ABŞ-ın Gürcüstandakı səfiri Kelli Deqnan Gürcüstan parlamentini xarici agentlər haqqında qanun layihəsinə baxmaqdan imtina etməyə çağırıb.

"Biz parlamenti bu qanuna yenidən baxmağa, geri götürməyə çağırırıq, bu, Gürcüstanın maraqlarına uyğun deyil", - Deqnan jurnalistlərə deyib.

Onun fikrincə, “bu qanun Gürcüstanda fəaliyyət göstərən təşkilatlara dağıdıcı təsir göstərəcək”.

"ABŞ, Birləşmiş Millətlər Təşkilatı, Avropa İttifaqı, Avropa Şurası, Gürcüstanın bir çox dostları vətəndaş cəmiyyətini ləkələyəcək və müstəqil medianı susduracaq bu qanunla bağlı dərin narahatlıqlarını ifadə ediblər", - Deqnan bildirib.

Gürcüstan parlamenti “Xarici təsirin şəffaflığı haqqında” qanun layihəsini parlament komitələrində müzakirə edib təsdiq etdikdən sonra martın 7-də keçiriləcək plenar iclasda birinci oxunuşda qəbul etmək niyyətindədir. Parlament çoxluğunun nümayəndələri jurnalistlərə bildiriblər ki, bu qanun layihəsinin qəbulu üçün onların lazımi sayda səsi var.

Xarici agentlər haqqında qanunun qəbuluna etiraz edən müxalifət partiyaları və qeyri-hökumət təşkilatları parlament binası qarşısında etiraz aksiyaları keçirirlər.

Gundemxeber,az