Bu, blokun daha da genişlənməsini və Ukraynanın üzvlüyünü çətinləşdirə bilər. Əgər birinci Ukrayna daxil olarsa, o zaman Türkiyə heç vaxt Aİ-yə üzv olmayacaq.

Gundemxeber.az xarici mediaya istinadən xəbər verir ki, blokun yüksək rütbəli rəsmilərinin fikrincə, Kamal Kılıçdaroğlu Türkiyənin növbəti prezidenti olsa və ölkənin Aİ-yə daxil olması ilə bağlı müzakirələri yeniləsə, bu, Ukraynanın üzvlüklə bağlı “çox həssas müzakirələri” çətinləşdirə bilər. Eyni zamanda, bu məsələdə “Kiyev Ankaradan daha geniş siyasi dəstəyə malikdir”.

Brüsseldə və Avropa Birliyinin digər paytaxtlarında əmindirlər ki, Ukrayna və Qərbi Balkan ölkələri bloka qoşulsalar, “Türkiyə heç vaxt Aİ-yə daxil olmayacağını açıq şəkildə dərk etməli olacaq”. Nəşrin həmsöhbətlərindən birinin sözlərinə görə, Kiyevin üzvlüyü hazırda Rusiyanın başlatdığı müharibə fonunda “geosiyasi zərurət” hesab olunur.

“Nə vaxtsa Ukrayna və Qərbi Balkanların sonuncu genişlənmə olduğunu açıq şəkildə bildirməli olacağıq. Aİ-nin həm Türkiyə, həm də Ukraynanın öhdəsindən gələ biləcəyini təsəvvür etmək mümkün deyil. Bazar buna dözməyəcək”, deyə anonimlik şərti ilə Aİ-nin yüksək vəzifəli rəsmilərindən biri belə deyib.

Qeyd edək ki, Ukrayna müharibə başlayandan sonra Aİ-yə namizəd statusu üçün müraciət edib. Fevralın 11-də prezident Volodimir Zelenski bəyan edib ki, Ukrayna iki ildən sonra bloka qoşula bilər. 2023-cü ilin fevralında məlum olub ki, Ukrayna Aİ-yə daxil olmaq üzrə öhdəliklərinin 72%-ni yerinə yetirib.

Gözlənilir ki, Avropa İttifaqı ölkələri builki qış sammitində Ukrayna və Moldovanın quruma daxil olması ilə bağlı danışıqlara başlamaq perspektivini müzakirə edə bilərlər.

Türkiyə 1999-cu ildən Aİ üzvlüyünə namizəd ölkədir. Üzvlüklə bağlı danışıqlar 2005-ci ildə başlayıb, lakin 2016-cı ildə siyasi fikir ayrılıqları və Brüsselin Türkiyədə insan haqları və demokratik prinsiplərin pozulması ilə bağlı tənqidləri səbəbindən dayandırılıb.

Gundemxeber.az