Ukrayna Prezidenti Volodimir Zelenski çərşənbə axşamı BMT-nin Təhlükəsizlik Şurasına deyib ki, dünya Rusiyanın Kyiv ətrafında yerləşən Buçada son bir neçə gündə aşkar edilən vəhşicəsinə edamlar, zorlamalar və mülki şəxslərə hücumlardan başqa Ukraynanın digər şəhərlərində etdiyi vəhşilikləri barədə “tam həqiqəti hələ öyrənməyib.”

“İndi dünya Rusiyanın etdiklərini görə bilir,” Zelenski BMT-ni “dünyaya Rusiyanın necə cəzalandırılacağını göstərməsi” üçün çağırış etdiyi BMT-də video müraciətində bildirib.

Mavi-sarı rəngdə Ukrayna bayrağının önündə oturan Zelenski deyib ki, Rusiyanın beş həftədən çoxdur davam edən hərbi müdaxiləsi və ölkəsinə hücumu “qlobal təhlükəsizliyin bütün quruluşunu sarsıdır.”

“Rusiya ordusu dərhal məsuliyyətə cəlb edilməlidir,” o deyib. O, BMT-nin necə davranmasını istədiyini deməsə də, bundan öncə dəfələrlə Qərbi Ukraynaya daha çox hərbi yardım etməyə və daha çox ölümcül silahla təmin etməyə çağırıb. Təhlükəsizlik Şurasında veto hüququna malik Rusiya, şübhəsiz ki, Birləşmiş Millətlər Təşkilatının müharibəyə birbaşa müdaxilə etmək cəhdinin qarşısını alacaq.

Zelenski deyib ki, “Ukraynanın” hər şeydən çox “sülhə ehtiyacı var, Avropanın sülhə ehtiyacı var, dünyanın sülhə ehtiyacı var.” O, BMT-ni İkinci Dünya Müharibəsindən sonra yaradıldığı zaman qəbul etdiyi prinsiplərə uyğun olaraq hərəkət etməyə və qlobal sabitlik qüvvəsi kimi fəaliyyət göstərməyə çağırıb.

ABŞ Dövlət katibi Antoni Blinken Ukrayna münaqişəsi ilə bağlı əlavə müzakirələr aparmaq üçün Brüsseldə NATO xarici işlər nazirlərinin görüşünə getmək üçün Vaşinqtonu tərk edərkən müxbirlərə deyib ki, Buçada üzə çıxan dəhşətlər “özbaşına hərəkət edən bir əsgərin təsadüfi əməli deyil. Bu, qəsdən öldürmək, işgəncə vermək, zorlamaq, vəhşilik törətmək kampaniyasıdır. Xəbərlər kifayət qədər etibarlıdır, dünyanın görməsi üçün sübutlar var.”

O deyib ki, Rusiyanın əməlləri “bizim və dünya boyu ölkələrin bu əməlləri törədənləri və ya onlara göstəriş verənləri hər hansı bir yolla, indi və ya başqa bir gün məsuliyyətə cəlb etmək qətiyyətini” gücləndirir.

Blinken əlavə edib ki, “Bizim Ukraynanı Rusiyanın təcavüzünə son qoymaq üçün apardığı cəsarətli mübarizədə dəstəkləməyə davam etmək və əlbəttə ki, bu təcavüzü dayandırmaq üçün Rusiyaya təzyiqi davam etdirmək və artırmaq məqsədilə əlimizdən gələni edəcəyimizə dair güclü bir əzmimiz var.”

Zelenksinin BMT-dəki çıxışı ABŞ Prezidenti Co Baydenin Rusiya lideri Vlaidmir Putinin müharibə cinayətləri səbəbilə mühakimə olunmalı olduğunu söyləməsindən bir gün sonraya təsadüf edib.

Moskva Buçada mülki şəxsləri öldürüldüyünə dair ittihamları rədd edib. Rusiya Xarici işlər nazizi Sergey Lavrov orada olanları “Rusiya əleyhinə səhnələşdirilmiş təxribat” adlandırıb. Rusiyanın BMT-dəki səfiri deyib ki, o, çərşənbə axşamı Təhlükəsizlik Şurasının iclasına “fakta əsaslanan sübutlar” təqdim edəcək.

Maxar Technologies peyk şirkətinin sözçüsü bazar ertəsi bəyanatda bildirib ki, martın ortalarında Buça üzərində əldə olunan görüntülər “bu yaxınlarda sosial mediada küçələrdə cəsədlərin olduğunu və onların həftələr boyu orada qaldığını göstərən video və fotolar” təsdiq edir.

Britaniyanın müdafiə nazirliyi çərşənbə axşamı deyib ki, Ukrayna qüvvələri “Rusiya qüvvələrini Çernihiv ətrafı və Kyivin şimalından geri gəkilməyə məcbur edəndən” sonra ölkənin şimalı hissəsində əraziləri geri alıblar. Nazirlik əlavə edib ki, həmin Rusiya qüvvələrinin Ukraynanın şərqində döyüşə hazır olmaları üçün “böyük ehtimalla yenidən təchiz olunmağa” ehtiyacları olacaq.

Ukrayna baş qərargahlar rəisi deyib ki, hazırda Rusiyanın əsas diqqətində şərqdəki Donetsk və Luhansk regionlarıdır və həmin ərazilər üzərində “tam nəzarəti” təmin etmək üçün qoşunlarını yenidən qruplaşdırır.

Buça və digər şəhərlərdə dağıntı səhnələri Moskvaya qarşı ciddi qınaqlara səbəb olub.

İtaliya və Danimarka çərşənbə axşamı Rusiya diplomatlarını ölkədən çxıardıqlarını elan edib. Bundan öncə Litva, Fransa və Almaniya da bənzər addımlar atıb.

“Xatırlayırsınızsa, mən Putini müharibə cinayətkarı adlandırdığıma görə tənqid olunmuşdum,” Bayden bazar ertəsi müxbirlərə deyib. “Həqiqət budur ki, siz Buçada baş verənləri gördünüz. Bu onun hərbi cinayətkar olduğunu sübut edir. Amma biz məlumat toplamalıyıq.”

“Bu insan qəddardır və Buçada baş verənlər biabırçılıqdır və hər kəs bunu görür,” Bayden Putinə istinad edərək bildirib. “Bəli mən sanksiyalar əlavə etməyə davam edəcəyəm,” Bayden əlavə edib.

ABŞ Dövlət Departamenti bildirib ki, Vaşinqton Ukraynanın tələbi ilə iddia olunan vəhşiliklərlə bağlı sübutlar toplayacaq çoxmillətli prokuror komandasını dəstəkləyəcək.