Qarabağda savaşın başlanmasından sonra Ermənistan, o cümlədən erməni diasporunun aktivliyi və təxribatı artıb.

GundemXeber.Az Axar.az-a istinadla xəbər verir ki, erməni diasporunun provokasiyalarının artdığı ölkələrdə biri də Gürcüstandır. Gürcüstanın Ermənistana Rusiyadan gələn hərbi yüklərin tranzitinə qadağa qoyması erməni diasporu, o cümlədən İrəvanın Tiflisə qarşı hücumunu açıq müstəviyə keçirib.

Erməniləri qəzəbləndirən başqa bir məqam isə Gürcüstanın eks-prezidenti Mixail Saakaşvilinin Azərbaycanı dəstəkləyən bəyanat verməsi olub. Məhz bu bəyanatdan sonra Saakaşvilinin ünvanına təhqirlər və təhdidlər yağdıran erməni diasporu hətta şovinist və separatçılığa meyilli bir qrup erməni ilə Saakaşviliyə yaxınlığıyla seçilən Nika Qvaramiyanın rəhbərlik etdiyi müxalifyönlü “Mtavari Arxi” televiziyasının önündə etiraz aksiyası keçirib. Bundan sonra açıqlama yayan Saakaşvili bu aksiyanın xaricdən təşkil edildiyini bildirib.

Əslində Saakaşvilinin dediklərində elə də təəccüblü bir şey yoxdur. Belə ki, həm Tiflis, həm də Bakı uzun müddətdir Cavaxetiyadakı ermənilərin və erməni təşkilatlarının aktiv şəkildə İrəvan tərəfindən istifadə edildiyini bilir. Üstəlik, bu təşkilatların bir qisminin məhz Cavaxetiyada separatçı fəliyyətin gücləndirilməsi üçün də istifadə olunduğu çoxdan bəllidir.

Belə təşkilatlardan biri Erməni Apostol Kilsəsinin nəzdində olan və Tiflisdə fəaliyyət göstərən “Hayartun” mədəniyyət və gənclər mərkəzidir. Təşkilatın fəaliyyətinə nəzər yetirdikdə onun Gürcüstanda sadəcə erməni mədəniyyətinin təbliğatı ilə məşğul olduğu təəssüratı yaranır. Əslində situasiya görünəndən daha mürəkkəbdir. Qarabağda kəskin döyüşlərin başlanmasından sonra “Hayartun” birbaşa mahiyyətini ortaya qoyub - separatizm və faşizmin təbliğatına başlayıb.

Savaşın başlanmasının ilk günlərində “Hayartun” mərkəzi Feysbuk səhifəsində faşizmi təbliğ edən paylaşım edib. Təşkilat Feysbuk səhifəsinə erməni faşist Qaregin Njdenin fotosunu yerləşdirərək, onun “əgər millət orduya çevrilərsə, onu diz çökdürmək mümkün deyil” sözlərini yerləşdirib. Halbuki, Gürcüstanda faşizmin təbliğatı 2011-ci ildə qadağan edilib.

Digər tərəfdən təşkilat separatizmdən əziyyət çəkən ölkədən Azərbaycanda separatizmi müdafiə edən bəyanatlar verməklə bərabər, separatçı liderlərin çıxışlarının da paylaşımlarını edir. Daha bir məqam isə sülhü və mədəniyyəti “təbliğ” edən təşkilatın oktyabrın 4-də yarım milyon insanın yaşadığı və döyüş bölgələrindən kənarda yerləşən Gəncə şəhərinin Ermənistan tərəfindən vurulmasını alqışlamasıdır.

Bu dövr ərzində təşkilatın ən önəmli fəaliyyəti Qarabağa dəstək şüarı altında Axalkalakidə ermənilərin etiraz aksiyası keçirməsidir. Üzdə aksiya ilə heç bir bağlılığı olmadığını göstərən təşkilat müxtəlif platformalarda xüsusi canfəşanlıqla aksiyanı dəstəkləyib. Məhz buna görə bu aksiya ilə “Mtavari Arxi” televiziyası önündə keçirilən aksiyalar arasında bir sıra oxşar məqamları belə müşahidə etmək mümkün oldu.

Qeyd edək ki, “Hayartun” əslində Azərbaycan üçün elə də yad bir təşkilat deyil. Təşkilat cəmi 1 il əvvəl Tiflisdə Sumqayıt hadisələri ilə bağlı təşkil etdiyi sərgidə guya ermənilərə qarşı “vəhşilik” fotosu olaraq Xocalı soyqırımındakı uşaqların görüntülərini sərgi iştirakçılarına təqdim etməsiylə gündəmə gəlib.

Görünən odur ki, 8 il Gürcüstanı idarə edən və ermənilərin bütün fəaliyyətlərini gözəl bilən Saakaşvilinin dedikləri əslində diqqət edilməsi gərəkən önəmli məqamdır. Buna görə də Saakaşvili israrla Azərbaycanın ərazi bütövlüyünün müdafiəsində qətiyyətli mövqe tutur və Gürcüstana təhdidin haradan gələcəyini bilir.






GundemXeber.Az