Amerikalararası İnkişaf Bankı (IDB) çərşənbə günü Latın Amerikası və Karib dənizi hövzəsindəki ölkələrə koronavirus pandemiyasına qarşı mübarizə üçün 1 milyard dollar vəd edib.

İİB bu pulun peyvəndlərin alınmasına, peyvəndləri paylayan milli qurumların gücləndirilməsinə və immunizasiya potensialının artırılmasına sərf ediləcəyini bildirib.

Bu məbləğ bankın bölgədə test və müalicə xərclərini ödəmək üçün verdiyi 1,2 milyard dollara əlavə ediləcək.

Bu barədə açıqlama Latın Amerikasında COVID-19-a yoluxma və ölüm hallarının artması barədə məlumatdan sonra verilib. Reuters xəbər agentliyinin bildirdiyinə görə, dünyada COVID-19-dan ölüm hallarının təxminən 33% -i Latın Amerikasında qeydə alınıb, baxmayaraq ki, bölgə qlobal əhalinin yalnız 9% -ni təşkil edir.

Rəsmilər Meksika əhalisinin təxminən dörddə birinin virusa yoluxduğunu bildirib. Cons Hopkins Universitetinin Koronavirus Resurs Mərkəzinin bildirdiyinə görə, virusdan 115 mindən çox meksikalı ölüb.

Yoluxma və ölüm hallarının sürətlə artması çərşənbə günü Almaniyada da yeni məhdudiyyətlər tətbiq edilməsinə səbəb olub.

Sərt məhdudiyyətlərə vacib olmayan bütün müəssisələrin bağlanması və özəl toplantıların beş nəfərdən çox olmaması da daxildir. Yanvarın 10-na qədər davam edəcək məhdudiyyətlər bazar günü Almaniyanın 16 bölgəsinin qubernatorları ilə danışıqlardan sonra kansler Angela Merkel tərəfindən tətbiq edilib.

Almaniyanın xəstəliklərə nəzarət mərkəzi olan Robert Kox İnstitutu çərşənbə günü koronavirusdan 952 nəfərin öldüyünü bildirib. Bu, keçən həftənin cümə günü 598 nəfərin öldüyü barədəki rekordu qırıb.

Ölkənin səhiyyə naziri Yens Span Avropa Birliyinin tənzimləyici agentliyini çərşənbə axşamı ABŞ-ın əczaçılıq Pfizer və Almaniyanın BioNTech şirkəti tərəfindən birlikdə hazırlanan peyvəndi Milad bayramına qədər təsdiq etməyə çağırıb.