Rusiya kəşfiyyatı zaman-zaman xaricdə həyata keçirdiyi sui-qəsd iddiaları ilə gündəmə gəlir. Aleksandr Litvinenkoya edilən sui-qəsd ən qalmaqallılarından biridir. İddia olunur ki, Kremlin göstərişi ilə kəşfiyyat əsasən dissident həyatı yaşayanları və xaricdəki kəşfiyyatçıları hədəf alır.
Rusiya kəşfiyyatının maraqlı sui-qəsd cəhdlərinə əl atdığı bildirilir.
“Soyuq müharibə” dövründən bəri sui-qəsd cəhdlərində istifadə edilən silahlar da olduqca diqqətəlayiqdir.
1978-ci ildə Sovet İttifaqına müxalif mövqeyi ilə seçilən məşhur bolqar yazıçısı Georgi Markov İngiltərənin paytaxtı Londonda zəhərli güllə atan “Bolqar çətiri” kimi tanınan silahla öldürülüb.
2006-cı ildə Londonda başqa bir sui-qəsd də baş verib. Putinin əleyhdarı Aleksandr Litvinenko zəhərlənərək öldürülüb. İndi məlum olur ki, Litvinenkoya sui-qəsddə şübhəli bilinən Dmitri Kovtun COVİD-19 səbəbiylə bir müddət əvvəl Moskvada müalicə aldığı xəstəxanada dünyasını dəyişib.
Xatırladaq ki, A. Litvinenkonun qətli dünyada narahatlıqla qarşılanıb. Hadisədən sonra Britaniya səlahiyyətlilərinin apardığı araşdırmada Litvinenkonun içkisinə insan orqanizmində böyük dağıntılara səbəb olan nadir radioaktiv Polonium-210 maddəsinin atıldığı müəyyən edilib.
İstintaq bildirib ki, Dmitri Kovtun və Andrey Luqovoy Londonun mərkəzindəki oteldə qalan Litvinenkonun içkisinə radioaktiv maddə qataraq onu zəhərləyiblər və keçmiş agentin dəhşətli ağrılarla ölümünə səbəb olublar. A. Litvinenko xəstəxanada bir müddət müalicə olunduqdan sonra dünyasını dəyişib.
D. Kovtun və A. Luqovoyun olduqları yerlərdə də araşdırma aparan Britaniya səlahiyyətliləri, orada Polonium-210 izlərinə rast gəliblər.
Litvinenkonun ölümü ilə bağlı aparılan araşdırmada, sui-qəsddə istifadə edilən radioaktiv materialın ancaq nüvə reaktorundan gələ biləcəyi və bu, sui-qəsdin arxasında dövlət müdaxiləsinin güclü göstəricisi olduğu bildirilib.
Rusiyanın aparıcı mediası adı A. Litvinenkonun qətlində hallanan D. Kovtunun ölməsi barədə məlumat yayıb. “Bu gün yaxın və sadiq dostum Dmitri Kovtunun koronavirus infeksiyası səbəbindən ağır xəstəlik nəticəsində qəflətən dünyasını dəyişdiyi barədə kədərli xəbər aldıq. Bu, bizim üçün əvəzsiz və çətin itkidir. Dmitrinin bütün qohumlarına və dostlarına ürəkdən başsağlığı verirəm. Yaxşı yat, əziz dostum! Biz səni heç vaxt unutmayacağıq”,- deputat A. Luqovoy bildirib.
Kovtunun 2006-cı ildən bəri müxtəlif sağlamlıq problemlərinin olduğu iddia edilib və sağlamlıq problemlərinin Litvinenkoya sui-qəsdi zamanı məruz qaldığı radioaktiv maddədən qaynaqlandığı bildirilib.
Avropa İnsan Haqları Məhkəməsi (AİHM) 2006-cı ildə Londonda keçmiş rus casusu A. Litvinenkonun qətlinə Rusiyanın məsuliyyət daşıdığına qərar verib. AİHM-in qərarında qeyd olunub ki, “Litvinenkonun öldürülməsi Rusiyaya aid edilə bilər”. A. Litvinenkonun həyat yoldaşı Marina Litvinenkonun iddiası yekunlaşdıqdan sonra Rusiya sui-qəsddə iştirakını inkar edib. Rusiya rəsmiləri bəyanat yayaraq, D. Kovtun və A. Luqovoy haqqında beynəlxalq həbs qərarına əməl etməyəcəklərini bildiriblər.
Litvinenkoya sui-qəsdlə bağlı aparılan istintaq zamanı müəyyən edilib ki, D. Kovtun və A. Luqovoyun Rusiya xüsusi xidmət orqanları ilə əlaqələri var. A. Litvinenkonun qətlinə FTX-nın o vaxtkı direktoru Nikolay Patruşev və prezident Putinin razılıq verdiyi bildirilib.
Sui-qəsdin səbəbləri arasında Litvinenkonun Rusiyanı tərk etdikdən sonra Britaniya kəşfiyyatı ilə münasibətləri, Rusiya kəşfiyyatını sərt tənqid etməsi və Putinin Rusiyadan kənarda yaşayan əleyhdarları ilə əlaqələri sayılıb. Litvinenkonun Putinlə şəxsi ədavətinin olduğu və sui-qəsd əmrinin də bu səbəbdən verildiyi iddia edilir. //Reyting.az//
Sorğu
Hansı nəqliyyat növündən daha çox istifadə edirsiniz?