Katoliklərin ruhani lideri Papa Frensisk İtaliyanın Çivitaveekke şəhərindəki həbsxanaya baş çəkib.

Gundemxeber.az xəbər verir ki, papa burada keçirilən müqəddəs cümə axşamı ayinlərinə qatılıb.

Ritual zamanı kameralara tuş gələn fotolarda papanın 12 məhbusun ayaqlarını yuyaraq, öpdüyü əks olunub.

Xristian inancına görə çarmıxa çəkilməmişdən bir gecə əvvəl 12 həvarisinin ayaqlarını əlləri ilə yuyan İsa peyğəmbər sevgi və təvazökarlığa önəm verib. Katolik kilsəsi də bunu rituala çevirib.

Vatikanın paylaşdığı kadrlarda papanın kişi və qadın məhbusların ayaqlarını sırasıyla su ilə yuduğu və dəsmalla qurutduğu görülüb. Vatikan kilsəsinin rəhbəri daha sonra yuyulan ayaqları öpüb.

Mərasimdəki çıxışında 85 yaşlı papa deyib: “Biz rahiblər başqalarına xidmətdə birinci olmalıyıq, onları istismar etməməliyik”.

Çıxışına davam edən Frensisk qeyd edib: “Bu, “Mən heç kimi mühakimə etmirəm, hər kəsə xidmət etməyə çalışıram” deməyin bir yoludur”.

GundemXeber.Az