan Amasiya rayonunda film çəkirmişlər. Filmdə türk süvari ordusunun erməni kəndinə hücumu səhnəsi də varmış. Türk ordusu qiyafəsində, at belində sivrilmiş qılınclı qoşunu görəndə, film çəkilişindən xəbəri olmayan yaxınlıqdakı ermənilər kəndə qaçıb qışqırırlar ki, “qaçın türk ordusu gəlir”. Kənd camaatı qaçmağa üz tutanda nə baş verdiyi məlum olur. Bunu o vaxt yazan erməni mətbuatı hələ də ermənilərdə türk xofunun olduğunu yazmışdılar.

İndi Türkiyə-Azərbaycan ordularının 29 iyul-10 avqust birgə hərbi təlimləri erməniləri yaman qorxuya salıb. Dünən bir partiya sədri “Paşinyan, istirahət zamanı deyil, türklər üstümüzə gəlir” harayı çəkmişdi. Bu gün isə Ermənistanın müdafiə naziri David Tonoyan və baş qərargah rəisi Onik Qasparyan bir yeri yanmış məxluq kimi hərəsi bir qapıya üz tutub. Erməni mətbuatı yazır ki, David Tonoyan bu gün Rusiyanın Ermənistandakı səfiri Sergey Kopırkin ilə görüşərək, əməkdaşlıq və regional vəziyyəti müzakirə edib. David Tonoyan Türkiyə və Azərbaycanın siyasi və hərbi addımlarını dəyərləndirərək bu təlimləri bölgənin sabitliyini pozan hal kimi dəyərləndirib. Xəbərdə o da vurğulanıb ki, Ermənistan Silahlı Qüvvələri, eyni zamanda vahid erməni-rus hərbi birləşmələri vəziyyəti daim nəzarətdə saxlayır və hadisələrin hər hansı bir inkişafına hazırdır. Səfir Kopırkin də diplomatik cavab verərək, həyəcanlı müdafiə nazirini sakitləşdirib. Əlbəttə Rusiyanın Cənubi Qafqaz siyasətində dəyişiklik yoxdur. Burda Rusiyanın açıq etirazının olmamasını Kremlin Ermənistan hakimiyyətinə xəbərdarlığı kimi də dəyərləndirmək mümkündür. KTMT üzvü olmasına baxmayaraq Tovuz hadisələrində Ermənistana açıq yardım edilməməsi, hətta təşkilatın toplantısının təxirə salınması bu xəbərdarlığın tərkib hissəsi idi. Vladimir Putin Paşinyanı cəzalandırmaq istəyir, amma burda Azərbaycana xüsusi şərait yaratmaqla, yəni neytral qalmaqla torpaqların az bir hissəsinin azad olmasını da istəmir. Ona görə də, hələ ki, Paşinyanı bu cür sıxmaqla Ermənistan daxilindəki qüvvələrin hərəkətə keçməsini gözləyir, amma onu da vurğulamaq lazımdır ki, Paşinyandan narazılığın və ona əks olan siyasi qüvvələrin də təsir gücünün miqyası Rusiyanın istədiyi səviyyədə dəyil. Hələ ki.

Ermənistan Silahlı Qüvvələri Baş Qərargah rəisi general-leytenant Onik Qasparyan isə bu gün ABŞ-ın Ermənistandakı səfiri Linn Treysi və ABŞ səfirliyinin hərbi attaşesi polkovnik Skott Maksvellini qəbul edib. Təbii ki, bu görüşün təşəbbüsççüsü erməni generalın özü olub. Yoxsa, bu iki daşın arasında ABŞ səfirliyinin məhz indi görüşmək istəyi hardan yadına düşdü.
Bu o deməkdir ki, Paşinyan öz yoluna davam edir, yəni “nə əldən qoyur, nə yardan doyur”, çalışır ki, iki stulda birdən otursun. Həm ölkədə anti Rusiya təbliğatını körükləyir, həm də Rusiya-Ermənistan birgə hərbi birləşməsinin köməyinə üz tutur.

Digər tərəfdən də Rusiyanın bir nömrəli rəqibi ABŞ-a üz tutur. Ondan kömək istəyir. Bu, faktiki olaraq Paşinyanın iki stulda birdən oturması deməkdir. İki stulda eyni zamanda oturmağın sonu isə heç vaxt yaxşı olmayıb. Olsun./moderator.az/