İranın ali rəhbəri Əli Xameneinin bacısı Bədri Hüseyni Xamenei ölkədəki etiraz aksiyaları ilə bağlı xalqa müraciət edib. O qardaşını sərt şəkildə tənqid edərək, xalqı molla rejiminə qarşı mübarizəni davam etdirməyə, haqsızlıqla barışmamağa çağırıb.

“Qardaşım İran xalqının səsinə qulaq asmır, yanlış olaraq öz muzdlularının, yaltaqların, xalqın payını yeyənlərin çıxışlarını İran xalqının səsi hesab edir. Xamenei günahsız insanları sıxışdırmaq və öldürməkdə Ruhullah Xomeyninin yolunu davam etdirir", - ali rəhbərin bacısı etirazlara dəstəyini ifadə edib.

İranın birinci şəxsinin bacısının Tehran rejiminə üsyan etməsi artıq bu ölkədə vəziyyətin nəzarətdən çıxdığına işarədir. Hətta bir çox mənbələr bildirir ki, İranda 22 yaşlı Məhsa Əmininin əxlaq polisi tərəfindən döyülərək öldürüməsindən sonra başlayan aksiyaların hələ də davam etməsi Xamenei başda olmaqla ölkəni idarə edən qrupları təşvişə salıb. Xalqın üsyana qalxmasından ciddi şəkildə narahat olan molla rejimi müxtəlif vədlərlə etirazları yatırmağa çalışsa da, heç bir nəticə əldə edə bilməyib.

Görünən odur ki, İranın hakimiyyətyönlü siyasi elitasında çaxnaşma yaşanır, hətta bəzi məmurların ölkədən qaçmağa hazırlaşdığı yayılan xəbərlər sırasındadır. 

Gundemxeber.az bildirir ki, mövzu ilə bağlı Modern.az-a danışan politoloq Sədrəddin Soltan bildirib ki, İranın ali rəhbərinin  bacısının xalqa ünvanladığı məktub, mitinq iştirakçılarına dəstək mesajı ölkədəki hadisələrin nə qədər ciddi olduğunu göstərir.

Onun sözlərinə görə, hakimiyyət üzvlərinin əksəriyyətinin ailə üzvləri mövcud şəraitdə yaşamaq istəmirlər:

"Dövlətin ali dini rəhbərinin bacı və qardaşı onunla müqayisədə daha islahatçı görünür. Onun qardaşı Hadi Xamenei də ölkədəki vəziyyəti vaxtilə tənqid edib. O, 2011-ci ildə çıxışı zamanı demişdi ki, "İranda bütün rəsmi tribunalar islahatlara qarşı olanlara verilib. Bacısı Bədri Hüseyni Xamenei ölkədəki vəziyyəti eyni şəkildə tənqid edib. Haşimi Rəfsəncaninin qızı da İrandakı hakim sistemi, zorakılığı kəskin şəkildə pisləyib. Bu isə onu göstərir ki, hakim dairənin ailə üzvləri hakimiyyət nümayəndələri ilə müqayisədə İrandakı hadisələrə daha mütərəqqi yanaşır.

Məsələn, lap əvvəl Xomeyninin xaricdə yaşayan nəvəsi İrandakı hadisələri tənqid edirdi. Hakimiyyət nümayəndələrinin xaricdə yaşayan ailə üzvlərinin yaşam tərzləri mövcud rejimin dəyərlərinə uyğun gəlmir. Bu, bir daha sübut edir ki, onlar ölkədəki şəraitə uyğun yaşamaq istəmir. Həmin şəxsləri üsyanlara qarışmasınlar deyə xaricdə saxlayırlar. Təbriz Tibb Elmləri Universitetininin tələbəsi, Qərbi Azərbaycandan olan Mürtəza Şirməhəmmədi etiraz aksiyalarında öldürülmüşdü. Onun atası SEPAH-ın regional məsul şəxslərindən biri Ələsgər Şirməhəmmədidir. Bütün bunlar sübut edir ki, hakimiyyətin müxtəlif qolları, yaxud əvvəllər hakimiyyətdə olmuş insanlar və onların ailə üzvləri də aksiyaları dəstəkləyir".

Politoloq vurğulayıb ki, hadisələrin belə davam etməsi İranda hakimiyyət daxilində parçalanmalara səbəb ola bilər və bu, qaçılmaz olacaq:

 "Hakimiyyət uzunmüddət etiraz aksiyalarına qarşı müqavimət göstərə bilməz. Söhbət onların aksiyaları yatırmaq üçün güc və imkanlarının olub-olmamasından getmir. Söhbət aksiyanın mənəvi gücündən, beynəlxalq ictimaiyyətin aksiyalar səbəbilə hakimiyyətə təsir etməsindən gedir. Bütün bunların hamısı İranda ciddi dəyişikliklərin olacağından xəbər verir.

6 dekabr tarixində İranın ali dini lideri Əli Xamenei özü də mədəni sahədə islahatların aparılmasına ehtiyac olduğunu bildirdi. Ola bilsin ki, onun bu çıxışı İran cəmiyyətini sakitləşdirməyə yönəlib. Ancaq bu çıxış yenə də, aksiyaların uğuru kimi qiymətləndirilə bilər. Çünki aksiya iştirakçıları artıq hakimiyyətin fikrini öz istədikləri məsələlərə yönəldə biliblər". 

Gundemxeber.az