Rusiyanın xarici işlər naziri Sergey Lavrov cümə axşamı ukraynalı həmkarı ilə Türkiyənin kurort şəhərində görüşmək üçün Türkiyəyə yola düşəcək. Moskva və Kyivlə sıx əlaqələri olan Ankara Rusiyanın Ukraynanı işğalından sonra vasitəçilik etməyə çalışır.

Rusiyanın Ukraynanı işğal etməsindən sonra Lavrovla Ukraynanın xarici işlər naziri Dmitri Kuleba arasında ilk görüş Türkiyənin kurort şəhəri Antalyada olacaq. Sammitə Türkiyənin xarici işlər naziri Mövlud Çavuşoğlu ev sahibliyi edəcək.

Türkiyə prezidentinin baş müşaviri İlnur Çevik görüşün baş tutması özlüyündə böyük uğur olduğunu deyib.

“Ruslar və ukraynalıların Antalyaya gəlməyə razılıq verməsi Türkiyə üçün kifayət qədər mühüm nailiyyətdir. Deyəsən, onlar Türkiyəni vicdanlı bir vasitəçi olaraq görür. Buna görə də biz çox sevinirik. Bunun bizi haraya aparacağını bilmirik, lakin bunun baş verməsi çox, çox əhəmiyyətlidir" - deyə, o bildirib.

Rusiya və Ukrayna arasında danışıqlar gedir, lakin Antalyada keçiriləcək bu görüş hərbi əməliyyatlar başlayandan bəri Rusiya ilə Ukrayna arasında yüksək səviyyəli görüş olacaq.

Ankara Ukraynaya Türkiyə istehsalı olan pilotsuz təyyarələr və digər hərbi texnika tədarük edərkən, Rusiyaya qarşı beynəlxalq sanksiyalara da qarşı çıxıb.

İstanbulun Kadir Has Universitetinin beynəlxalq əlaqələr üzrə professoru Mustafa Aydın "Türkiyə əslində vasitəçilik üçün yaxşı yerdir. Türkiyə müxtəlif məhəllələrdə Rusiya ilə kifayət qədər yaxın münasibət qurub. Ukrayna isə müstəqillik əldə etdikdən sonra Türkiyənin ən yaxın dostu və müttəfiqlərindən biri olub" deyib.

Həm Ukrayna, həm də Rusiya prezidentləri ilə yaxşı münasibətdə olan Türkiyə prezidenti Rəcəb Tayyib Ərdoğan münaqişənin həllində vasitəçilik etməyə çalışır.

Kyiv bu cür səyləri alqışlasa da, Moskva bunları rədd edib. Lakin Ankaranın açıq-aşkar diplomatik irəliləyişi İsrailin baş naziri Naftali Bennetin müharibəni bitirməklə bağlı diplomatik səyləri ilə üst-üstə düşür.

İsrail prezidenti İsaak Hersoq ölkələr arasında barışıq səyləri çərçivəsində çərşənbə günü Ankaraya səfər edib. Analitiklər qeyd edirlər ki, Türkiyə və İsrail arasında fikir ayrılıqları çox olsa da, Ukrayna münaqişəsi ilə bağlı vasitəçilik səyləri onların da ortaq maraqları olduğunu vurğulayır.

Gundemxeber.az