Rusiyanın işğalçı hücumunə məruz qalmış Ukraynanın silahla təmin edilmsi gücləndirilir. Artıq bir çox ölkələr, o cümlədən ABŞ, Almaniya, Böyük Britaniya və Fransa Ukraynaya ən müasir tanklar göndərməklə bağlı qərar qəbul ediblər

Gundemxeber.az-ın məlumatına görə, rəsmi Paris Ukraynaya “AMX-10RC” təkərli tanklar göndərmək qərarını təsdiqləyib. Tanklar bu həftənin sonunda təhvil veriləcək.

Bunu Fransanın müdafiə naziri Sebastyan Lekornu “Parisien” nəşrinə müsahibəsində deyib.

“Bu tanklar həftənin sonunda təhvil veriləcək”, – deyən nazir şəxsi heyətin hazırlığının başa çatdığını bildirib.

Eyni zamanda, Lekornu çatdırılacaq tankların sayını dəqiqləşdirməyib. “Forces Operations” nəşri isə ordudakı mənbələrə istinadən yazır ki, Kiyev 14 zirehli maşın alacaq.

Niderlandın baş naziri Mark Rutte isə telemarafon zamanı deyib ki, Kiyevə hərbi yardımın göstərilməsi məsələlərində F-16 qırıcılarının Ukraynaya təhvil verilməsi Aİ tərəfindən növbəti addımdır.

“F-16 həqiqətən növbəti addım olacaq. Bu, növbəti böyük addım olacaq. Lakin biz gələcəyə yönəlmişik və sizə lazım olan hər şeyi ehtiyacınız olduğu müddətdə əldə etməyinizi təmin edirik. Ona görə də biz də dedik ki, bu məsələdə heç bir tabu yoxdur”, – Rutte vurğulayıb.

Gundemxeber.az